Atos 21

যিরুশালেম শেহার রাঃআ হরারে।

1 মুরুব্বি কুরাঃআ হান্ডে হাতেন দুখ লঅ কয়তুকা হাতাকেৎ তেলে হেৎদ জাহাজতে সজে হরাতে কো ঢিপ তে হিজেনালে, গাপা হুলাং রোদঃঅ ঢিপ তে হেৎদ এনথাং হাতেন পাতারা নাঙ্গা র তে সেটেরে নালে।

2 হেৎদ এন তাহংরে এনকান মিয়াৎ জাহাজ নাম কেয়ালে অকাটা ফৈনীকিয়াটলা তে সেনাঃআ, আলে ইনা জাহাজতে সেনেনালে।

3 হেতদ কুপ্র ঢিপ নেলনাম কেয়ালে হেৎদ ইনা ঢিপ টাকে আলেয়া লেঙ্গা তিহিদর বাগি তুকা কেয়ালে, সুরিয়া দিশুমতে সেনেকাতে, সোর নাঙ্গা র তে আড়গুনালে, চিয়াচি এনথাংরে জাহাজ রাঃআ মালপত্র আড়গু রাঃআ কথা তাহিলেনা।

4 হেৎদ এনথাং রেঙ্কূ চেলা কুকে পাঞ্জা কাতে আলে এনথাংরে সতী মাহা তাহিনালে, ইঙ্কূ আত্মা রাঃআ দ্বারায়তে পৌলকে যিরুশালেম শেহার তে সেনঃঅ মানা কিয়াকু।

5 ইনা সাতী মাহা তাহিন তায়ম আলে সেনেনালে, ইন্তং ইঙ্কূ যতচ এরা হেৎদ কড়াহন কুড়ি হন কুকে লঅ ইদিকাতে আলেকে আড়াতুকা হিজেনাকু, নাই পাড়, এনথাংরে আলে উকুড়ুমেন্তে বিন্তিকাতে মিহুড় অটঅ মিহুড়কে কয়্তুকা এমকেৎকু য়ালে।

6 আলে জাহাজরেলে দেজেনা, ইঙ্কূ আকুয়া অড়াকু রুয়াড় সেনেনা।

7 হেৎদ সোর শেহার রাঃআ দাঃআ হরকাতে সেন মুচাদকাতে আটক িমায়ি শেহার তে সেটেরেনালে, হেৎদ পাতিয়ান হাগাকুকে জোহার কেৎকু য়ালে হেৎদ ইঙ্কূ লঅ মিদ মাহা তাহিনালে।

8 গাপা হুলাং আলে এনথাং হাতেন সেনেএন্তে কৈসরিয়া শেহার তে সেটেরেনালে হেৎদ বুগিন বার্তা পাস্না ক ফিলিপ, অকয় ইঙ্কূ সাত জন রেঙ্কূ মিহুড়, ইনিরাঃআ অড়ারে আলে তাহিনালে।

9 ইনিরা উপুনিয়া ডাংগুয়া হনেরাতেদ তাহিলেনাকু, ইঙ্কূ ভাবি জাগার গামেকেনাকু (যোয়েল . 2:28 )

10 আলে এনথাংরে গাদা মাহা তাহিন কেনালে হেৎদ ইহুদিয়া মুলুক হাতেন আগাব নুতুমতে মিয়াৎ ভাবি জাগারিজ হাজিরেনায়।

11 হেৎদ ইনি আলেয়া হান্ডে হিজেন্তে পৌলরাঃআ মায়াং তনলটা ইদিকেৎ তে, নিজেরাঃআ তিহি কাটা আটক ন্তে গামকেয়ায়, রীলামালা আত্মা নিয়া থুতি গামেতানায়, নিয়া মায়াং তনলটা অকয়রাঃআ, ইনিকে ইহুদিকু যিরুশালেম শেহার রে নেকাগে আটকয়াকু হেৎদ বিনইহুদি হড়কু রাঃআ তিহিরে সম্পাইয়াকু।

12 নিয়া থুতি আয়ুমকেৎ তেলে আলেহঅ এনথাং রেঙ্কূ পাতিয়ান হাগাকু পৌলকে কষামুদিকিয়াকু, ইনি যেন যিরুশালেম শেহার তে আলয় সেনঃঅ কাআয়।

13 ইন্তং পৌল গামকেয়ায়, আপে নাআ কিনা চিকায় তানাপে? ইয়ামকাতে ইঞা অন্তরকে চিয়া ছারখারে তানাপে? চিয়াচি ইঞ প্রভু যীশু রাঃআ নুতুম রাঃআ নাতিনাং যিরুশালেম শেহার রে একেন আটক নাতিনাংদ লহয়, গজঃঅতেহঅ তেয়ার মেনাইঞা। 14 নেকাগে ইনি আলেয়া থুতি আয়ুমতে কায় মানা লেনায়, ইন্তং আলে থিরে নালে হেৎদ গামকেয়ালে প্রভুরাঃআ ইচ্ছা পুরাঃআ কাআ। 15 ইনা তায়ম আলে জিনিসপত্র গুটিয়া কাতে যিরুশালেম শেহার তেলে সেনেনা।

