1 Ɔ mɛsintɔ, jo nɔgbete n mɛsi Kirisi yɛ.

2 N ɓɛlɔɔtɔ aru gbete ɔ sisɨn ang yuu a gɨn vigbete n matɔɔyɛ ang ãwɔtɛ a naa yɛ. 3 Ama n kasirɛ ɔ zɛtɔ nɛ Kirisi kɔ tɛ ko-pi shɔgbete piyarɛ kakani, shɔ vɔshɔkɔ ɔ̃rɛ shɔgbete au tɛ ɓɛso kakayɛ, Ɗalapa kɔ ɔ̃rɛ shɔgbete au tɛ Kirisi kaka yɛ. 4 Arumkɔ shɔgbete au gaki Ɗa yɛ ko au nwari shɔ Ɗanyaruubii kɛ kukiu yuunɛ si ã Kirisi yusẽtɛ. 5 A ko-pi suu gbete piya kɛ gaki Ɗa nɛ ko kɛ nwari shɔ Ɗanyaruubii nɛ ji kuki yuu ɓa si ã ɓɛvɔ yusẽtɛ; i vɔsinɛ ɓa suu gbete au yuu monɛni ɓa. 6 Naa suu gbete jo kuki yuu ɓa, yɛ zɛ nɔɔtɔ u yee suyuutɔ. A ɔ̃tɛ viyusẽ soro u moo yuurɛ ko u yeu suyuurɛ, u kuki yuutɔ. 7 Ji kɔri ɓa vɔshɔ u kuki yuutɔ ɓa, ukɔ ɔ̃rɛ naa Ɗalapa jasuru au bassinɛni. Ama soro bassi ɓɛjo ɓɛvɔ; 8 aru vɔshɔ shɔ jo pɛliu ɓa a soro kaa bi ɓa, ama soro shɔ pɛliu a vɔshɔ kaa bi. 9 Ko shɔu pɛli vɔshɔ aru soro, ama shɔ pɛli soro aru vɔshɔ. 10 Aru vigbete Ɗalapa jashonɛ a lapa, kɛɗɔn ɔ̃tɛ soro u maa salabutɔ a yuuni a nɔgbete yɛ tasi nɛu pɛ a ɓɛvɔ naa. 11 A shɔmni piti, u suru au Uɓeyelapa bi soro ji ɔ̃ ɓa a yɔbũ ɓa, ko vɔshɔ u ɔ̃ a yɔbũ ɓa. 12 Aru nagbete shɔ pɛli soro a vɔshɔ kaa bi, sɔ̃n ji nankɔ vɔshɔ pɛ soro yeurɛ; a ji Ɗalapa kɔ sɨ virɛ a suruni.

13 Ɔ yeerɔɔ yuu ruu pɛ ko kɔritɔ soro u gaki Ɗa a shɔ nɔɔ yuu wati u gaki Ɗa ɓa viwɔni au yuuni ɓa. 14 Aruviya, ɔ̃nɛ a koo matiu vi tɛttɔ nɛ vɔshɔ kɛ ɔ̃nɛ a suyuu rakini pɛ vi yusẽ, 15 ama pɛ a soro bi vi bi kɔrinɛ. U suyuu raki shɔ ãu nɛ u ɔ̃ viyuu kukinɛ. 16 Ama shɔgbete kɛ kasinɛ nɛn masi nya a rumni, vigbete n gelɔɔyɛ piti kpai ukɔ ɔ̃rɛ nɛ ko ɔ kasitɔ ko Ɗalapa wɛrɛyi ko i vilansiwɔ ɗɔn aɗɔ Ɗa bɛlinɛ ni ya?

