1 Sẽkoom shɛ ang naa Bulus, shɔgbete n a jahm aru Kirisi Yesɔ, a Timoti u ɓɛzɔ̃ u aɗɔn a nkɔng ni,

N bee sẽkoom yɛnɛ u ɓɛsa Filimon u shɔvi shonɛ au ɗɔbii, 2 a Afiya u ɓɛnaa a Arikibu u ɓɛzɔ̃ vishonɛ sisɨn ãnɛ, a shɔ sisɨn ãnɛ ai gɨn Yesɔ shɔgbeteyi toli au wɛrɛyɛ.

3 Mɛnɛ Ɗalapa Uɓeye a Uɓeyelapa Yesɔ Kirisi u ãwɔ ɔ̃nɛ tɔ̃vɨn shonɛ a ɔ̃nɛbiinyatɔ̃nɛni.

4 Mazɔ̃ Filimon, ko-piɗaviya n kɛ gaki Ɗa nɛ n ɓaa niitɔ n dɔ̃rin Ɗalaparɛ. 5 Aruviya n ntawɔ ɔrinɛtɛ piti kpai a shɔ sisɨn ãnɛyini a sisɨn ãnɛ gbete ɔ awuni au Uɓeyelapa Yesɔ nii ni. 6 N gakinɛ au yuɓasinɛ a mɔkɔni a nyaba shɔ sisɨn ãnɛ, yɛ n-tiu vitɔ̃vɨng zɛnɛtɔ fɛ̃ɛm shɔgbete u a wuniyɛ au ɔ̃nɛ aka yuɓasinɛ a Kirisini. 7 Mazɔ̃, a ɔrinɛ n ting sisɨn purutɛ fɛ̃ɛm a bimanɛni! Aruviya pɔ̃ Ɗalapa shɔbiiyitɛ i sisɨn lakitɛ fɛ̃ɛm.

8 Aru nankɔ n yɛn zɛa nɔɔ nyanwarinɛtɔ a kakani a pɛ mazɔ̃ a Kirisi kabii, n pɔ̃arɛ a pɛli vigbete tɔ̃rɛ shɔu pɛliyɛ. 9 Ama aru n Bulus n ɔraatɔ, n kasirɛ n gakaatɔ, a Kirisi Yesɔ ɗekɨn, gbete shɔ mang a jahm au yuuyɛ. 10 N gakaatɔ a majaa Onisimu yuu shɔgbete u pɛ n jaa a Kirisi kabii; aruviya aɗagbete n si a jahm nkɔng si pɛ uɓeye a suru. 11 A ɗauni siu vishonɛ ɓa aa ɗɔbiini ɓa ama dɔdɔrim u vishonɛ aa ɗɔbiini a nkɔni.

12 N sho Onisimu sɔ̃ntɛ yɛnɛ aa ɗɔbii dɔdɔrim, ukɔ shɔgbete n ɔriyɛ ang sisɨn fɛ̃ɛm. 13 Aɗagbete n si a jahm aru ruu tɔ̃vɨn nwanɛ n kasirɛ n sãu ang ɗɔbii, nɔgbete u pɔ̃sinnaa a yuu vishonɛni. 14 N ji kasi ɓa n pɔ̃ a kaka bi aru a pɔ̃sinnaa rɛ ɓa; ama vigbete a kasi pɛlinyɛ u ɔ̃ jo aa tete tɔ̃vɨn pɛlinɛ, ɓanɛ n pɔ̃a kaka ɓa.

15 Yɛ ɔ̃rɛ si Onisimu yaa a ɗɔbiitɛ sekaa aru a yɛ tɛurɛ a ɔ̃ awuni dangdang. 16 U vishonɛ ang ɗɔbiini pɛ̃nɛɓa, nagbete u vishonɛ yɛ ɔ̃ sɔ̃njo aa ɗɔbiini pɛ̃nɛɓa naa jaa foo, naa a mɛzɔ̃ a uɓeyelapa kabii! 17 Aru nankɔ nkɛ ɔ̃nɛ a wesa vishonɛni, a tɛu naa kaziti nagbete asi tɛnyɛ. 18 Naa Onisimu pɛlaa vikɔ̃linɛ nɛ ko ɔ gɨu viwɔ, a gɨnkɛ nkɔ. 19 Nkɔng Bulus n bee ang yuu n yɛn shootɔ. Ama mɔkaa sukinɛ apɛ n makɔ jo, 20 Aru nankɔ mazɔ̃, n gakaatɔ a pɛlin shonɛ tɔ̃vɨnmitɔ aru Uɓeyelapa; aru u pɛ ɓɛzɔ̃ a ka Kirisi, pɔ̃mpɛ n ntabiinyatɔ̃nɛtɔǃ

21 N zɛtɛ a yɛ gɨn n nyatɔ, n zɛtɛttɔ a yɛ pɛli vigbete tɛ namtɔ aruukɔ n bee kɨn. 22 sɔ̃n tɔti, n kasirɛ a kɔrin jaa gbete n roo a ɗɔntɔ, aruviya n pɔ̃ a sisɨn Ɗalapa yɛ kasaa gakinɛtɔ u pɔ̃rɛ shɔu yannaa a jahɨm a sɔn ɗɔbii.

23 Abafara shɔgbeteu a jahm a nkɔni aru Kirisi Yesɔ yuu gee ɔ nyatɛjo, 24 sɔ̃nji nankɔ Markusi, a Aristaku, a Dema, a Luka i piti kpai n shɔ vishonɛyi i gee ɔ nyatɛ.

25 Mɛnɛ Uɓeyelapa Kirisi Yesɔ tɔ̃vɨn shonɛ u ɔ̃ a ɔkɔɔni piti kpai.