Ruu Hɨnɛ Aru Vaa Gɨnnɛ
1 N kasirɛ ɔ kpaa sisɨntɔ masayi, aru vigbete au kpaa u ɓeuru gbete i gɨn Musa nya yɛ. Shɔ kukiyi a nyasii piti kpai i kpaa tɛnɛ mii waapo darɛ. 2 Shɔ pɛliyi shɔgbete i gɨn Musa batizima a nyasi a mii waaponi kpai. 3 I shaa jo borodi gbete au ã suruyɛ kɔ piti kpai 4 i piti kpai i ɓoo jo mii gbete au ã suruyɛkɔ. I ɓoo mii jo kɔpɔnkɔ au ã suruyɛ au yɛ a yiniyɛ; kɔpɔu sijo Kirisi au yuu. 5 Ama ko si Ɗalapa bi jo ntɔu nya ɓa a yini ɓa, a shɔ sãtiyi vɔrɔ a ɗɔgbete laa si ɓa ɗɔn bang ɓa piti kpai. 6 Dɔdɔrim vim pɛ vigbete u yɛ kpaa gɨn ɗɔnyɛ aru gbete u yɛ kasi vikɔ̃linɛrɛ nagbete i pɛliyɛ. 7 Ɔkɔ ɔ̃nɛ shɔgbete i gɨn vigbete u suru ɓayɛ nagbete zɔ gãsiyi pɛliyɛ, Nagbete shɔ bee a labeenɛ Ɗanyarubii nɛ, << Shɔwi i ɔ̃ tɛ i ɗɔɔ shaanɛ, i ɗɔɔ ɓoonɛ, i tɔ sasanɛ a kpãntang pɛlinɛni .>> 8 Jo ɔ̃riu ɓa kaka jazɨng a kɔrɔ u pɛli kpãntang ɓa, naa i zɔ gãsiyi pɛliyɛ ɓa, a leegbete isi bi laa-laa kopi atu jaa maani ɓa taati ai vɔyɛ. 9 Ji ɔ̃riu ɓa kaka jaazɨ a kɔrɔ nɛ u nta Uɓeyelapa sisɨn ɓa, naa i zɔgãsiyi pɛliyɛ sɔɔ yɔkiyirɛ i vɔliyɛ ɓa. 10 Ukɔu nwa nyanɛ naa i zɔgãsi i nwayɛ a Ɗalapa jashonɛ lapa gbete i yɔ̃ vɔrɔ i arɛ i yɔ̃kiyi vɔrɔ kpai. 11 Vim pɛlirɛ a yini piti kpai nɛu ɔ̃kɛ vi tasinɛ a shɔwɔyi bi, shɔ bee vim au yuukɔ nɛu zɛtɔ, u shɔgbete ladurum miyi kpaiyɛ, aru u ɔ̃ aɗagbete koo yɛ yisinya yɛ. 12 Akɛ tɔɔnɛn shitɛ a kakani a kɔyuu tɔ nɔgbete a yɛ wiɓa ɗɔn ɓa.