17 A nya kɔsinɛm, n jo bɛlɔɔ ɓa nɛ aru ɔ ɗɔɔ̃nɛ basinɛ gbete ɔ pɛliyɛ lɛsi vi batɔ tɛu tɔ̃rinɛtɔ. 18 Au gaanɛ, shɔ gelinɛ a tete gbete ɔ musi nya yɛ, nɛ yuu vɔsi nɛ awɔ tetteni; a shɔm n ã tɔ̃vɨntɛ a gãsi ni pɛ nizɛ. ( 19 Nya maasinɛ ɓa shɔyɛ kpaa yuu vɔsinɛtɔ awɔ tetteni aru gbete shɔu zɛ shɔ tɔ̃vɨn yi tɔ awɔ tete ni.) 20 Naa ɔ ɔ̃nɛ a ɗɔɔ zɔ kn gbete, ɓa ukɔ ɔ̃rɛ Uɓeyelapa vi shaanɛ gbete ɔ shaayɛ ɓa. 21 Aru ɔ kɛ shaanɛ, ko-piya u yɛ ɗekɨn au vishaanɛ ni, aru gbete si shɔwɔ nwɔ siutɔ shɔwɔ ma si ɓoo miitɛ bang. 22 Ɔ wɛrɛ vishaanɛ ɓaya gbete ɔ yɛ shaavi aɗɔn a ɓoorɛ ɓaya? Ko ɔ bɛ̃ɛ̃ Ɗalapa wɛrɛ nɛ ruugbete nɛi pɔ̃ shɔgbete ai kasi yɛ a yusẽe ya? Ɔ kasi nɛ n gelɔɔ kɛnɛ ivi a rumni viya? N bɛlɔɔ kɛtɔ ya? N yɛn bɛlɔɔ ɓa! 23 Aru n tɛ vigbete n matɔɔmi pɛ a Ɗalapa naa: nɗa Uɓeyelapa Yesɔ, a zɨba gbete shɔ mɛliu yɛ, tuu borodirɛ, 24 a dɔ̃ri Ɗalapa rɛ, a dalirɛ, a shanɛ,<< Shɔm pɛ n bi, gbete shɔ ã awɔ yuu. Ɔ pɛli nankɔ aru sisɨn kpaa nɛ ang bi.>> 25 Sɔ̃n ji nyabankɔ, a knti vshaanɛ a tuu mii inabiirɛ a yɛti kɔpi a shanɛ,<<Kɔpim pɛ Ɗalapa ruu sɔɔ gbete maa yɛ, shɔ rɛu nyatɔ ang kpaa. Ko ɔ ɓoo ɗaviya, ɔ pɛli nankɔ aru sisɨn kpaanɛ ang bi.>> 26 Vim ukɔ ɔ̃rɛ kopiɗaviya ɔkɛ shaa borodim nɛ ɔkɛ ɓoonɛ a kopi mi si ɔ nwa ruu Uɓeyelapa vɔnɛtɛ se legbete sɔyɛ. 27 Vigbete au gɨn shɔm yɛ, naa ɔkɛ shaa borodim nɛ ɔkɛ ɓoonɛ au kɔpim a nyaba gbete ɓa tɔ̃ ɓa si ɔ pɛli Uɓeyelapa ruuvinitɛ au bi au kpaa ni. 28 Kɛɗɔn ɔ zɛwɔ yuu pɛjitɔ a ɗekɨn ni, nɗa ɔ shaa borodiu rɛ ɔ ɓoo kɛkn a kɔpiu ni. 29 Aru naa ɔ ji kpaa sisɨn ɓa a Uɓeyelapa bi ni ɓa aɗagbete ɔkɛ shaa borodiu nɛ a ɓoo a kɔpiuni, si ɔ n-tiwɔ yuu ruu yeenɛtɛ awɔ yuu naa ɔkɛ shaanɛ ɔkɛ ɓoonɛ yɛ. 30 Arugbetekɔ shɔzɛ waanɛ i bi vɔrɛ a ri vɔrɔrɛ, shɔwɔɔyi vɔtɛttɔ. 31 Naa ukɛ zɛu yuu pẽnɛtɔ, u yɛ shi-shi ɓa a Ɗalapa ruu yeenɛ ni ɓa. 32 Ama Uɓeyelapa yeeriu shɔ ruu tɛttɔ a yusho gɔ̃nɛ ni gboti, aru viya shɔ nyɔurɛ a shɔ kotipiyi ni ɗɔɔzɔ. 33 Kɛɗɔn masayi, naa ɔkɛ toli zɔ nyanɛ nɛi shaa Uɓeyelapa vishaanɛ, ɔ gaa zɔtɔ. 34 Naa shɔwɔ awɔ tete kɛ nta nwɔnɛ u shaa vishaanɛ a wɛrɛ, u a ɗɔɔ nya tolinɛrɛ aru viya ɔ nya tolinɛ yɛ n-tiwɔ Ɗalapa ruu yeenɛrɛ a yuu a ɗɔɔ nya tolinɛni. Naa aru shɔgãsiyi, n yɛn vɔsiyitɔ nɗan kaanɛ yɛ.