Vitasinɛ ip Bulusi Sẽko yɛnɛ shɔ Kolosiyawayi bi, shɔ bee si yɛnɛ shɔ Kolosiyayi bi, a koomɔɔ gbete a jaa kaa gɨnri Afisawayi.Wɛrɛ Ɗami si ɓa gbete Bulus ɓɛliyɛ ɓa, ama si a ɗɔgbete Bulus shovi aɗɔnyɛ, naa sho shɔ vishonɛyitɛ a Afisawayi, shɔ Roomayi gaanɛ ɗɔɔ a tipi Asiya. Bulus ntarɛ nɛ shɔmala nyazɔ̃yi i a wɛrɛ Ɗa a Kolosiyawayi tipi aɗɔgbete i bɔ̃ɔ shɔyɛ nɛ shɔukɛ tɔnɛ nɛn kasi Ɗa zɛnɛ u kpaa raanɛ ɔ̃riutɛ kaka jazɨng a kɔrɔ shɔu gɨn vi lansi a shɔgbete i roo kpati a suruyɛ a shɔ kakayi. Shɔmalawi i sha wɔsɔ̃nɛ, ɔ̃ri ko-piyatɛ kaka jazɨng a kɔrɔ u gɨn nya ãsinɛ shaa yeenɛtɔ, nɛ ɔ̃ri shɔ wɔsɔ̃ntɛ nɛ shɔu gɨn nya ãsinɛ aru vishanɛyi a nya ãsinɛ gãsiyini. ip Bulusi bee vim aru gbete nɛn yisi yi nyazɔ̃ pɛ a Ɗalapa nyaruubii. Ruugbete shɛ au sisɨn yɛ nɛ Yesɔ Kirisikɔ yɛ ã shɔ naa raanɛrɛ, a shɔ gɨnnɛ gãsiyi shɔ ɗakiyiɓa i yau nyaba ɓam. A Kirisi kabiikɔ, Ɗalapa kɔri koorɛ, sɔ̃njo au kabiikɔ yɛ sɔri koo sɔ̃njo au ɗɔɔbii. Jo a kaa yuuɓasinɛ a Kirisini i pɔ̃nɛ sisɨnrɛ nɛ shɔ yɛ kpaa naa raanɛrɛ a koo. Bulusi shɛshi vigbete yɛ n ti yuu kɔnɛ pẽnɛba a shɔ sisɨn ãnɛyi tete ai ɔ̃nɛni. ip Ji kɔriɓa nɛ Tishikusi shɔgbete au tuu sẽkom a tipi Kolosiyawayi a n ti Bulus rɛ, ji kɔriɓa nɛ Onesimu kɔ si dɔ̃u dɔɔrɛ ɓa aruviya u sipɛ jafoo gbete Bulusi bee vi au yuuyɛ Filimon. iot Vigbete a ɓuzɨnyɛ Vitasinɛ Nogbete Kirisi vishonɛ sãyɛ 2.19) Suru sɔɔ gbete a Kirisi biiyɛ Yisinɛ.

1 Sẽkoom shɛ a Bulus shɔgbete Ɗalapa kasirɛ nɛu ɔ̃ Kirisi Yesɔ jashonɛ au ɓɛzɔ̃ Timoti naa

2 yɛnɛ Ɗalapa shɔbiiyi a komoo Kolosiya, shɔgbeteyi pɛ u ɓesa sisɨn ãnɛ aka yuɓasinɛ a Kirisini:

Mɛnɛ Ɗalapa u Ɓeye u ãwɔ tɔ̃vɨn shonɛ a ɔ̃nɛbiinyatɔ̃nɛni.

