1 Sẽkoom shɛ a Yɔhana naa, shɔ̃pɛni sisɨn ãnɛ n beeri Gaa yuu n shɔbii ang ɔriyɛ.

2 N shɔbii ang ɔriyɛ, n gaki Ɗa ɔ kpaa ɔ̃nɛbiinyatɔ̃nɛ awɔ vipɛlinɛ piti, nɔgbete n zɛwɔ-yɛ ɔ ɔ̃nɛ suru pɛ tɔ̃vɨn. 3 N nta sisɨn purutɔ fɛ̃ɛm aɗagbete gãsi Kirisayi arɛ i gelin nɔgbete a sisɨn ãnɛ ɗɔn fɛ̃ɛm aru vishonɛ gbete Ɗalapa tasaa yɛ, ji nagbete a ɔ̃ ɔ̃nɛ tɔ̃vɨn kopiɗaviyan kɔ. 4 Viwɔɔ yɛ pɔ̃ng sisɨn puru ɓa u tɛɛ nɔgbete n ntanɛ majaayi ɔ̃ ɔ̃nɛ tɔ̃vɨn ɓa.

5 N shɔbii n ɔriyɛ, a sisɨn ãnɛ aɗɔn fɛ̃ɛm a vishonɛ gbete a pɛli gãsi Kirisayiyɛni, badijo shɔzatiyi. 6 I geli shɔ sisɨn ãnɛyi tɛ ayuu ɔrinɛ gbete a tasiyɛni. Gbẽsẽ a yɛ ɗekɨn a shɔmalamiyi naapɔ̃sinɛni a nyaba e Ɗalapa nta sisɨn purutɔ yɛ. 7 Naa shɔmiyi ikɛ yɛ ɗɔ Kirisi ruubii nwanɛ nɛ i tɛ viwɔɔ ɓa a shɔyi ji ã sisɨn ɓa naani ɓa. 8 Aru nankɔ ɔ̃tɛ kaka jazɨng akɔrɔ u Kirisayi u pɔ̃siyinaatɔ, nɔgbete pɔ̃siyinaa ai vishonɛ Kirisi tɔ̃vɨn.

9 N beeri shɔ sisɨn ãnɛyi sẽkootɔ dɔkaa; ama Diyoteripi shɔ au kasinɛn si nkɔng ɔ̃ yupɛ̃ni u tɛɛ kopiyatɔ, bɛ̃ɛ̃ ruu gbete u shatɔ. 10 N kaanɛ n yɛn shɛshi vigbete pɛliyɛ a ɓili kpaiː ruu kɔ̃linɛ gbete nwa au yuuyɛ a nyayeeneyi au shayɛǃ Vigbete au tɛ kaka a ruum piti kpai ukɔ ɔ̃rɛ, ji tɛ Kirisayi naa ɓa aɗagbete i ayɛni, a zãri shɔyi kasiyi naatɛnɛtɔ, yikiyitɔ a shɔ sisɨn ãnɛyi ɗɔbiini!

11 N shɔbii n ɔriyɛ, mɔkaa matinɛ vishonɛ kɔ̃linɛ, ama a mati jo vishonɛ tɔ̃vɨn. Shɔ gbeteu pɛli vishonɛ tɔ̃vɨn u pɛ Ɗalapa ɓɛɛ, shɔ gbete pɛli vishonɛ kɔ̃linɛ ji zɛ Ɗalapa ɓa.

12 Kopiya nwanya tɔ̃vɨntɔ a Demitiriu yuuni; Au vipɛlinɛ kpai pɛli vigbete Ɗalapa tasiu nɛu pɛliyɛkɔ. Ukɔma u zɛtɛttɔ au nɔɔni, a zɛ vigbeteu shayɛ tɛttɔ pɛ nizɛ.

13 N vigbete n gelɔɔ aɗɔn fɛ̃ɛm ama n ji kasi beenɛ ɓa. 14 N pɔ̃ sisɨn yɛ ɔ̃ ɓa dɔkɔkɔ ɓa n yɛn kpaa wɔɔ zɛnɛtɔ u sharɛ u ɗɔ zɔ zɛnɛ,

15 Mɛnɛ Ɗalapa u pɔ̃rɛ ɔ ɔ̃ ɔ̃nɛbiinyatɔ̃nɛ.

Mɛsayi gee wɔɔ nyatɛ kpai. Ɔ gee u ɓasayi nyatɔ gbete gbete kpai.