1 Sekoom shɛ ang naa nkɔng Siman Bituru, Yesɔ Kirisi jawɛrɛ au jashonɛ.

Yɛnɛ shɔgbete i tɛ sisɨn ãnɛtɛ naa u tɛ siyɛ sisɨn gbete, ɔ tɛrɛ aru u Ɗalapa a shɔshɔraanɛ Yesɔ Kirisini i pɛli vitɔ̃vɨng tɛpɛ-tɛpɛː 2 Mɛnɛ tɔ̃vɨn pɛlinɛ a ɔ̃nɛbiinyatɔ̃nɛ u ɔ̃ ɔ ɓɛɛ ɗɔrɔrɔ aka Ɗalapa zɛnɛ a Yesɔ Uɓeyelapa.

3 Ɗalapa au tete kaka bi ãu vigbetete u kãyɛtɛ piti au yɛ tesi shɔ ɗekɨn au nyaba gɨnnɛ, u kpaa vim zɛnɛ aru u zɛ Ɗalapa au lɔuyɛ tɛttɔ, lɔurɛ aru u bassiutɔ a tɔ̃vɨn shonɛ. 4 Ji nyabankɔ tasiu u ruu pɛ̃niba au ma a ukɔunitɛ, pɛli nankɔ aru u kpaa jo au tete vipɛlinɛni, aru u kpaa naranɛ atette ruuvini kotipi, au kpaa a nyaba gbɔgbɔ pɛlinɛyɛ. 5 Aru nankɔ aru ɔ ã sisɨn a Kirirsi bi ɔ ma sisɨn ɔ pɛli vitɔ̃vɨng awɔ sisɨn ãnɛni, awɔ vitɔ̃vɨng pɛlinɛ ɔ ɔ̃ a vizɛnɛni; awɔ vitɔ̃vɨng pɛlinɛ ɔ yɛ kpaa vizɛnɛtɔ. 6 Awɔ vizɛnɛ Ɗalapa ɔ ɔ̃ shɔ yuu sãnɛ; awɔ yuu sãnɛ ɔ ɔ̃ a sisɨnmɛɛnɛni; awɔ sisɨnmɛɛni ɔ kã ɔ̃nɛ Ɗalapa; 7 awɔ ɔ̃nɛ Ɗalapa ɔ ɔri zɔtɔ; ɔ ɔri kopiyatɔ. 8 Shom ji vitɔ̃vɨng awɔ yɛ pɛliyɛkɔ, ɔkɛ ɔ̃nɛ awuni fɛ̃ɛm yɛ pɔ̃wɔrɛ ɔ vishonɛ yɛ ɔ̃ tɔ̃vɨn a nyaba vizɛnɛ a Uɓeyelapa Yesɔ Kirisi ruubiini. 9 Ama ɔ ji ɔ̃ ɓa awuni ɓa, ɔ naa shɔgbete ai zɛ ɗɔ ɓayɛ, aru i nɔɔgbãti, i suki tɛttɔ nɛ shɔ sɔɔkiyi ruuvini ai pɛli a kɨntitɛ.

10 Aru nankɔ masayi, ɔ mabiitɔ fɛ̃ɛm ɔ tasirɛ nɛ Ɗalapa lɔwɔ nɛn raawɔtɔ. Ɔ mabiitɔ fɛ̃ɛm u tasinɛ ukɔ lɔwɔrɛ, ɔkɛ pɛlinɛ ɔ yaawɔɔ sisɨn ãnɛ ɓa. 11 A nyabankɔ Ɗalapa yɛ tɛwɔ naatɔ a lakpati gaanɛ au sɔ̃nyaɓayɛ dangdang. Pɛ Uɓeyelapa Shɔ-shɔraanɛ Yesɔ Kirisi lakpati. 12 Kopiɗaviya n yɛn kpaarɔɔ sisɨntɔ a ruu vimiyini, ruu tɔ̃vɨn awɔ tɛ miyi ɔ kpaau gɨn-gɨn tɛttɔ fɛ̃ɛm ko ɔ zɛtɛ n yɛn kpaarɔɔ sisɨn tɔ a vimni. 13 Ang zɛnɛ pɛ tɔ̃vɨn n yɛn yɛɗekn awɔ sisɨn kpaarinɛnitɔ, n kɛ ɔ̃nɛ a suruni. 14 N zɛ tɛtɔ n yɛ ɔ̃ ɓa dɔkɔkɔ ɓa n yɛn vɔtɔ, nagbete Uɓeyelapa Yesɔ Kirisi gelinyɛ wasa-wasa. 15 N yɛn mabiitɔ n kã nyaba ang kpaarɔɔ sisɨn ang knti vɔnɛ ayuu ruumiyini kopiɗaviya.

16 A ɗagbete u gelɔɔ nɔgbete Uɓeyelapa Yesɔ Kirisi ruu gbete yɛ a yɛ a kakani, ɓanɛ u sha ruuɓere a viu geliyɛni ɓa, u zɛu bassinɛ ji au nɔɔ. 17 U si ji ɗɔukɔ aɗagbete Ɗalapa Da ãu banɛ a bassinɛni, Ɗalapa yeenya e bassinɛ pɛ̃niba, <<Shɔm pɛ n jaa ɔrinɛ, bitɔ̃nyatɔ awuni waanɛ.>> 18 U au yuu u nta yeenya shɛ a kolapa, aɗagbete u si awuni a kɔpɔ au wɔsɔ-wɔsɔ.

19 U ã sisɨntɛ fɛ̃ɛm a ruu gbete janyagadi i nwayɛni. Yɛ ɔ̃rɔɔ vitɔ̃vɨng ɔkɛ weshonɛtɔ ɗɔn, aru i nyanwanɛ pɛ naa yaa sẽwa au kɔli a ɗɔkɨnri, ɔ yaatɔ kɔlinɛ sẽwa nogadi u ɓɛsɔɔwɔ yaa a sisɨn. 20 Ayuu vimiyi piti kpai, ɔ kpaa sisɨntɔ shɔwɔ yɛ zɛnɔɔ dɔɔɓa u tadɔɔ laabeenɛ Ɗanyaruubii a janyagadi shayɛ a ɗekɨn ɓa. 21 Aru Ɗanyaruubii gbete janyagadiyi nwayɛ u gɨnri ji shɛɓa a shɔzɛ naa leegbeteɓa, ama shɔzɛ isi jo a Suru Wɔsɔ-wɔsɔ nakɔ aɗagbete ikɛ nwa Ɗa nyaruubii gbete shɛ a Ɗalapa nyayɛnɛ.