1 Ɔ kpaasisɨntɔ a lee gbete koo yisinyayɛ shɔ yɛ ɓooraatɔ fɛ̃ɛm. 2 Shɔzɛyi yɛ ɔ̃ shɔgbeteyi kɔyi yuukɔ sheeli, shɔzɛyi i yɛ ɔ̃ shɔ saa kasinɛyi, i nwanya a vi pɛ̃niba gbeteyi pɛliyɛ, shɔzɛyi yɛ ɔ̃ shɔ yuuɗenɛyi, i yɛ ɔ̃ shɔ shɔ dãlinɛyi, shɔgbeteyi i bɛ̃ɛ̃ ɓeye a ɓiniyi nyagɨnnɛyɛ, i ɔ̃ shɔgbeteyi bassi Ɗalapa ɓayɛ; 3 shɔzɛyi yɛ ɔ̃ shɔ gbeteyi ɔri shɔwɔyi ɓa, i yɛ ɔ̃ shɔ zɔ sãnɛ a sisɨn, shɔ nyayeelinɛyi, shɔgbeteyi sãyi yuu dɔɔɓa, shɔgbeteyi i lɛsi shɔwɔyi sisɨnyɛ, i yɛ bɛ̃ɛ̃ vi tɔ̃vɨntɔ; 4 shɔgbeteyi mɛli i shɔbiiyi ai nɔpɔ̃yi naa, shɔgbeteyi i laaɓa yuuni ɓa, i yɛ pɔ̃ ai sisɨn nɛi tɛɛ shɔwɔyitɛ kpai; i yɛ ɔri ba vigbete i nta tɔ̃vɨn aɗɔn u tɛɛ Ɗalapa ɔrinɛtɔ; 5 a ɓili i tasi nɛi shɔ Ɗalapa bassinɛ, ama i bɛ̃ɛ kaka gaanɛ gbete yɛ tɔ̃riyi ɔ̃nɛ vipɛlinɛ kɔ̃linɛtɔ. Ɔkɔɔ radɔɔnɛ zɔng shɔɗɔmiyini. 6 Zɔ gãsiyi ai tetteni i toli shɔ wɛrɛ-wɛrɛ i ɗaki su gbeteyi kpɛ̃ ruu ɓayɛ, shɔ gbete ruuvini shayi kaka bitɛyɛ, zɔng vikɔ̃linɛ kasi totto sãyi yuutɛttɔ. 7 su ɗɔmiyi i mativitɔ kopiɗaviya ama i zɛ ruu tɔ̃vɨn ayuu Kirisi ɓa. 8 Ji nagbete Yannes a Yambres i masinya a Musa yɛ, ji nankɔ shɔmiyi masinya a ruu tɔ̃vɨn, shɔgbeteyi lɛrinɛ ɓɛɛ jo kɔ̃linɛ ai sisɨn ãnɛ ɓa. 9 Ama i yɛ ɗekɨn kpɛlɛ ɓa, aruviya i rãng pɛlinɛ shɔ yɛ zɛtɔ ji naa gbete shɔ zɛ Yannes a Yambres i ɓɛɛyɛ.

10 Ama mɔkɔ Timoti a zɛ vigbete n mati shɔ tɛttɔ fɛ̃ɛm, a zɛ nɔgbete n ɔ̃ yɛ tɛttɔ, a zɛn vigbeten kasi pɛlinɛ ang ɔ̃nɛ tɛttɔ, ang sisɨn ãnɛni, ang sisɨnmɛɛnɛni, n ɔrinɛ, ang sisɨnmɛɛnɛ dɔkɔkɔni, 11 A zɛ tɛttɔ shɔ tasin raatɛ a raaɓoonɛ gbete kpang-yɛni. A zɛ vigbete kpang a Antakiya tɛ, a Ikoniya a Listira, zɔng raaɓoonɛ gbete n ɓooyɛǃ Ama a shomni kpai Uɓeyelapa raantɔ a ɓuzɨn ni. 12 Shɔgbete kasi zɔng ɔ̃nɛ naa Ɗalapa ɓɛɛ aka Kirisi Yesɔ seetɛ shɔ tasiu raatɛ. 13 Ama shɔ kɔ̃linɛyi a shɔ-shɔɗakinɛyi yɛ pɛli vikɔ̃linɛ i ɗekɨnɗekɨn a pɛlinɛni u tɛɛ kaka. 14 Ama a yɛ ɗekɨn ɓɛɛtɔ a vitɔ̃vɨng gbete a matiyɛni, a ãsisɨn tɛttɔ nɛ pɛ nizɛ, aruviya a zɛ shɔ gbete a mati vi ai ɗɔbii tɛttɔ. 15 A kpaasisɨn tɛttɔ aɗagbete si adoo jujaa a zɛ labeenɛ Ɗa nyaruubi wɔsɔ-wɔsɔ yɛtɛ, au ãa sẽrẽ gbete pɔ̃rɛ a kpaa raanɛ aka sisɨn ãnɛ a Kirisi Yesɔ bi. 16 Laabeenɛ Ɗanyaruubii kpai pɛ ruu gbete Ɗalapa pɔ̃ a shɔ gbete beeyɛ sisɨn u vishonɛ aɗɔn, a nyaba shɔ ruu tɔ̃vɨn matinɛ, shɔ geli shɔzɛ nɛ vigbete i pɛliyɛ pɛ vikɔ̃linɛ, shɔ tɔ̃ri ruukɔ̃linɛyi, wɔsɔ̃n nyakɔsinɛ nɔgbete shɔ ɔ̃ ɔ̃nɛ tɔ̃vɨn yɛ, 17 nɔgbete shɔ Ɗalapa gɨnnɛ yɛ zɛnɔɔtɔ u ɔ̃ a vini kpai, u pɛli ko shɛ̃ɛ̃ vishonɛ tɔ̃vɨn shɔpiyatɔ.