1 Mɔkɔ Timoti majaa yɛ ɗekɨntɔ a kaka u ɔ̃ ɗɔn a nyaɓa Kirisi Yesɔ tɔ̃vɨn shonɛni. 2 Vimatinɛ gbete ɔ ntayɛ ang nwari shɔ a shɔshinɛkɨnti waanɛ i ɗekɨn ɔ tɛttɔ, n kasirɛ ɔ n ti shɔ sisɨn ãnɛ, shɔ gbeteyi i yɛ zɛnɔɔ shɔwɔyi vimatinɛ sɔ̃njiyɛ.

3 A ɓooraatɔ a ukɔni, naa Kirisi Yesɔ soja tɔ̃vɨn. 4 Soja gbeteu ɗɔ vishonɛ pɛlinɛ fɛ̃ɛm au kasinɛn yupɛ̃ni u bɛlintɔ vãsi vishonɛ pɛlinɛ ɓa naa tottoni ɓa. 5 Jinankɔ naa shɔwɔ kɛ pɔ̃ yuunɛ a shoshɛnɛni Ɗa yɛ sharuuɓa setɛ gɨntɛ jo nya-ãsinɛ shoshɛnɛukɔ. 6 Shɔjalanɛ au pɛlivishonɛtɛ fɛ̃ɛm ukɔ kpaa visha a shɔ gaa yeenɛ a jaa pɛjo. 7 A lɛripɛ a vigbete n ɗɔ shanɛm, aruviya Uɓeyelapa yɛ zɛnɔɔtɔ u pɔ̃saanaa a zɛ vim piti kpai.

8 Kopiɗaviya a kpaasisɨnpɛ a Yesɔ Kirisi bi, shɔgbete shɔ yusu a saa a suruni, u pɛ a Dauda laduru, ji naa gbete ruu tɔ̃vɨn gbete n nwarɔɔ mati shɔyɛ. 9 Aruviya n nwari shɔ ruu tɔ̃vɨn n ɓooraatɔ, shɔ mang a jaahɨm naa shɔ ruuvini. Ama Ɗanyaruubii shɔ mau dɔɔ ji ɓa. 10 Aru nankɔ ko-iviya n mɛɛsisɨntɔ aru shɔ gbete Ɗalapa lɔyiyɛ, nɔgbeteyi ikɔma i kpaa raanɛ jo aka Kirisi Yesɔ a bassinɛ gbete sɔ̃nnyaɓayɛni. 11 Shom pɛ ruu tɔ̃vɨn a shɔ shanɛ nɛ:

<<U kɛ vɔnɛ a ukɔni,

u yɛ ɔ̃ sɔ̃nji a ukɔni.

12 U kɛ yɛ ɗeknnɛ a sisɨnmɛɛnɛni,

u yɛ ɔ̃ sɔ̃njo lakpati a ukɔni nyazɔɔ

u kɛ masiunyanɛ nɛ u ji zɛu nii ɓa,

yɛ masiunya sɔ̃njo nɛn ji zɛu nii ɓa.

