1 Ko-piya kpai ai fooyi yɛ ɔ̃tɛ kaka jazɨng akɔrɔ i bassi i shɔwɛrɛtɔ ko-pi nyaba shɔpiya, nɔgbete shɔwɔ yɛ nwanya kɔ̃linɛ ɓa Ɗalapa nii ni ɓa au vimatinɛni. 2 Fooyi gbete i shɔwɛrɛyi a ɗɔnni i sɔ̃n shɔ sisɨn ãnɛyi ɓatɛ tasiyi bassinɛ fɛ̃ɛ ɓa aru nɛi ɓɛɛzɔ̃yi ɓa nɔgbeteyi si pɛli nam ɔ̃tɛ kaka jazɨng akɔrɔ i bassi i shɔwɛrɛyitɔ fɛ̃ɛm, aruviya shɔ gbeteyi shayinaa vishonɛ i pɛ shɔ sisɨn ãnɛyi, sɔ̃n shɔgbete shɔ ɔriyɛ, vim pɛ vigbete shɔ yɛ a masi shɔbiiyɛ. 3 Shɔ gbete mati shɔ vi totti au ji yɛ zɔɓa a vimatinɛ tɔ̃vɨn gbete Uɓeyelapa Yesɔ Kirisi matiyɛni ɓa 4 shɔmi u pɛ shɔ yubassinɛ, au zɛnɛ nɛn zɛvitɛ piti kpai ama ji zɛvi ko fɛ̃ɛ ɓa. shɔ ɗɔmiyi i vi ɓɛɛ jo nyamasinɛ ayuu ruuyi, vimkɔ n ti, gɨnkaanɛrɛ, bawaanɛ, dãnɛ, zɔ nii lɛsinɛyi. 5 A nyamasinɛ kopiɗaviya a shɔgbeteyi sisɨn shavi tɔ̃vɨn tɔkɨn ɓa, ai sisɨn nɛ Ɗalapa gɨnnɛ pɛ nyaba saa kãnɛ.

6 Ama pɛ vitɔ̃vɨng au ɗɔbiini u pɛli vigbete Ɗalapa ɔriyɛ, naa vigbete ãuyɛ teesiutɛ. 7 Aruviya u ji to kotipi ɓa viwɔɔni ɓa, naa u kɛ vɔnɛ u tuu viwɔɔ ɓa naani ɓa! 8 Aru nankɔ u kɛ ɔ̃nɛ a vishaanɛ a fãrãyini, teesi tɛttɔ. 9 Ama shɔ gbeteyi kasi vinaa kpaanɛ i nwesirɛ a shɔ sisɨn ntanɛ naa, a tari gbete shɔ kɔ̃linɛyi ɗayɛ vikasinɛ tottot, vikasinɛyikɔ ikɔyi yɛ gɔ̃irɛ anɛ nyaba lɛsinɛ. 10 Aruviya shɔ gbeteyi kasi saa bang i pɛli vi kɔ̃linɛ kopishɔpiyatɔ i kpaa saa rɛ. Shɔ gãsiyi i yaa vimatinɛtɛ ayuu Kirisi ni aru i kasi saa bang, i pɔ̃yi yuutɛ a raaɓoonɛ a nyaba tottot.

11 Ama mɔkɔ Timoti, a pɛ Ɗalapa ɓɛɛ, a yaa viwatɔ kpai a mabii a kã tɔ̃vɨn shonɛ, sisɨn ãnɛ, ɔrinɛ, sisɨnmɛɛnɛ, a yuurorinɛ. 12 A ɔ̃ shɔ bawaanɛ aru sisɨn ãnɛ, naa soja tɔ̃vɨn a nyasɨnyɛ, a sisɨn ukɔ vɔnɛ, a ã sisɨn a Ɗalapa bi a gɨunyatɔ aruviya Ɗalapa ɓaa a nyajo au yuukɔ, gbete a shitɛttɔ tɔ̃vɨn a sisɨn ãnɛni a shɔ ɗekɨn au yuuni. 13 N ãsaanya a Ɗalapa a Kirisi Yesɔ ɗekɨn, shɔgbete ã vi suruyɛ piti kpai, shɔ gbete u ɗɔ zɛnɛ, Yesɔ sha vi tɔ̃vɨntɔ aɗagbete Buntus Bilatu hɨliu ruuyɛ 14 a gɨn nyaãsinɛmtɔ naa a pɛli a sisɨn gbete yɛnɛ lee gbete Uɓeyelapa Yesɔ Kirisi yɛ shɛyɛ. 15 Yɛ shɛpɛ alee gbete Ɗalapa lɔɔyɛ, Ɗalapa kɔ ɔ̃rɛ kpati gbete shɔ bɛliuyɛ sheeli, kpatiyi i kpati a Uɓeyelapayi Uɓeyelapa. 16 U kɔ sheeli vɔɓa, ɔ̃ a ɗɔsẽsẽ gbete shɔwɔ zɛnɔ anɛ ɓa ɗɔnni ɓa. Shɔwɔɔ ji zɛu ɓa shãani ɓa; shɔwɔɔ yɛ zɛunɔ zɛnɛ sɔ̃n ɓa, au kabiikɔ shɔ yɛ bassi Ɗalaparɛ, kopiɗaviya yɛ ɔ̃ shɔ gbete vi tɛu kaka ɓa dangdang! Nankɔ.

17 A ãsi shɔ gbeteyi vinaa aɗɔn a kotipim ɔ̃nɛni nya ikɔyi basi yunɛ, ko ikɔyi pɔ̃ sisɨn nɛi saa yɛ shoshiyi vishonɛtɔ piti kpai, ama i pɔ̃ sisɨn a Ɗalapa ɗɔbii, shɔ gbete ãu vitɔ fɛ̃ɛm aru gbete ntauyɛti purutɔ. 18 A kɔsinya nɛi pɛli vi tɔ̃vɨn, i vitɔ̃vɨng pɛlinɛ u shatɔ, i ɔ̃ shɔvi ãnɛ fɛ̃ɛm, i ɗɔgbeteyi pɔ̃si shɔwɔɔyi naa. 19 A nyabangkɔ i yɛ pɔ̃siyi yuu vinaatɔ au yɛ ɔ̃kɛ gɨngɨn ɔ̃nɛ a kolapa, Kɛɗɔn Ɗa yɛ shaariyi kɛkɨn a ɔ̃nɛ ganɛni.

20 Timoti mabii a pɛli vigbete Ɗalapa kɔsaanya naa pɛliyɛtɔ. A yaa ruukɔ̃linɛ nwalinɛtɔ a nyamasinɛyi gbete shɔwɔɔyi i ɓaanɛ <<Vizɛnɛni.>> 21 Aruviya shɔwɔɔyi tɛ vizɛnɛ nyayeelinɛm tɛttɔ, aru nankɔ i nii nyaba sisɨn ãnɛrɛ.

Ɗalapa tɔ̃vɨn shonɛ u ɔ̃ a ɔkɔɔni kpai.