16 হেৎদ কৈসরিয়া শেহার হাতেন কথক হড় চেলা আলে লঅ হিজেনাকু, ইঙ্কূ কুপ্র ঢিপ রিনিজ ম্নাসোন নুতুমিজ মিহুড়কে সঙ্গেতে আউকিয়াকু, ইনি মাড়াঙ চেলাকুরাঃআ মিহুড়, ইনিরাঃআ অড়ারেগে আলেয়া পাহি হুইরাঃআ কথা।

পৌল যিরুশালেম শেহার তে সেটেরেনায়।

17 যিরুশালেম শেহার তে সেটেরেনায় খানঃঅ পাতিয়ান হাগাকু আলেকে কুশি লঅ দারমকেৎ লেয়াকু,

18 গাপা হুলাং পৌল আলে লঅ যাকোব রাঃআ অড়াতে সেনেনালে, এনথাংরে যত মুরুব্বিকু হাজিরেনাকু।

19 হেৎদ ইনি ইঙ্কূকে জোহারকেৎকু য়ায় হেৎদ ঈশ্বর ইনি রাঃআ খাতির রাঃআ হরকাতে বিন-ইহুদিকু রাঃআ তালারে অকা সব কামিৎ আয়, ইনা শালাশালী কাতে গামাৎ কুয়ায়।

20 নিয়া থুতি আয়ুম কাতে ইঙ্কূ ঈশ্বর রাঃআ গৌনজহার লাগায়নাকু, ইনিকে গামকিয়াকু, বকইঞ, আম সারিয়াম, ইহুদিকু রাঃআ তালারে জুলুজুলু হড় পাতিয়া কানাকু, মেন্খান ইঙ্কূ যতচ আরিচালি মানাবাতা নাতিনাং কুব গে উজ্জুগী।

21 হেৎদ ইঙ্কূ আমা বাবদতে নিয়া থুতি আয়ুমতাৎ আকু যে, আম বিনইহুদিকু রাঃআ তালারে প্রবাসী ইহুদিকুকে মোশি রাঃআ আরিচালি বাগি নাতিনাং চেচেদ এমাতান কুয়াম, যেন ইঙ্কূ হনকুরাঃআ সুনু চুটি আল গেদকুকাকু হেৎদ ইনা লেকাতে আল সেনঃঅ কাআকু।

22 এন্তে নাহা কিনা করা হয়ুয়া ? ইঙ্কূ আয়ুম নামেগেয়াকু যে, আম হিজাকানাম।

23 ইনা মেন্তে আলে আমকে কিনা গামাঃআমালে, ইনা করাম। আলেয়া এনকান উপুনিয়া কড়াহন মেনাকুয়া, অকয় মানত তাৎআকু,

24 আম ইঙ্কূ লঅ সেনকাতে নিজেকে ছুতম হেৎদ ইঙ্কূ য়া বহঃঅ হেড় রাঃআ নাতিনাং খরচাম। এন্খান যতচ সারি নামেয়াকু, আমা বাব্ত্তে অকা যত থুতি ইঙ্কূ আয়ুমতাৎ আকু, ইনাকু সার্তি লহয়, বরঞ্চ আম নিজেহঅ আরিচালি মানা বাতাকাতে সার্তি আরি চালি তে সেসেনতানাম।✝21:24 লেখাযখা 6:5,13-18; 21

25 মেন্খান অকা বিনইহুদিকু পাতিয়ানাকানাকু, ইঙ্কূ য়া বাব্ত্তে আলে দরবার কাতে অলতাৎ আলে যে, প্রতিমা রাঃআ প্রসাদ, মায়ম, হটঅ টিপাকাতে গজঃ জানুয়ার কুরাঃআ জিলু হেৎদ হড়মো লটম, নিয়া সমস্ত বিষয় হাতেন যেন নিজেকেকু রুক্ষীয়া আকা।

26 তায়্ম হুলাং পৌল ইঙ্কূ কথক হড় লঅ, ছুত য়েন্তে মুন্দির পিন্ডগীরে বলয়নায় হেৎদ ইঙ্কূ বলি সামাং হাতেন ছুত নাতিনাং চিমিন মাহা লাগাআ, ইনা গাম সদর কেয়ায়।✝21:26 লেখাযখা 6:13-21

জাহের থানরে পৌল আটক তুকায় নায়।

27 হেৎদ ইনা সাত মাহা চাবায়না খানঃঅ এশিয়া মুলুক রেঙ্কূ ইহুদিকু মুন্দির রে ইনিরাঃআ দেখা নামকেৎ তেকু যত হড়কে উস্কুরকাতে ললকেৎকু য়াকু হেৎদ ইনিকে সাবকাতে কিকিচকাতে গাম লাগায়নাকু,

