1 Au nyayisnɛ, n shɔbiiyi ɔ nta sisɨn purutɔ awɔ yuɓasinɛ au Uɓeyelapani. Yuu Ji wam ɓa n pasɔɔ vigbete n beerɔɔ siyɛ ɓa, ɔ yɛ ranaatɔ naa nkɛ pɛlinɛ nankɔ yɛ. 2 Ɔ kɔyuutɔ aru shɔgbete i pɛli vikɔ̃linɛyi ni, zaamiyi, shɔgbete ai pɔ̃ shɔ a kaka nɛ shɔu yee shaatɔ. 3 Pɛ ukɔu shɔgbete i tɛ gaanɛ shaa yeenɛyɛ, ɓa ikɔ ɓa, aru ukɔu bassi Ɗalapa rɛ au ka suru, au ka yuɓasinɛ a Kirisi Yesɔni u nta sisɨn purutɛ au ɔ̃nɛni. U bassi ɓɛɛjo Kirisi Yesɔ u pɔ̃ sisɨn ɓa shɔzɛ vipɛlinɛni ɓa. 4 N vishanɛ aɗɔn aru gbete n pɔ̃ sisɨn ang vipɛlinɛ. Naa shɔwɔ awɔ tete kɛtɔnɛn pɔ̃ sisɨn a shɔzɛ vipɛlinɛni, n vishanɛ aɗɔn waanɛ gbete tɛu ɓɛɛ tɛttɔyɛ. 5 Shɔ yeerin shaa sin pɛlitɛ lumɔɔ gbete. Shɔ yeeng a tipi Israila, n pɛ Benjamɛyi nyakoo, maye a manini i pɛ shɔ Ibirniyawayi. Nɔgbete Musa nya ãsinɛ sãyɛ, n sipɛ shɔ Farisiya. 6 N shi a kakani fɛ̃ɛm aruviya n-tɔ mɛnɛ n-tɛ pɛlinɛ vigbete Ɗalapa kasinɛn pɛliyɛ, n tasi shɔgbeteyi gɨn Yesɔ i raa fɛ̃ɛm. Si kɛ ɔ̃nɛ a nyabankɔ shɔyi gɨn Musa nya ãsinɛ tɔ̃vɨn n ruuvini ɓa. 7 Ama vigbete n yɛn ga naa Ɗa sharin au yuuniyɛ, dɔdɔrim n gai kɛ atette vigbete raasin naatɛ aru n yuɓasinɛ a Kirisini. 8 Ɓa viwayikɔ sheeli ɓa; n tuu vipiti kpai n-tɛ raanatɛ kpai, aru vigbete si a ɗɔn waanɛ fɛ̃ɛm, vizɛnɛ ayuu Kirisi Yesɔ Uɓeyelapa. Aru u yuukɔ n loki ko-iviyatɛ piti kpai; n tuyitɛ naa vishaanɛ gbete lɛsitɛttɔyɛ, nɔgbete n kpaa Kirisi sɔ̃nyɛ 9 anɔgbete n ɓasi yuu awuni dangdang. N tɔ̃vɨn gbete n pɛli ang yuu aka Musa nya ãsinɛ tɔɓa, dɔdɔrim n kɛ a tɔ̃vɨn shonɛ gbete shɔ kpaa atette sisɨn ãnɛ a Kirisi bi, tɔ̃vɨn shonɛ gbete shɛ a Ɗalapa ɗɔbiiyɛ shɔ kpaa ɓɛɛ nɔgbete sisɨn ãnɛ ɔ̃yɛ. 10 Vigbete ang kasiyɛ piti kpai n zɛ Kirisi, n zɛu kaka gbete yulapa a saa a wuniyɛ, n ɓooraa awuni, n ɔ̃ naa ukɔ a nyaba vɔnɛ gbete vɔyɛ, 11 ang sisɨn pɔ̃nɛ n ang yuu n ɔ̃ atette shɔgbete Ɗalapa yɛ yusiyi lapa a suruniyɛ.

12 N jo tung yuu ɓanɛ Ɗa shaarintɛttɔ gboti ɓa ko nɛn zɛnɔɔ tɛttɔ tɛpɛ-tɛpɛ ɓa. Ama n ɗɔgbete n yɔkiyɛ n kpaa Ɗa shaarinɛ gbete Kirisi Yesɔ kpaarin tɛttɔ gboti au yuu. 13 N shɔbiiyi ɓa nizɛ ɓa, n ji lɛri ɓa ang sisɨn nɛ Ɗa sharintɛttɔ gboti ɓa; vigbete n pɛliyɛ, ukɔ ɔ̃rɛ ko-pikoviya n sukitɔ a vigbete ang kɨntiyɛni n pɛli vigbete n yɛn pɛliyɛ n kpaa vigbete ang ɗekɨntɔ. 14 Aruukɔ n yusururu yɛnɛ u nyayisinɛ aru n kpaa vigbete Ɗa yɛ sharin au yuuyɛ, ukɔ Ɗalapa nyaɓaanɛ yɛnɛ kolapa aru vigbete Kirisi Yesɔ pɛli ang yuuyɛ.

15 U shɔgbete u kpẽnɛ aɗɔn a suruyɛ u vipɛlinɛ u ɔ̃ gbete. Ama naa ɔ zɔ gãsiyi ikɛ ɔ̃nɛ a sisɨn wɔɔni tot, Ɗalapa yɛ tasɔɔ vimtɔ wasa-wasa. 16 Vigbete yɛ kɔriyɛ u yɛ ɗekɨn ɓɛɛ jo a nyaãsinɛ gbete Ɗalapa tasiuyɛ anɛ dɔdɔrim.

17 N shɔbiiyi ɔ ɓasiyuu a zɔ gãsiyini ɔ gɨn ɓɛɛ jo n dɔɔ vipɛlinɛ. Ɔ wesho a shɔgbete i gɨn vitasinɛ tɔ̃vɨn gbete u pɔ̃sɔɔyɛ. 18 Nagbete n gelɔɔ vim sitɛttɔ a nɔɔ gelinɛ, dɔdɔrim n pasitɛ a murini nɔɔ: shɔzɛ waanɛ ai ɔ̃nɛ tasinɛ i pɛ Kirisi shɔnɔɔpɔ̃ au vɔnɛ gbete shɔ ɓaunaa a laayɛni. 19 Akɨntini kpai i yɛ to wɛrɛ yaa, aruviya i ɔ̃nɛ ɓɛɛ jo ɔ̃nɛ gbete i bi kasiyɛ. I vi baasinɛ ɓɛɛ jo ayuu vigbete yɛ ãyi yusẽyɛ, i lɛri ɓɛɛ jo ayuu vi kotipimkɔ sheeli. 20 Ama u ɓɛɛ shɔ kolapayi, u ɓɛɛ jo ɗɔgbete u ga u shɔ-shɔraanɛ, Uɓeyelapa Yesɔ Kirisi, u arɛ a kolapa. 21 Kirisi yɛ kɔsiu bi shɔzɛ vɔnɛntɔ, u risi naa u bi gbete shɔ basiyɛ, yɛ shovi au kaka gbete au sã ko-iviya awuni kpai.