1 U beerɔɔ vi ayuu ruu au ã suruyɛ, a gaanɛ ruu siɗɔn. U nta tɛttɔ, u zɛtɛ au nɔɔni; nizɛ kɔ u zɛtɛttɔ, u naa ɗitɛttɔ. 2 Shɔ tasiu Suruu tɛttɔ, u zɛtɛ au nɔɔni, aru nankɔ u nwarɔɔ nyakɛkɨn ayuu Suru gbete sɔ̃nyaɓayɛ au si a Da a kolapa shɔtasiu dɔdɔrim kɛtɛ. 3 Vigbeteu zɛyɛ, au ntayɛ u gelɔɔ sɔ̃njo ukɔ, nogbete ɔ ɓasiyuu a ukɔɔni a nyaba gɨnnɛ gbete u a ɓuzɨn au Da, a ɓɛɛjaa Yesɔ Kirisini. 4 U bee vim aru u sisɨn puru u fɛ̃ɛm.

5 Dɔdɔrim ruugbete u nta a ɓɛɛjaa nya au shanɛ: Ɗalapa kɔ ɗɔsẽsẽ, ɗɔkɨnri ɓau biini ɓa ko fɛ̃ɛ̃. 6 Ama ukɛ tɔnɛ u ɓasiyuutɛ awuni, u sɔ̃n ɗɔgbete u ra a ɗɔkɨnriyɛ, siu yeenyatɛ au vi shanɛni a u vi shonɛni. 7 Ama naa ukɛ ɔ̃nɛ a ɗɔ sɛ̃sɛ̃, ji naa u pɛ ɗɔ sẽsẽm, siu ɓasiyuutɛ a zɔni, ɓɛjaa Yesɔ kpaa sɔkiutɛ piti kpai a ruuvini.

8 Ukɛ tɔnɛ nɛu ruuvini ɓa yuuni ɓa, u ɗakiu yuutɛ, siu tɔ̃vɨn shanɛ ɓa. 9 Ama ukɛ shau ruuvini a Ɗalapa ɗekɨn, upɛ shɔ tɔ̃vɨn, uɓa shɔ yuu lakinɛ ɓa, yɛ yaasiu ruuvinitɔ yɛ sɔkiu vikɔ̃linɛ au pɛliyɛtɔ piti kpai. 10 Ukɛ tɔnɛ u ji pɛli vikɔ̃linɛ wɔɔ ɓa, siu risi Ɗalapatɛ shɔ nyazɔ̃, siu ruu ɓa au sisɨn niɓa.