1 N shɔ ɔrinɛyi, ɔkɔɔ ã sisɨnnɛ a shɔgbete i gelɔɔnɛ i Ɗalapa suru ɗɔni piti kpai, ama ɔ ntai sisɨn pɛtɔ ko i suruu shɛ a Ɗalapa ɗɔbii. Aruviya janyagadi nyeenɛ i raa koo tɛttɔ piti kpai. 2 N jo nogbete ɔyɛ zɛyɛ ko Suruwu pɛ Ɗalapa Suru ko ɓau ɓɛɛ ɓa: Shɔgbeteu kɛ shanɛ nɛ Yesɔ Kirisi shɛ arɛ a kotipim naa shɔzɛ u a Ɗalapa Suruni au bi. 3 Ama shɔgbeteu kɛ masi nyanɛ a Yesɔ yuu, u Ɗalapa Suru ɓa, Suru au a wuniyɛ pɛ suru kɔ̃linɛ ɔ ntanɛ yɛ atɔ, u dɔdɔrim yɛm atɛtɔ a kotipim gboti.

4 Ama majaayi, n shɔ ɔrinɛyi, Ɗalapa sharɔtɛ a shɔ nyazɔ̃ nya waanɛmiyi yuuni, aruviya suru gbete ɔ wuniyɛ u kaka tɛɛ shɔ kotipimiyi ɓɛɛ tɛttɔ. 5 Janyagadi nyayeenɛ wayi i nwanya ɓɛɛjo ayuu vi kotipiyikɔ, shɔ kotipi i weshotɔ ai nyani aruviya i pɛ kotipi ɓɛɛ. 6 Ama upɛ Ɗalapa ɓɛɛ, shɔgbete kɛ ɔ̃nɛ Ɗalapa ɓɛɛyɛ weshotɔ au nyani; jo nyabankɔ u zɛ shɔgbete i suru tɔ̃vɨn ɗɔnyɛ a shɔgbete i suru kɔ̃linɛ a ɗɔnyɛni.

7 N masa ɔrinɛyi, u ɔri zɔtɔ, aruviya ɔrinɛ shɛ a Ɗalapa ɗɔbii. Shɔgbete kɛ ɔri zɔnɛ upɛ Ɗalapa jaa, zɛ Ɗalapa niitɛ. 8 Shɔgbete au ji ɔri zɔ ɓa, ji zɛ Ɗalapa ɓa ko fɛ̃ɛ̃, aruviya ɔrinɛ Pɛ Ɗalapa ɓɛɛ. 9 N jo nogbete Ɗalapa tasiu yɛ nɛn ɔriutɛ: shou jagbete a kotipim, aru u kpaa suru au kabii. 10 Shɔmpɛ nogbete ɔrinɛ ɔ̃yɛ: ɓanɛ ukɔu ɔri Ɗalapa rɛ ɓa, ama ukɔɔ ɔriu jo, a shɔu ɓɛɛ jaa nɛu ɔ̃ nyaba a shɔ yaasiu ruuviniyɛ.

11 N masa ɔrinɛyi, Ɗalapa kɛ ɔriunɛtɔ nankɔ fɛ̃ɛm, ukɔma u ɔri zɔtɔ. 12 Aru shɔwɔɔ ji zɛ Ɗalapa ɓa shãɓa, ama ukɛ ɔri zɔnɛ yɛ ɓassiyutɔ aukɔ ni, u ɔrinɛ yɛ ɔ̃ a ukɔni piti. 13 U zɛtɛttɔ u ɔ̃ ɔ̃nɛ yuɓassinɛ a Ɗalapa ni ukɔma ɓassiyutɔ a ukɔuni, aruviya ãu u Suru tɛttɔ. 14 U zɛtɛ u shitɛ au yuuni, nɛ Ɓɛyɛu sho ɓɛɛ jaa nɛ ukɔu ɔ̃ shɔ-shɔraanɛ a kotipim. 15 Ukɛ ɓɛli nyanɛ ukɛ shanɛ Yesɔ pɛ Ɗalapa jaa, au ɔ̃nɛ u ɓassiyutɛ a Ɗalapa ni ukoma ɓassiyutɛ jo a wukɔni.

16 U au yuu u zɛ sɔ̃n tɛttɔ tɔ̃vɨn nɔgbete Ɗalapa ɔriuyɛ.

Ɔrinɛ pɛ Ɗalapa ɓɛɛ, shɔyi ɔ̃ ɔ̃nɛ ɔrinɛ yɛ i ɓassiyutɛ awuni, ukoma u sɔ̃n jo ayini. 17 Ɔrinɛ yɛ ɔ̃ tɛpɛ-tɛpɛ a nogbete uyɛ kpaa shinɛ a Ɗalapa ɗekɨn a leeruu yɛnɛyɛ; uyɛ kpatɔ aruviya u suru a koo tipim naa Yesɔ ɓɛɛ. 18 Seti ɓa a ɔrinɛni ɓa; ɔrinɛ tɛpɛ-tɛpɛ yiki seti kati kai. Ɔrinɛ ɔ̃ ɓa tɛpɛ-tɛpɛ a shɔ seti ɗɔbiini ɓa, aruviya setikɔ n ti yuusho gɔ̃nɛrɛ.

19 U ɔri zɔ, aru Ɗalapa kɔ gau ɔrinɛrɛ. 20 Ukɛ tɔnɛ u ɔri Ɗalapatɛ, ama ukɛ bɛ̃ɛ̃ zɔ gãsiyinɛ siupɛ shɔ nyazɔ̃yi. Shɔgbete u ai ɗɔ zɛnɛ u ji ɔriyi ɓa, u yɛ ɔri Ɗalapa shɔgbete au ji zɛu ɓa shãɓayɛ kɛpikoviya? 21 Shɔmpɛ nyaãsinɛ a Yesɔ ãsiyɛ nɛ: Shɔgbete au kɛ ɔri Ɗalapa nɛ ɔ̃riutɛ kaka jazɨn akɔrɔ u ɔri shɔwɔyi sɔ̃ntɔ.