1 Ama si tɛ̃ɛtɛ̃ɛ shɔmala nyazɔ̃yi shɛtɔ a shɔ tetteni, ji nagbete shɔmala nyazɔ̃ i yɛ ɔ̃tɔ awɔ teteniyɛ. I yɛ matishɔvi nyazɔ̃ a Ɗalapa yuu, ama atette ɓusinɛ i yɛ n ti shɔ vimatinɛ au yɛ lɛsi shɔ yɛ. I yɛ bẽẽ Uɓeyelapa a shɔwɛrɛ shɔgbete vɔ ai yuu ruuvini yɛtɔ. Aru nankɔ i yɛ ɔ̃ ɓa ɗɔkɔkɔ ɓa i yɛ lɛsi i yuutɔ. 2 Shɔzɛ waanɛ i yɛ gɨn i vipɛlinɛ ruuvintɔ, shɔmiyi i yɛ pɛli jo vikɔ̃linɛ shɔmala nyayeenɛ i pɛliyɛkɔ. i yɛ pɔ̃rɛ shɔu lɛri kɔ̃linɛ ayuu nyaba tɔ̃vɨn. 3 Shɔmala nyayeenɛ i yɛ ɗakiwɔrɛ i gelɔɔ ruu nyayeenɛ i tɛ virɛ awɔ naa. Ama si ji tɛ̃ɛ̃tɛ̃ɛ̃ shɔ yeeruu tɛttɔ ai yuuni, shɔu yɛ lɛsiyɛ u ɗɔgbete gai yɛ. 4 Ko Ɗajashonɛlapayi gbete i pɛli ruuvini Ɗalapa ji yaaiɓa lokiyi a wɛrɛ yaa, shɔ mayi dɔɔ a saagãnya a ɗɔkɨnri, i ɗɔgbete i ga dii gbete shɔ yeeruuyɛ. 5 A ɗagbete si tɛ̃ɛ̃tɛ̃ɛ̃yɛ Ɗalapa ji yaasi shɔgbete i gɨn Ɗalapa ɓa a kotipi ruuvini ɓa, n-tiu mii kolapa ai yuu; ama raa jo Nuhu kɔ sheeli, au nwari shɔ ruu tɔ̃vɨnyɛ a shɔwɔyini manzii. 6 Ɗalapa lɛsi tipi Sɔdom a Gumora ni a toi a yaa, a sɨnrɛ i ɔ̃ vitasinɛ vigbete yɛ kpaa shɔgbete i sisɨn Ɗa gɨnnɛ ɓayɛ. 7 Ɗalapa raa Loti, aru u sipɛ shɔ tɔ̃vɨn, loti yɔriyuutɔ fɛ̃ɛm aru vikɔ̃linɛ a shɔyi gɨn Ɗalapa nyaãsinɛ ɓa i pɛliyɛ. 8 Loti shɔ tɔ̃vɨn ama ɔ̃ atette shɔ kɔ̃linɛyi, ɓooraatɔ aɗɔ sɨnɛ a lee-lee aɗagbete zɛyi vikɔ̃linɛ ai shoyɛ. 9 Ama Uɓeyelapa zɛ nɔgbete yɛ raa shɔgbete i gɨn Ɗalapa yɛ tɛttɔ ai tete sisɨn ntanɛni, zɛ nɔgbete yɛ gɨn a shɔ kɔ̃linɛni yɛnɛ lee ruuyeenɛ, 10 Badijo shɔgbete i gɨn vi kasinɛ au shɛ nyaba ruuvini, i kasi ɓa nɛi ɔ̃ Ɗalapa nosisɨn ɓa, shɔmala nyayeenɛyi yuse ɓa, i yuɗenɛ aɗɔn, ama i bassi Ɗalapa vipɛlinɛ kolapa ɓa, i dãyi sɔ̃ntɔ. 11 Ko Ɗajashonɛlapayi ai yuu, shɔgbete i pɛ̃niba i tɛ shɔmala