1 Ukumbudze banhu ibabo kuti bazwitebamise pasi kwebatongi nebanamasimba babawhilile, bagale bakazwilulamisila thama kene upi zwawo n'hingo mbuya. 2 Basilebe zwakayipa nekwewumwe nhu, basiyane nekakabadzana, babe nemoyo wakatebama, bazwitebamise kunhu wose. 3 Ngobe iswi tjekwedu takaba tili zwilengwe, tisingawhilile, takalahika, tilibalanda benjemulo mbi dzakasiyana siyana, tida zipigwa, mahhuba ose tithama bubi nendandala, banhu betibenga, naswibo tibengana, 4 koga pakwakabonekwa ngoni dzeNdzimu iye Ntjidzi wedu neda banhu kukwe, 5 wakatitjidza esingakuthame ngentha yemihingo yedu yatakathama mukululama, koga kubva mumawhilangoni awe, ngesukwa kwezwagwa butshwa nange yetiwa batshwa ngeMeya Yakayengemala, 6 yaakadulula nebunji pehhugwi kwedu ndiYesu Khirisitu Ntjidzi wedu, 7 kuyetila kuti tilulamisiwe nengoni dzidze, kakale tibe belukata tili mukugalabgwe mubutjilo gusingapele. 8 Ndebo iyeyi ilebeswa.

Ndohaka kuti ukowhomesedze zwinhu izwezwi, kuyetila kuti ibabo bakagalamoyo muNdzimu bazwipile thama mihingo mibuya, ngobe izwezwi zwinhu zwakanaka kakale zobhatsha banhu bose. 9 Koga tsheduka pabulengwe nekakabadzana, nelondesedzo dzebukamu, neyetilana, negwisana ngekwenlayo kusina n'hingo, ngobe akutobhatsha kakale akuna tjakunopundula. 10 Nhu unoda thubukanya banhu uwuntjemele kan'ompela kene kabili. Hule kwayipapo hapa esingakuwhilile uthubukane naye, 11 noba weziba kuti nhu wakajalo wakakombama unotjila mumatjinyo, kakale unozwitilika nlandu.

12 Hapa ndatuma Athemasi kene Thikhikhasi kukuli, ugwise nemasimba awo wose hha kundili kuNikhopholisi, ngobe ndahala kuti mbaba yose ndowhoba ndili ikweno. 13 Ugwise kwazo ubhatshe Zinasi nzibi wenlayo, naApholosi kuti batange gwendo gwabo, ube nemalebeswa kuti abana tjabanohaya. 14 Banhu bedu bakafanila diyika hinga mihingo mibuya, kuyetila kuti bazwipile bhatsha muna zwinobe zwihakika, basibe betjila butjilo gusina mitjelo.

15 Bose bandinabo ngeno banokubuyisa. Ubuyise bose banotida mubugalimoyo.

Ngoni ngadzibe namwi mose.