13 U sisɨn ãnɛ ji ɔ̃ ɓa,

U sisɨn ãnɛ ɓɛɛ aɗɔn

aruviya yɛ yeeriu yuu nya ɓa.>>

14 Timoti a kpaari shɔ sisɨn ãnɛ sisɨntɔ a vimni, a gɔ̃yi yushotɔ a Ɗalapa ɗekɨn ikɔyi waabanɛ ayuu ruuyini aruviya n ti shɔ vitɔ̃vɨng ɓa ama lɛsi shɔ gbeteyi wesho a ɗɔnnitɔ. 15 A pɛlivishonɛ fɛ̃ɛm nɔgbete akɛ tasaa yuunɛ a Ɗalapa ɗɔbii, yɛ shanɛ nnbee, a ɔ̃ naa shɔ vishonɛ au pɛlivishonɛ fɛ̃ɛm ntayusẽɓa au vishonɛni ɓa, shɔ gbete mati shɔ ruu Ɗalapa tɔ̃vɨn tɛpɛ-tɛpɛ. 16 Mɔkaa nwali ruu gbete a shɔ ntaseti ɓa a ruukɔ̃linɛ au pɔ̃rɛ shɔ bassi Ɗalapa ɓa, aruviya shɔ gbeteyi pɛli viwa i yiki shɔzɛ kpɛlɛ a Ɗalapa ɗɔbiini. 17 I vimatinɛm raaɗɔmɛɛli naa nɔrɔ bi au pũtɛ shaa biiyɛ. Shɔzɛ ziti ai mati shɔ vimi ikɔi ɔ̃rɛ Himeniyu a Filetu, 18 I yaa nyaba sisɨn ãnɛ tɔ̃vɨntɛ, i shanɛ Ɗalapa yusi shɔtɛ gboti a saani aru nankɔ i pɔ̃ shɔ sisɨn ãnɛyitɛ i yaa sisɨn ãnɛtɛ a Kirisi vimatinɛni. 19 Ama Ɗalapa dɔjaa u kaka aɗɔn fɛ̃ɛm zɨnti ɓa; a dɔjaankɔ Ɗalapa bee ruumrɛ nɛ:<<Uɓyelapa zɛ u ɓɛɛyɛ tɛttɔ.>> a <<Shɔ gbeteyi shanɛ nɛi pɛ Uɓeyelapa ɓɛɛ ɔ̃tɛ kaka jazɨng ɔkɔrɔ i yaa ruuvini pɛlinɛtɔ.>>

20 A wɛrɛ pɛ̃niba ɓariyi aɗɔn a piiyini tottot, gãsiyi shɔ pɛli tarimɛɛ a siliva, wɔɔyi a laawaati a tɔ̃pɔ̃; gãsiyi shɔ pɛli aru vishonɛ pɛ̃niba wɔɔyi aru jaa vishonɛ. 21 Vim ɔ̃ ji nankɔ a shɔzɛni, shɔ gbeteyi ikɛ sɔyi yuunɛ a vikɔ̃linɛni kpai, i yɛ ɔ̃ naa vigbeteyi shɔ lɔyɛyi aru vishonɛ pɛ̃niba aruviya ikɛ wɔsɔ-wɔsɔ shɔvi yɛ pɛlivishonɛtɔ awuni, aɗɔ pɔ̃nɛ aru ko-pi vishonɛ tɔ̃vɨn shopiya shɔ pɛlitɔ awuni. 22 A yaa vikɔ̃linɛyi gbete gãsi jakasa i kasi pɛlinɛtɔ, a pɔ̃ sisɨn a pɛli vitɔ̃vɨng, sisɨn ãnɛ, ɔrinɛ, a ɔ̃nɛbiinyatɔ̃nɛ, a shɔ gbeteyi ɓaa Uɓeyelapa nya a sisɨn gbete u pɔ̃siyinaayɛ. 23 Ama shɔu kɛ masinyanɛ ayuu vikɔ̃linɛ a vigbete ɓa viwɔ ɓa, a yuutɔ ɗɔn; a zɛ tɛttɔ yɛ yisinya a bawaanɛ. 24 Shɔ gbete pɛli Uɓeyelapa vishonɛ ɔ̃riutɛ kaka jazɨng ɔkɔrɔ u waaba ɓa, ama ɔ̃ shɔ tɔ̃vɨn a kopiya ɗɔbii, shɔmala tɔ̃vɨn au sisɨnmɛɛnɛ a ɗɔnni. 25 ɔ̃tɛ kaka jazɨng a ɔkɔrɔ u tɔ̃ri u shɔ nɔpɔ̃tɔ, aru wɔɔɓa Ɗalapa yɛ yaasi nyabatɔ i kɔsi sisɨn i yaa ruuvini pɛlinɛ i zɛ tɔ̃vɨn aru Kirisi. 26 Kɛɗɔn i kɛ sɔɔ kɛnɛ ai sẽrẽyini, i ranaa kɛkn a tari gbete shɔ-shɔɗakinɛ ɗayɛni, shɔgbete sãyitɛttɔ pɔ̃yitɛ i pɛli vigbete kasinɛ i pɛliyɛ.