1 Sẽkoom shɛ pɛ ang naa Yahuda, Yesɔ Kirisi foo, Yakub ɓɛzɔ̃.

N beeri shɔ gbete Ɗalapa ɓainyayɛ, shɔyi ɔ̃ a ɓuzɨn Ɗalapa u Ɓeye ɔrinɛ, au ɔrɔɔ yɛ a sɨnwɔ Yesɔ Kirisi naa u kɔ wɔɔtɔ:

2 Mɛnɛ raantanɛ, ɔ̃nɛbiinyatɔ̃nɛ a ɔrinɛ u ɔ̃ ɔ ɓɛɛ piti kpai.

3 N shɔbiiyi ang ɔriyɛ, sin mabiitɛ n-tɛ n beerɔɔtɔ aru u raanɛnkɔ kpai, ama n zɛrɛ ɔ̃tɛ kaka jazɨng akɔrɔ n beerɔɔtɔ n masɔɔbiirɛ ɔ yɛ ɗekɨn aru sisɨn ãnɛ, a Ɗalapa ãu shɔbii wɔsɔ wɔsɔyi ɓa gbete sheeli. 4 N sha vim aru shɔ gbeteyi gɨn Ɗalapa ɓa, i totɛ au tete a nyanɛ, i sɔɔri Ɗa tɔ̃vɨn shonɛtɛ riitɛ nyaba vikɔ̃linɛ pɛlinɛ, Yesɔ kirisi kɔ u yupɛ̃ni sheeli i ɓɛ̃ɛ̃utɛ a Uɓeyelapani. Laabeenɛ Ɗanyaruubii sha si tɛttɔ tɛ̃ɛ̃tɛ̃ɛ̃ nɛ shɔ ɗɔmiyi yɛ ranaa ɓa, . 5 N kasirɛ n kpaarɔɔ sisɨntɔ, ɔ zɛ vim tɛttɔ kpai, Uɓeyelapa gaa shɔ Israila i ranaa a tipi Masara, ama akɨnti a nyoki shɔ gbeteyi ji a sisɨn ɓau biini ɓarɛ. 6 Ɔ kpaa sisɨntɔ ɗajashonɛlapa shɔgbete i ji shi ɓa ɗɔgbeteyi kaka vishonɛ ɗɔnyɛni ɓa: Ɗalapa mayi dɔɔtɛ a saa gãnya a ɗɔkɨnri au sɔ̃nyaɓa, i ɗɔyi ga Lee ruuyeenɛyɛ. 7 Ɔ kpaa sisɨn sɔ̃ntɔ aru Sɔdom a Gumora ni, a komoo gbete si maani a ikɔyini, au shɔ pɛli kpãntang a vikɔ̃linɛni aɗɔn fɛ̃ɛm yɛ: komoowi shɔ lɛsiyi a yaa gbete sɔ̃nyaɓayɛ u tasi naa yushogɔ̃nɛ a shɔbii piti kpai. 8 Si jo nankɔ, shɔgbete i bassi Ɗalapa ɓa miyi i pɛli vikɔ̃linɛ i shanɛ Ɗalapa tasiyi a nɔrinɛ nɛi pɛli jo nankɔ, aru nankɔ i pɔ̃yi bi ɔ̃ ɓa wɔsɔ-wɔsɔ ɓa, i gɨn Ɗalapa nya shanɛ ɓa, i shali vikɔ̃linɛ aru vi kolapayini. 9 Ko Ɗajashonɛlapa pɛ̃niba Maikɛl ji sha vim si ɓa, a ɗɔyi mari zɔ a shɔruuvini yɛ, aru Musa vɔrɔ, Maikɛli ji dã shɔruuvini ɓa a yeeruu au yuuni ɓa, ama shanɛ, <<Uɓeyelapa u lasaatɔ!>> 10 Ama shɔmiyi, vigbete ai ji zɛɓa i dãutɔ.Vigbete i zɛyɛnkɔ ukɔ yɛ lɛsiyirɛ aru i lɛriɓa naa vivaayi, i pɛli jo vi ayi kasiyɛ ukɔ yɛ ɔ̃rɛ i nyaba lɛsinɛ. 11 Kee, yɛ ɔ̃riyi kɛpikoviyaǃ I gɨn Kayino vishonɛtɛ, aru saa kasinɛ i pɛlitɛ naa Balaam pɛli si yɛ. i si naa kora ji gɨn u yupɛ̃niyi nya ɓa, lɛsirɛ aru yulakinɛ, shɔ yɛ lɛsi shomiyi tɔ piti naa shɔ lɛsi Kora yɛ. 12 Shɔmiyi i yusẽ ɓa yuuni ɓa, i naa vizizi a yɛti vishaanɛ yumusinɛ, i naa jagavivayi ai shaari i yuukɔ sheeli. I naa sabu gbete sɔrɔ siiyɛ au n ti mii ɓayɛ. I naa laau waatitɛyɛ, shɔ aatɔ aru i jaa ɓa yuuni ɓa. I vɔkɛ ɓa ziti. 13 I naa rii mii waapo ai viyuusẽ i pɛliyɛni i ãbiilapa naa pupuru. I naa sɛyi ai rakiyɛ, a Ɗalapa yaasiyi ɗɔkɨnri gbikiri-gbikiri tɛ dangdang. 14 Si jo Ɛnɔki kɔ shɔzɛ e maanzii a Adamu laduru, si tɛ̃ɛ̃tɛ̃ɛ̃ nwanya ayuu vimiyiyuu nɛː <<Uɓeyelapa yɛ atɔ au Ɗajashonɛlapa Wɔsɔ-wɔsɔyini laazɔrɔ-laazɔrɔ 15 u yeeruu a shɔ kotipi i yuu kpai, u lɛsiyirɛ aru i vipɛlinɛ ɓa Ɗalapa nii ɓa, a ruu kɔ̃linɛ ayi nwali au yuuyɛni piti kpai!>> 16 Shɔmiyi i pɛ shɔ sɔ̃ɔ̃nɔlinɛyi ai tasi janaa a shɔ biiyɛ, i gɨn ɓɛɛ jo vikɔ̃linɛ ai bi kasiyɛ; i nwanya ai yubasinɛ i bɛli shɔwɔyi aru i kpaa viyi kasiyɛ.

