1 Kubva kuna Jakobe, n'hingi weNdzimu newaHe Yesu Khirisitu.

Ndobuyisa dzose njudzi dzili gumi nembili dzakaandama muhango yose.

2 Makamu angu, mukutole sehanha hapa muhangana nelikwa kwakasiyana siyana, 3 nekuti moziba kuti likwa kwebugalimoyo gwenyu kozwala simidzila. 4 Simidzila ngakuhinge ngekuhhele, kuyetila kuti mukule kakale mupelele, musitayile tjimwe. 5 Hapa umwe wenyu etayila butjenjebvu, ngaakumbile Ndzimu, unowhowumpa. Ndzimu unopa banhu bose ngekuhalabvuka kakale esingabone nhu nlandu. 6 Koga ngaakumbile ngekugalamoyo, esingabvubvume mumoyo, ngobe unobvubvuma unonga bundo levula yegungwa linolawugwa nemhepo. 7 Iwhoyo nhu aazofanila lingilila kuti unowhowana kene tjimwe kubva kuna He. 8 Nhu wakajalo una mikumbulo mibili kakale aatozwipila muna kose kwaanothama.

9 Nghalimoyo upasi ngaahanhisiwe nemilidziwa kukwe, 10 newakafuma wakafanila hanha hapa edelusigwa pasi, ngobe unowhopalala seluba lebuhwa. 11 Ngobe hhuba lobhuda lipisa, likapisa buhwa; maluba ago akawa, nenaka kwago kukapela. Ndizo mfumi bo unowhopalala atjipakati kweyeta mihingo iye.

12 Wakakombolegwa nhu unosimidzila hapa ali mukulikiwa, ngobe hapa atjikukunda unowhowamutjila tjiyala tjebutjilo Ndzimu tjaakagadzabgwe ibabo banowundha. 13 Kusibe newunoti hapa elikiwa akati, "Ndolikiwa neNdzimu." Ngobe Ndzimu aangalikiwe nebubi kakale iye tjekukwe haatolika nhu; 14 koga umwe newumwe nhu unolikiwa hapa edan'wa kakale ekwebgwa neyemula kukwe kubi. 15 Njemulo mbi dzikabvumigwa dzozwala jinyo; jinyo hapa lakula lozwala lufu.

16 Musitjebegwe makamu angu anodikan'wa. 17 Tjimwe netjimwe tjipo tjibuya netjipo tjakapelela tjobva pehhugwi, tjibva kuna Tate bezwivoneko basingahanduke sentuzi unohanduka handuka. 18 Ibo ngekuda kwabo bakatizwala ngedama lelebeswa, kudze tibe bekutanga hha kubali tili mitjelo yekutanga yezwabakabumba.

19 Zibani whoku makamu angu anodikala. umwe newumwe nhu ngaalibilidze wha, anonoke lebeleka, anonoke mon'wa, 20 ngobe mon'wa kwenhu akutoyeta lulama kunohakwa neNdzimu. 21 Ndizo ke lahani kose sazwibhata nebubi gose gunowanda, muwamutjile ngekutebama, dama lakadzwagwa mumuli, ilo linotubula tjidza meya dzenyu.

22 Musibe banhu banowha dama koga, muzwitjebela; koga ibani banhu banoyeta tjalinoleba. 23 Ngobe hapa nhu ewha dama koga esingayete tjalinoleba, unonga nhu unozwilinga buso gugwe patjiboni; 24 ngobe unozwibona koga hapa ebva ipapo tjinyolotjo unokangan'wa kuti unolingika tjini. 25 Koga iwhoyo unoholesesa munlayo wakapelela, nlayo unopa lusununguko, ewuntobela, asinhu unongowha ebva ekangan'wa koga eyeta tjaawha, unowhokombolegwa muna tjaanothama.

26 Hapa umwe nhu ekumbula kuti una kunamata, koga eti hapa elebeleka esingahale matama unozwitjebela mumoyo, unonamatila suli. 27 Lunamato gwakayengemala gusina hambgwa mbeli kweNdzimu Tate bedu ndiwhogu. kumba siyan'wa nenjhilikadzi mumagwadzo adzo, nezwitjengeta kuti usilongwe hambgwa nehango.