1 Kubva kuWhola.

Kumfumakadzi wakahagwa neNdzimu nekubana babe, bandinoda ngelebeswa, kusi imi ndoga koga nebamwe bose banoziba lebeswa, 2 nentha yelebeswa linogala mutili linowhoba naswi nekusingapele.

3 Ngoni, nemawhilangoni nekunyalala kunobva kuNdzimu Tate nekuna Yesu Khirisitu, Nkololo waTate, kowhoba kutili mulebeswa nemuludo.

4 Ndakahanha kwazo ndiwana bamwe bebana babo betobelela malebeswa, sekwatakalayiwa naTate. 5 Sangwenu ndokukumbila, mfumakadzi, ndisingakukwalile nlayo ntshwa, koga iwhoyo watakabe tinawo kubvisila kutanga, kuti tidanane. 6 Igogu ndigo ludo. kuti titjile ngetobela milayo iye. Sekwamakawha kubvisila kutanga, nlayo uwe ndewekuti mutjile muli muludo.

7 Ngobe batjebeli banjinji batjihhala muhango, banhu basingabvume kuti Yesu Khirisitu wakahha ali nhu, nhu wakajali untjebeli kakale utjita tjaKhirisitu. 8 Yelani njele, kuti musilahikigwe nekwamakahingila, koga muwamutjile mbhayilo uhhele.* 9 Kene yani unotjuluka kakale asingatobele tjidiyo tjaKhirisitu haana Ndzimu, unogala mutjidiyo unabose bubili gwabo Tate neNkololo. 10 Hapa kene yani ehha kumuli esingahhise tjidiyo itjetji, musiwuwamutjile munzi wenyu kene iko wunlezwa, 11 ngobe unowunlezwa unohanganyila naye mumihingo iye yakayipa.

12 Nekene ndinakunjinji kwandingamukwalila, kuhine ndisihingise phepha kene inki, koga ndakalingilila kuti ndimukumbe ndilebeleke namwi takalingisana kudze kuti hanha kwedu kube kwakapelela.

13 Bana bemfumakadzi wakahagwa banokubuyisa.