1 N shɔ ɔrinɛ masayi, shom pɛ n sẽkoo ang pɛsɔɔ beerinɛ. A yɛti sẽkoo ziti piti n beerɛ n kpaarɔɔ sisɨn, n kasirɛ n masɔɔbii ɔ lɛritɔ a nyaba tɔ̃vɨn. 2 N kasirɛ ɔ kpaa sisɨntɔ aru vigbete janyagadi wɔsɔ-wɔsɔyi nwarɔɔ si tɛ̃ɛ-tɛ̃ɛyɛ, ɔ kpaa sisɨntɔ a nyaãsinɛ gbete Uɓeyelapa a shɔ-shɔraanɛ gelɔɔ au jashonɛyi nyayɛ. 3 A vi piti, nkɔ vigbete ɔ̃rɔɔtɛ kaka jazɨng akɔrɔ ɔ zɛtɔ yɛm, a leegbete koyisinyayɛ shɔnyaãnɛ i yɛ atɔ, i ntalɔɔnya, i latiwɔrɛ i gɨn ɓɛɛ jo i vikɔ̃linɛ ai kasiyɛ. 4 I yɛ shanɛ, <<Yesɔ ji gelɔɔ ɓa nɛn yɛ sɔɔtɔ ɓaya? Ukɛ piya? U ɓɛuruyi vɔ dijo tɛ̃ɛ̃tɛ̃ɛ̃, ama vi doodijjo nagbete si jo a ɗagbete koo shɛyɛ!>> 5 I bɛ̃ɛ̃ kasinɛ ji ai zɛnɛ nɛ Ɗalapa kɔ ãsinyarɛ koo shɛkɛkɨn, u nya shanɛkɔ vɔsi kotipirɛ a miini ama mii kɨntiurɛ atette, 6 si sɔ̃njo a miikɔ, Ɗalapa lɛsi koo gbete a kntirɛ, mii kolapa ukɔ lɛsi koorɛ. 7 Ama kolapa a kotipim Ɗalapa nyaãsinɛkɔ sãyirɛ, nogbete shɔyɛ lɛsi a yaa. Shɔ yaayi pɛtɔ se leeu shɔyɛ yeeri shɔyi gɨn Ɗalapa ɓayɛ ruu, shɔ yɛ lɛsiyi kɛkn. 8 Ama n shɔ ɔrinɛ, masayi, ɔkɔɔ suki vi gbete n yɛn gelɔɔ yɛnɛ. A Uɓeyelapa kabii lee gbete a saa laazɔrɔ waanɛ u vɔsinɛ ɓa; saa laazɔrɔ naa lee gbete au biini. 9 Ɗalapa vɔsibii ɓa a viu manɛn pɛliyɛni ɓa, nagbete shɔwɔyi ji zɛ ɓayɛ, ama u sisɨnmɛɛnɛ aɗɔn aruviya ji kasi ɓanɛ shɔwɔ u lɛsirɛ ɓa, kasinɛ kopiya u yaa ruuvini pɛlinɛtɔ.

10 Ama Uɓeyelapa u lee anɛ yɛ ɔ̃ naa ɓɔɔ. A leeukɔ kolapa yɛ kaa nyaa a gãgãni u nirɛ, vi kolapa kpai shɔ yɛ lɛsitɔ a yaa, vigbete a kotipi kpai i yɛ niitɔ. 11 Ɔ zɛtɛ shɔyɛ lɛsi vitɔ piti kap, ɔ yɛ ɔ̃kɛpi zɔng shɔzɛ ɗɔpiya? Ɔ ɔ̃nɛ u ɔ̃ wɔsɔ-wɔsɔ ɔ ɔ̃ shɔ Ɗalapa bassinɛ a sisɨn gbete, 12 Naa ɔ ɗɔgbete ɔ ɔ̃ ɔ̃nɛ sisɨn pɔ̃nɛ leegbete Ɗalapa yɛ a yɛ, ɔ pɛli vitɔ̃vɨng aru leeu u a nagbete, a leeukɔ yaa yɛ lɛsi kolapa rɛ, yaa shɛ̃shɛ̃ yɛ kã vi ai a kolapatɔ. 13 Ama u ga pɛ vigbete Ɗalapa mayɛ: kolapa sɔɔ a kotipini, shɔ Ɗalapa gɨnnɛ ai pɛli vitɔvɨng yɛ ikɔyi yɛ ɔ̃rɛ a ɗɔnni.

14 Aru nankɔ masayi, naa ɔkɛ ɔ̃nɛ, ɔ̃nɛ kolapa sɔɔ ganɛ ɔ mabiitɔ ɔ pɛli vitɔ̃vɨng ɔ ɔ̃ ɓa shɔ ruuvini a Ɗalapa ɗɔbi ni ɓa. 15 U zɛ Uɓeyelapa sisɨnmɛɛnɛm, u ɔ̃riukɛ nyaba au ãunɛ u kpaa naraanɛyɛ, ji nagbete u ɓesa ɔrinɛ Bulus, beerɔɔ yɛ, pɛli vishonɛ a sẽrẽ gbete Ɗalapa ãuyɛ. 16 Bulus bee jo nankɔ au sẽkooni piti, nwanya jo ayuu vigbeten gelɔɔnkɔ. U sẽkoou kpetekpete shɔ zɛ ɓa pɛlaani ɓa, Shɔgbete ai vizɛnɛ ɓa bang ɓa i rii dɔɔruutanɛtɔ, nagbete i pɛli a gãsi laabeenɛ Ɗanyaruubiini yɛ. Aruukɔ i n-tiyi yuu lɛsinɛrɛ.

17 Aru nankɔ masa gbete n ɔriyiyɛ, ɔ zɛvimiyi tɛttɔ gboti, ɔ shidɔɔkaziti aru shɔgbete i gɨnnɛ Ɗa ɓa nyaba tɔ̃vɨn ɓa i yɛ ɗakiwɔrɛ ɔ yaa nyaba tɔ̃vɨn rɛ. 18 Ama ɔ yɛ ɗekɨn a vizɛnɛ a tɔ̃vɨn shonɛ au Uɓeyelapa a shɔ-shɔ raanɛ Yesɔ Kirisi vishonɛni. Bassinɛ pɛu ɓɛɛkɔ dɔdɔrim yɛnɛ ɗekɨn dangdang! Nankɔ.