17 Ama n shɔ ɔrinɛyi ɔ kpaa sisɨn pɛ, aru vigbete Uɓeyelapa Yesɔ Kirisi jashonɛ i gelɔɔ si a kɨntiyɛ. 18 I gelɔɔ nɛ, a leegbete koo yisinyayɛ, shɔwɔyi i yɛ latitɔ aru tɔ̃vɨn shonɛ, i gɨn jo i vi kasinɛ gbete ɓa e Ɗalapa ɓa. 19 Shɔmpɛ shɔgbete i n ti yuu vɔsinɛrɛ, i Suru ɓa ɗɔn ɓa, ɓa Ɗa Suru tesiyi ɗekɨn rɛ ɓa. 20 Ama n shɔ ɔrinɛyi, ɔ yɛ ɗekɨn awɔ yuɓassinɛni a nyaba sisɨn ãnɛ. Ɔ gaki Ɗa a Suru wɔsɔ-wɔsɔ kaka, 21 ɔ ã yuu a Ɗalapa ɔrinɛ, nagbete ɔ ga Uɓeyelapa Yesɔ Kirisi au tete raantanɛ u ãwɔ suru au sɔ̃nyaɓayɛ.

22 Ɔ nta shɔyi sisɨn bɔ̃tɔ i raatɔ; 23 ɔ raa shɔ gãsiyitɔ ɔ gɔ̃yi a yaa ɔ shɛshi ɓili, zɔ gãsiyi ɔ ntayi raatɔ ɔ ɓasi a seti ntanɛni, ama ɔ bɛ̃ɛ i fãrãtɔ, au ruuvini lɛsitɛ aka yɛ.

24 Ɔ bɛli Ɗalapa tɔ , shɔgbete zɛwɔnɔɔ kɔnɛtɛ ɔ nwesi ɓa ruuvini niɓa, yɛ n-tɔɔtɔ yɛnɛ u ɗɔ bassinɛ a kolapa ɔ nwesi ɓa ruuvini ɓa, yɛ n-tɔɔ ɗɔwakɔ ɔ nta sisɨn puru fɛ̃ɛm. 25 Ɔ bɛliutɔ pɛ ukɔ sheeli Ɗalapa u shɔshɔraanɛ. Bassinɛ, kpati, kaka vishonɛ a kaka shɔ sãnɛ pɛu ɓɛɛkɔ, u bɛliunɛ aka Yesɔ Kirisi Uɓeyelapa. U bɛlinɛ si ji tɛ̃ɛ̃tɛ̃ɛ̃ kopiɗaviya, anɛ dɔdɔrim, yɛ ɔ̃ dangdang.