nyayeenɛyi tɛ fɛ̃ɛm, i jo dãyi ɓa a Uɓeyelapa ɗekɨn ni ɓa. 12 Ama shɔmiyi i shali vikɔ̃linɛ ayuu vigbete i jo zɛ ɓayɛ, i naa viɓiliyi ai lɛri ɓayɛ, ama i pɛli ɓɛɛ jo vigbete i kasi pɛlinɛyɛ, Ɗalapa yɛ lɛsiyitɔ naa viɓiliyi, i yɛ vɔtɔ. 13 Ɗalapa yɛ kɔsiyi nɔɔ jo zali a ruuvini gbete i pɛliyɛkɔ, shɔmala nyayeenɛyi i kasi ɓɛɛ jo vikɔ̃linɛ ɓoolinɛ a sɔrɔ pɛlinɛ a niti, gbete i yɛ nta tɔ̃vɨn a jazɛbiiyɛ, i naa vizizi au ɗii a fãrã puruyɛ, i ntayi tɔ̃vɨntɔ a ɗɔyi kɛ pɛli ruuvini nɛ au teteyɛ. 14 kopiɗaviya i kã ɓɛɛ jo su gbete i yɛ pɛli kpãntang ayiniyɛ; i yɔ ɓa a ruuvini pɛlinɛni ɓa. I ɗaki shɔgbete i sisɨn ãnɛni ji laki ɓa. I zɛnɔɔ vi kãnɛtɛ a shɔ naani. aru i vishonɛ i pɛli nankɔ Ɗalapa wiriyitɛ! 15 I yaa vitɔ̃vɨng pɛlinɛtɛ, i gɨn nyaba Balam, Beyo ɓɛɛ jaa, shɔu kasi nɛn kpaa nazã a vikɔ̃linɛ au pɛliyɛ. 16 Ama shɔ zãriu nyanwatɔ a ruuvini au pɛliyɛnɛ, u gãtola nwanya a shɔzɛ yeenya a zãri janyagadim u vishonɛ kɔ̃linɛ pɛlinɛrɛ.

17 Sɔmiyi naa jaaɓootiyi gbete mii ɓa ɗɔn ɓayɛ, i naa sabu gbete sɔrɔ n-tiyɛ. Aru gbetenkɔ Ɗalapa pɔ̃siyi ɗɔ ɔ̃nɛtɛ a ɗɔkɨnri gbikiri-gbikiri. 18 Shɔmiyi i basi yuu fɛ̃ɛm, i nwanya kɔ̃linɛyi fɛ̃ɛm, i kãnɛ shɔgbete i yaa ruuvini pɛlinɛ dootɔ sɔrinɛ a ruuvini. 19 I ma a shɔni nɛyiyɛyi kpaa ɔ̃nɛ yuutɔ, ama i ai yuu i pɛ foo a ruuvini pɛlinɛni. Aruviya shɔzɛ upɛ fooyi a vigbete sã yuuyɛni kpai. 20 Naa i ranaanɛ a ruuvini kotipi aru u zɛ Uɓeyelapa a shɔshɔraanɛ Yesɔ Kirisi nii, ama ikɛ sɔɔsɔ̃nɛ i ɗɔ ruuvini pɛlinɛ, shɔmiyi i lɛsinɛ tɛɛ gbete si kɨntitɔ. 21 Si ɔ̃riyi ntɔ a gbete isi jo zɛ tɔ̃vɨn pɛlinɛ ɓayɛ a kang gbete i zɛyɛni. 22 Vigbete kpaiyiyɛ tasinɛ ruɓusinɛ pɛ nizɛ: <<Zaa sɔɔ ɗɔ viu geyɛ ɗɛɛtinɛtɔ>> a <<Gãnya gbete shɔ sɔkiyɛ sɔɔtɛ yɛtɛ boliki bitɛ a tɔ̃pɔ̃.>>