1 Shɔm pɛ ruu nizɛ au shɔ shayɛ nɛː kopiya kɛ tɔnɛn kasi yupɛ̃ni wɛrɛ Ɗa ɔ̃nɛ, pɛ tɔ̃vɨn u pɛli vi tɔ̃vɨn tɛpɛ-tɛpɛ. 2 Yupɛ̃ni Wɛrɛ Ɗa ɔ̃riutɛ kaka jazɨng akɔrɔ u ruuvini u ɔ̃ ɓa; ɔ̃tɛ kaka jazɨng akɔrɔ u so u ɔ̃ gbete, u ɔ̃ shɔu nta shɔ nyatɔyɛ, u ɔ̃ shɔ gbete sãu yuutɔyɛ, u ɔ̃ shɔgbete gɨn Musa nya-ãsinɛtɔ, ɔ̃riutɛ kaka jazɨng akɔrɔ au wɛrɛ u tɛ shɔzatiyi naatɔ; ɔ̃tɛ kaka jazɨng akɔrɔ u zɛnɔɔ shɔvi matinɛtɔ; 3 ɔ̃tɛ kaka jazɨng akɔrɔ u ɔ̃ ɓa shɔ vikɔ̃linɛ ɓoonɛ ko shɔ bawaanɛ ɓa ama shɔu ɔ̃ shɔk a ɔ̃nɛbiinyatɔnɛ; ɔ̃tɛ kaka jazɨng akɔrɔ u ɔ̃ ɓa shɔ saa kasinɛ ɓa; 4 ɔ̃tɛ kaka jazɨng akɔrɔ u zɛ nɔgbete yɛ gɨn au shɔwɛrɛyinitɔ tɔ̃vɨn, u pɔ̃rɛ u ɓɛɛ jaayi gɨn u nyatɔ i bassiutɔ kopinyaɓa shɔpiya. 5 Aruviya shɔ gbete ji zɛnɔɔ gɨnnɛ ɓa au shɔwɛrɛyini ɓa, yɛ zɛnɔɔ gɨnnɛ kɛpikovi a shɔ wɛrɛ Ɗani viya? 6 Ɔ̃tɛ kaka jazɨng akɔrɔ u sisɨn ãnɛ u lakitɔ, nɔgbete yuuɗenɛ yɛ pɔ̃u ɓa u to ɗɔ raaɓoonɛ u lɛsirɛ naa japɛ̃pɛ̃ɛ̃ lɛsiyɛ ɓa. 7 U ɔ̃ shɔ gbeteu bassinɛ aɗɔn a shɔ gbeteyi ɓa wɛrɛ Ɗa ni ɓa i ɗekɨn, nɔgbete shɔ yɛ ãuyusẽ ɓa, ukɔ nwesinɛ a tari gbete japɛ̃pɛ̃ɛ̃ ɗayɛ.

8 Shɔyi pɔ̃si shɔ wɛrɛ Ɗayi naa, ɔ̃riyitɛ kaka jazɨng akɔrɔ i ɔ̃ sɔ̃njo shɔ vitɔ̃vɨng-yi pɛlinɛ, ɓa shɔ nyaziti ɓa; ɔriyitɛ kaka jazɨng akɔrɔ i ɔ̃ ɓa shɔ gbeteyi ɓoo mii inabi bang ko shɔ gbeteyi kuli shɔ nɔɔ aru saa ɓa; 9 ɔ̃tɛ kaka jazɨng akɔrɔ i sã vitɔ̃vɨng gbete sisɨn ãnɛ ɓɛlirɛntɔ, i sisɨn u geliyitɔ nɛ i ji pɛli ruuvini ɓa. 10 Shɔ gaapɛ shɔ ntayi pɛtɔ a ɗekɨn, i ji ɔ̃ ɓa a ruuvinini ɓa, kɛɗɔn i sã vishonɛ kɛkn. 11 I ɓesoyi ɔ̃tɛ kaka jazɨng ɔkɔrɔ i vipɛlinɛ u ɔ̃ tɔ̃vɨn, ɓa shɔ shɔwoonɛ ɓa; ama i ɔ̃ shɔyi sãyi yuutɔ a shɔ gbeteyi kopiya ãsisɨntɔ ai biini a vi piti kpai. 12 Shɔ naapɔ̃sinɛ wɛrɛ Ɗa ɔ̃tɛ kaka jazɨng akɔrɔ u ɔ̃ a so gbete sheeli, u zɛnɔɔ ɓɛɛ jaayi sãnɛtɔ au shɔwɛrɛyini tɔ̃vɨntɔ. 13 Shɔnaapɔ̃sinɛ gbete i pɛliyi vishonɛtɔ tɔ̃vɨn i nii ɔ̃ tɔ̃vɨn, i nwanyatɔ a kakani ayuu i sisɨn ãnɛ a Kirisi Yesɔ yuuni.

14 Nagbete n beerɔɔ sẽkoom yɛ, yɛ ɔ̃ ɓa dɔkɔkɔ ɓa n pɔ̃ sisɨn n awɔ ɗɔbiitɔ. 15 Ama n kɛ wariyunɛ, sẽkoom yɛ tasɔɔ nɔgbete u gɨn a wɛrɛ Ɗanitɔ, gbete ukɛ ɔ̃rɛ shɔ sisɨn ãnɛ ai gɨn Ɗalapa au suru aɗɔnyɛ, dɔjaa gbete sã tɔ̃vɨnyɛ. 16 Shɔwɔ yɛ tɔɓanɛn masinya nɔgbete u ruɓusinɛ pɛ̃niba ɔ̃yɛ au yuu Ɗalapani ɓa.

Shɔ-shɔraanɛ shɛ a shɔzɛ shɛ̃ɛ̃bii,

shɔ tasiu nɛu pɛ shɔ tɔ̃vɨn a suru,

Ɗajashonɛyi zɛurɛ.

Shɔ nwau ruubiitɔ a koo piti,

shɔ ãsisɨntɔ au bi a kotipini,

a shɔ tuurɛ yɛ kolapa.