1 Kubva kuna Phawuli mpositoli waKhirisitu Yesu ngekuda kweNdzimu, naThimothi gamu ledu.

2 Kubayengemali nehama dzinogalikabgwe muna Khirisitu, bakuKolose.

Ngoni nekunyalala kunobva kuNdzimu Tate bedu ngakube kumuli.

3 Togala tiboka Ndzimu, ibo Tate baHe wedu Yesu Khirisitu, hapa timutembezelela, 4 ngobe takawha nekwebugalimoyo gwenyu muna Khirisitu Yesu nange ludo gwamunago kubayengemali bose, 5 ngentha yekugalabgwe kwamakabigigwa kudzimu kakale kwamakatjiwha nekwako mudama lemalebeswa, iyo ndebo mbuya 6 yakatjihha kumuli, nayiyeyo zwayo zila, inozwala mitjelo kakale inokula muhango yose, sekwayakathama pakati kwenyu, kubvila hhuba lamakatanga yiwha newhisisa ngoni dzeNdzimu mumalebeswa, 7 sekwamakadiyiwa na Iphafurasi unodikala watinohinga tose. Iphafurasi unlanda waKhirisitu unogalikabgwe unohinga alimile mugumbo ledu, 8 wakatibudza nekweludo gwamunago muMeya.

9 Ngentha yayikoku, kubvisila muhhuba latakawha nekwako, atizotongoletja mutembezelela, kakale tikumbila kuti kadzene Ndzimu bangamuhhadza neluzibo gwekuda kwabo ngebutjenjebvu gose newhisisa kose kunobva muMeya, 10 kuti mutjile nezila yakalulamila He, kakale muthama kunowuhanhisa, muba nemitjelo mumihingo yose yakanaka, mupamhidzigwa muluzibo gweNdzimu. 11 Ngamusimisiwe nemasimba ose, kuyendidzana negudzo limumasimba awe, kuyetila kuti mutubule simidzila kose neba nemoyonlefu, mulihhele kuhanha, 12 muboka ibo Tate bakatithama kuti *tibe negobe munhaka yebayengemali mutjedza. 13 Ibo bakatibvubula kubva mumasimba ehhalima, bakatihhisa kubumambo gweNkololo wabo unodikala, 14 muwunli takasunungugwa, kuleba kuti, yetigwa mazwibhatigwa matjinyo.

15 Khirisitu umfananidzo weNdzimu usingabon'we, ndiye mbano yembumbiko yose, 16 ngobe muwunli zwinhu zose zwakabumbiwa, zwikudzimu nezwimuhango, zwinobon'wa nemeho nezwisingabon'we, kungabe zwigalo zwebuhe kene butongi kene masimba emeya kene butungamili; zwinhu zose zwakabumbiwa muwunli kakale zwibumbigwa iye. 17 Khirisitu waka elipo zwinhu zose zwisanhu zwikabepo, kakale muwunli zose zwinhu zwimubugalo gwazo gwakatambunuka. 18 Ndiye n'holo wembili, ilo gubungano lebagalimoyo*, ndiye mabambo, mbano yebakamusiwa kubafi, kuyetila kuti iye yega abe nebugalo gwekutanga muna kose. 19 Ngobe Ndzimu bakahanha kuti pelela kwabo kube muwunli, 20 muwunli, Ndzimu wakabgwilulanya kuwunli zwinhu zose, kungabe zwimuno muhango kene zwikudzimu, eyeta lunyalalo ngemalopa awe akatebuka patjileyanyo.

21 Imwi makatongobe makathubukana neNdzimu mulizwita zwizwe mumikumbulo, muthama mihingo yakayipa, 22 Ndzimu watjizwibgwilulanya namwi ehingisa mbili wenyama weNkololo uwe ngelufu, kuti amuwamutjile makayengemala, makatjena, musina nlandu mbeli kukwe, 23 hapa kuli kuti moyendilambeli muli mubugalimoyo, makagadzikana makasima, musingatsheduke muna tjakalingiligwa nendebo mbuya yamakawha, iyo yakasumikigwa kuyimwe neyimwe mbumbiko ipasi kwekudzimu, imi Phawuli yandakatiwa n'hingi wayo.

24 Ngwenu ndohanha mudziyila kwangu ndidziyilila imwi, kakale mumbili wangu ndohhadzisa tjinotayila mukudziyidzika kwaKhirisitu ndiyetila mbili uwe, ilo gubungano lebagalimoyo*, 25 ndakaba n'hingi kuyendidzana netjigalo tjandakapiwa neNdzimu, nditjipigwa imwi, kudze ndisumikile dama leNdzimu nebuhhalo, 26 itjetjo tjakasumbikala, tjakasumbikika kubvila ntolo ntolo nekuzwizekugwana zwinjinji, koga ngwenu tjazumbunuligwa bayengemali babe. 27 Ndzimu wakahala thama kuti bazibe kuti bukulu gwegudzo layitjetji tjakasumbikala ligulu kungapani kuBataya, kunoba ali iye Khirisitu umumuli, ilo gudzo lamunogalabgwe. 28 Ndiye watinosumikila, titjenjedza nhu wose kakale tidiya nhu wose nebutjenjebvu gose, kuyetila kuti tihhise nhu wose akapelela muna Khirisitu. 29 Ngentha yayikoku ndohinga zwakasima, ndigwisa nemasimba ose aakandipa anohinga mundili.