3 U dɔ̃ri Ɗalapa tɔ kopiɗaviya, naa ukɛ gaki Uɓeyelapa Yesɔ Kirisi Ɓeye nɛ awɔ yuuni. 4 Aruviya u ntawɔ ruu sisɨn ãnɛ tɛttɔ a Kirisi Yesɔ biini, awɔ ɔrinɛ gbete ɔ tasi Ɗalapa shɔbiiyini kpai. 5 Aɗagbete Ɗalapa nyaruubii, ruu tɔ̃vɨn, au gaa wɔ ɗɔbii anɛyɛ, ɔ nta ruu sisɨn pɔ̃nɛ gbete a ã shoyɛtɛttɔ. Aru nankɔ ɔ sisɨn ãnɛ a ɔrinɛni shi ayuu vigbete ɔ pɔ̃ sisɨn aɗɔnyɛ, shɔ pɔ̃sɔɔtɛttɔ kaali a kolapa. 6 Ruu tɔ̃vɨnmiyi au awɔ ɗɔbi sãti a koo kpai u ɗɔgbeteu n ti Ɗa susãri tasinɛ a shɔ abi, ji nagbete au pɛli si awɔ teteyɛ, yunɛ aɗagbete ɔ nta Ɗalapa tɔ̃vɨn shonɛ anɛ aɗagbete ɔ zɛ nɔgbete ɔ̃yɛni. 7 Ɔ nta Ɗalapa tɔ̃vɨn shonɛ a Ipafarasi nya, u jawɛrɛ au ɔriyɛ, shɔgbete au shoshi Kirisi vi a sisɨn gbete, aruviya u pɛ u janɔɔ. 8 Ukɔ geliurɛ nɛ Ɗa Suru ãwɔ zɔ ɔrinɛrɛ. 9 Aruukɔ sãnɛ aɗagbete u ntawɔ ruubiiyɛ, kopiɗaviya u gaki Ɗalapa tɔ awɔ yuuni, U gaki Ɗalapa u ãwɔ u vizɛnɛ au vishonɛni, a sẽrẽ vizɛnɛ gbete u Suru ã shɔyɛ kpaini. 10 Kɛɗɔn ɔ zɛnɔɔ ɔ̃nɛtɔ nagbete Uɓeyelapa kasiyɛni, ɔ pɛli vigbete kasiyɛ kopiɗaviya, ɔ ɔ̃nɛ yɛ n ti zɔn vitɔ̃vɨng gbete ɔ pɛliyɛtɔ kpai, ɔ banɛ yɛ ɔ̃ atette Ɗalapa ruuzɛnɛ. 11 U gaki Ɗa mɛnɛ ɔ lakikɔɔtɔ piti a kaka gbete shɛ a Ɗalapa ɗɔbiiyɛ, nɔgbete ɔ zɛnɔɔ sisɨnmɛnɛ a vigbete yɛ kpayɛni kpai a sisɨn puru 12 a dɔ̃ri Ɗalapa Uɓeyelapatɔ, shɔgbete au sɨwɔrɛ ɔ kpaa vigbete Ɗalapa pɔ̃si ɓɛshɔzɛyi au ɗɔɔ kpati roonɛ sẽsẽni. 13 A raurɛ a kpati ɗɔkɨnri naani a n-tiurɛ a ɗɔgbete u jaa ɔrinɛ roo kpatiyɛ, 14 au kabiikɔ u kpaa raanɛrɛ, kɛu ruuvini yaasinɛ.

