1 Tjebupelo hama dzangu, hanhani muna He. Akutondidziyidza pamhulula mukwalila tjinhu tjin'ompela, komuthama mukaba bakatjengeteka. 2 Mutjenjelele mbgwa, bahingi bezwibi, ibabo banotjeka mibili. 3 Ngobe iswi tibakawamutjila thumbigwa kwemalebeswa, banonamata Ndzimu mumeya, gudzo ledu limuna Khrisitu Yesu, atina kugutshikana mumbili. 4 Nenguba imi ndina kugalabgwe munyama zwangu, hapa umwe nhu ekumbula kuti unatjinhu tjaangagalilabgwe nyama imi ndinatjo tjinopindisa, 5 ndakathumbigwa muhhuba lebuhhanakadzi lezwagwa, ndinhu wekuIsirayeli, weludzi gwaBhenjamini, Nhhebheru wakazwagwa nebaHhebheru, ngekwenlayo ndiMFarisi, 6 ngekuzwipila kwazo kwazo ndaka ndidziyidza gubungano, ngekwendulamo pasi kwenlayo ndakandisina nlandu. 7 Koga kene wupi mbhayilo wandakabanawo ndowuntola selahikigwa, ndiyetila Khirisitu. 8 Lebeswa tjimwe netjimwe ndotjitola semalala ngentha yebukulu gweziba Khirisitu Yesu He wangu. Ngetha iye ndakalahikigwa nezwinhu zose, kakale ndozwitola semalala kuyetila kuti ndiwane Khirisitu, 9 kakale ndiwanike muwunli, ndisina lulama kwangu ngekwenlayo, koga ndina lulama kunobva mubugalimoyo muna Khirisitu, lulama kunobva kuNdzimu ngegalamoyo, 10 kuyetila kuti ndiwunzibe, nemasimba awe emuka kubafi, ndihingidzane naye mudziyila kukwe, ndifanane naye mulufu gugwe, 11 kudze hapa kuyetikala ndiwamutjile bo musiwa kubafi.

12 Akuta kuli kuti imi ndakatjikuwamutjila ikoku, kene kuti ndakatjiyetiwa apelela; koga ndogwisila kuti mbhayilo ube wangu, ngobe Khirisitu Yesu wakandita ndikaba uwe. 13 Hama dzangu anditozwitola sekuti ndakatjiyeta mbhayilo ukaba wangu, koga tjinhu tjin'ompela tjandinothama, whukangan'wa tjihule kwangu, ndigwisa wabilila tjimbeli kwangu. 14 Ndosundidzila tjose kuti ndiyende mbeli kumbhayilo weNdzimu wedanigwa pehhugwi, muna Khirisitu Yesu.

15 Bamwe bedu batjikula mumeya ngababe nenkumbulo wakajalo; koga hapa kungaswika kuti mukumbule neyimwe zila ipoga nekwetjimwe, ikoko bo Ndzimu unowomuzumbunulila. 16 Koga ayibhatisiseni ngemalebeswa ikoku kwatatjiwana.

17 Hama dzangu, todzani imi, mulingisise ibabaya banotjila sayikoku ngobe makafanila kuti mutitole setjiyelesedzo. 18 Ngobe sekwandakagala ndimubudza, ndeemubudza nemihodzi, banjinji banotjila sezwita zwetjileyanyo tjaKhirisitu. 19 Bupelo gwabo whupaladziwa, ndzimu wabo injemulo dzemibili yabo, banozwikudza muzwinhu zwinobhatisa honi, mikumbulo yabo yakalinga zwinhu zwehango iyeyi. 20 Koga fumwa yedu tose iyapo kudzimu, takalinda Ntjidzi wedu unobva ikweno iye He Yesu Khirisitu, 21 iye unowhohandula mibili yedu isina masimba kuti ifanane nembili uwe uhhele gudzo, ehingisa masimba awe anothama akatubula kuti zwinhu zose zwibe pasi kukwe.