28 ইস্রায়েল রেঙ্কূ হড়কু দেঙ্গালেপে, নিই ইনি হড়তানায়, অকা সব জায়গারে যতচ কুকে আবুয়া জাতিরাঃআ হেৎদ আরিচালিরাঃআ বিরুধরে নেথাংরে চেচেদ এমকুয়ায়, অট নিকু গ্রীককুকেহঅ মুন্দির রে আউতাৎ কুয়ায়, হেৎদ নিয়া রীলামালা থাং অরীলামালাতাৎ আয়।

29 চিয়াচি ইঙ্কূ মাড়াঙতেগে নাগার রে ইফিষীয় নাগার রিনিজ বিনপাতিয়ান ইহুদি ত্রফিমসকে পৌল লঅ নেললিয়াকু হেৎদ আটকার কেয়াকু পৌল ইনিকে মুন্দির ভীতিরতে আদের তিয়ায়।

30 ইন্তং নাগার রেঙ্কূ হড়কু কিকিচ কাতে জেহেৎ রাকাবেনাকু, হড়কু নির হিজেনাকু হেৎদ পৌলকে সাবকাতে উপাসনা অড়ারাঃআ বাহারতে গহাড় ইদিকিয়াকু, হেৎদ সাথে সাথ উপাসনা অড়ারাঃআ কবাটকু হান্ডেৎ কেয়াকু।

31 নেএ নেকাগে ইঙ্কূ ইনিকে গজ সানায়নাকু, ইন্তং সৈন্যদলরাঃআ জুলু পতিরাঃআ হান্ডে নিয়া খবর হিজেনা যে, গোটা যিরুশালেম শেহার রে রেটেপেটে এহবাকানা।

32 চিদগি ইনি পাল্টন কুকে হেৎদ চাকি পতিকু লঅ ইঙ্কূ য়া হান্ডে নির সেনেনাকু, ইনাতে হড়কু জুলু পতিকে হেৎদ সেনাকুকে নেল নামকেৎকু তেকু পৌলকে দাল বন্ধকিয়াকু।

33 ইন্তং মারাং পাল্টন হিজকাতে ইনিকে সাবকিয়ায় হেৎদ বারিয়া শিকড়িতে ইনিকে আটক তে হুকুম এমকেৎকু য়ায় হেৎদ কুলিকেৎকু য়ায়, নিই অকয়তানায়, হেৎদ নিই কিনা চিকাতাৎ আয়?

34 মেন্খান হড় কুরাঃআ তালা হাতেন নাইজ-হানিজ হড় কিকিচকাতে নাআহানা থুতি গাম লাগায়নাকু, হেৎদ ইনি যাহানা কায় আটকার দাড়িলাৎআয়, ইনাতে ইনিকে গাড়তে ইদিতে হুকুম কেৎকুয়ায়।

35 ইন্তং সিঁড়িতে চেতাংতে হাজিরেনায় খানঃঅ হড়কু রাঃআ ক্ষিপ্ততারাঃআ নাতিনাং সিপাইকু পৌলকে কুডুরুব ইদিকিয়াকু।

36 চিয়াচি হড়কু রাঃআ ভিড় তায়ম তায়ামতে সেনঃঅ কেনাকু, হেৎদ কিকিচ কাতে গাম লাগায়নাকু ইনিকে দাল কুদা গিডিপে।

পৌল হড়কু রাঃআ উদ্দেশে বক্তৃতা এমকেয়ায়।

37 ইঙ্কূ পৌলকে ইদিকাতে গাড় রাঃআ*21:37 দুর্গ =গাড় ভীতার বলঃঅনাকু, পৌল মারাং পাল্টন*21:37 সেনাপুতি =পাল্টন কে কুলি কিয়ায়, আমা হান্ডে কি যাহানা গাম দাড়িয়াইঞ? ইনি পাল্টন গামকেয়ায় আম কি গ্রীক জাগারতে থুতিআম?

38 এনখান আম কি ইনি মিশরীয় ল্হয় তানাম, অকয় নিয়া মাড়াঙতে বিদ্রোহ লাৎআয়, হেৎদ উকুয়াকান গজিজ রাঃআ উপুন জুলু হড়কে লঅ*21:38 সঙ্গে =লঅ তে ইদিধরাকাতে মরুডাহিতে সেনলেনায়।

39 ইন্তং পৌল গাম কেয়ায়, ইঞ ইহুদি তার্ষরাঃআ রিনিজ কিলিকিয়া দিশুম রিনিজ হড়, ইঞ মিয়াৎ নুতুমান নাঙ্গা র রিনিজ হড়, আমকে কষামুদি তানামাঞ, হড়কু লঅ থুতি রাঃআ নাতিনাং সায় ইঞকে এমাইঞমে।

40 হেৎদ ইনি সায় এমাকিয়ায় খানঃঅ পৌল সিঁড়ি রাঃআ চেতাংরে তিঙ্গুকাতে যতচ কে তিহিতে ইশারা কেৎকু য়ায়, ইন্তং যতচ থিরেনাকু, ইনি ইঙ্কূকে ইব্রীয় জাগারতে গামকেয়ায়।