15 Kirisi shɔgbete u zɛu au nɔɔyɛ ukɔ ɔ̃rɛ jasuru Ɗalapa gbete shɔ zɛuɓayɛ. Ukɔ ɔ̃rɛ jaamari vɔshɔ, au tɛɛ vigbete Ɗalapa shɛshiyɛtɛ kpai . 16 aruviya au kaa bikɔ Ɗalapa shɛshi vi a kolapa a kotipini kpai, vigbete a shɔ zɛyɛ a vigbete shɔ zɛɓayɛni kpai, piti a suru kakayini, jaɗayi kaka, a kpatiyi kakani. Ɗalapa shɛshi koo piti kpai au kabiikɔ au ruu yuukɔ. 17 Vipiti kpai i ɓɛɛ ɔ̃nɛ Kirisikɔ gaa ɔ̃nɛrɛ, aka yuɓasinɛ a ukɔni vigbete Ɗalapa shɛshiyɛ i kpaa ɔ̃nɛ tɔ̃vɨnrɛ. 18 Kirisi ukɔ ɔ̃rɛ yupɛ̃ni gbete sã shɔ sisɨn ãnɛyi, ji nagbete yuu sã jazɛbii piti kpaiyɛ, ukɔ ɔ̃rɛ jamari vɔshɔ au yuu a saa a suruni, aruviya a vipiti kpai ukɔu ɔ̃rɛ a ɗekɨn. 19 Aru Ɗalapa au yuu marɛ nɛn jaa kɔ yɛ ɔ̃ Ɗalapa shẽẽbiirɛ. 20 Aru nankɔ a ɓɛɛ jaa kabiikɔ Ɗalapa n ti vigbete shɛshiyɛ kpai au ɗɔbii. Ɗalapa n ti ɔ̃nɛbiinyatɔ̃nɛ aka ɓɛɛ jaa kpaa gbete ntee a laa gbete shɔ ɓaunaa aɗɔnyɛ, kɛɗɔn sɔri vigbete shɛshiyɛ au ɗɔbii kpai, vigbete a kolapa a vigbete kotipini. 21 A ɗagbete ɔsi kpɛlɛ a Ɗalapani ɔ sipɛ u shɔ nɔpɔ̃ɔ aru vikɔ̃linɛ gbete ɔ pɛliyɛ awɔ mati shɔyɛni. 22 Ama dɔdɔrim aka ɓɛɛ jaa vɔnɛ jazebiiyɛ, Ɗalapa pɔ̃wɔɔtɛ ɔ ritɛ ɓɛusayi, aru u pɔ̃rɛ ɔ ɔ̃ wɔsɔ-wɔsɔ, ɔ̃ wasak wɔsɔ̃n ɔ ɔ̃ ɓa a ruuvinini au ɗekɨn ni ɓa. 23 Ɔ̃rɔɔtɛ kaka jazɨng a kɔrɔ, ɔ shi dɔkaziti awɔ sisɨn ãnɛmni, ɔ̃rɔɔ sɔ̃ntɛ kaka jazɨng awɔ kɔrɔ ɔkɔɔ guli biinɛ a sisɨn pɔ̃nɛ gbete ɔ kpaayɛ aɗagbete ɔ nta ruu tɔ̃vɨn yɛni. Si jo aru ruu tɔ̃vɨnkɔ n biba Bulus n ɔ̃ jawɛrɛrɛ. Shom jo ruu tɔ̃vɨn gbete shɔ nwari ko-piya tɛttɔ kopiɗɔpiya a koo.

24 Dɔdɔrim n nta sisɨn purutɛ ayuu n raaɓoonɛ awɔ yuuni, a nyaba n raaboonɛ jazebiimkɔ, n pɔ̃naatɛ n yisinya vigbete yaa atette Kirisi raaboonɛ au nɔɔbii, kɛ shɔ sisɨn ãnɛyi. 25 Ɗalapa risinkɛtɛ shɔ sisɨn ãnɛyi, ukɔ ãng vishonɛrɛ nɛn pɛli awɔ yuu. pɛ vishonɛ gbete shɔ nwari shɔ Ɗanyaruubiiyɛ, 26 Pɛ ruuɓusinɛ gbete au ɓusi shɔ laduru kɨntiyɛ ama tasiu shɔbiiyi dɔdɔrim tɛ kpai. 27 Ɗalapa marɛ nɛn tasi u ruuɓusinɛ u shɔbiiyi zɛtɔ, ruuɓusinɛm pɛ vi pɛ̃niba gbete au ɓusiyɛ nɛn tasi shɔ kpai. Ruuɓusinɛm ukɔ ɔ̃rɛ Kirisi gbete awɔ biiyɛ, vim tasitɛ nɛ ɔ yɛ kpaa Ɗalapa basinɛtɔ. 28 Aruukɔ u nwari kopiya Kirisi nyaruubiirɛ. U gɔ̃ shɔ yushotɔ u matiyi vi a sẽrẽ gbete u a wuniyɛ kpai, u pɛli vim aru shɔgbete i kɛ ɓasiyunɛ a Kirisini kpai, i kpaa kaka i ɔ̃ a suruni naa u kɛ n tinɛ Ɗalapa ɗekɨn yɛ. 29 N ɓɛɛ vim kpaanɛ n pɛli vishonɛtɔ a ɗɔɔ nwanɛni, n shovi a kaka pɛ̃niba gbete Kirisi ãngyɛ au a ɗɔɔ vishonɛ ang biiyɛ.