1 N kasirɛ n gelɔɔ viwɔ a u ɓɛnaa Fibi yuu, shɔu shɔshi Ɗalapa vi a wɛrɛ Ɗa Sinkiriya. 2 Ɔ tɛu au Uɓeyelapa nii, naa shɔ Ɗalapa i pɛliyɛ, ɔ pɔ̃siu naa a vigbete kasi awɔ ɗɔbiiyɛ; upɛ shɔ wesa tɔ̃vɨn a shɔzɛ waanɛyi bi a nkɔni.

3 N shoshi pirisila nya geenɛtɛ a Akila ni, n shɔgbete u shoshi Kirisi Yesɔ vishonɛ a yiniyɛ; 4 i ãi yuutɛ ang bi. Shɔgbete i ã yuutɛ nɛi vɔ ang yuu. N dɔ̃ritɛ piti kpai, ɓa nkɔ sheeli ɓa, ama shɔgbete i ɓa Yahudawayi shɔ Ɗa wɛrɛ gɨnyi gbete i ã yuu nɛi vɔ ang yɛ. 5 N kasirɛ ɔ geerin wɔsɔ̃n shɔ wɛrɛ Ɗa gbete i toli nya ai wɛrɛyi yɛ.

N kasirɛ ɔ geerin ang masa ɔrinɛ Ifanitusi nya, shɔu si ukɔ ɗekɨn a tipi Asiya ai ã sisɨn a Kirisi biiyɛ. 6 Nya geenɛ yɛnɛ a Mariyamu bi, shɔgbete au shovi waanɛ awɔ yuu. 7 N kasirɛ ɔ geerin wɔsɔ̃n yɛnɛ a Andarakus a Juniya, masa Yahuwa gbete u si ayini a jahmyɛ; shɔ zɛi nii tɛttɔ waanɛ a tete Yesɔ jashonɛyini, ai rii kirisa ang ɗekɨn n rii sɔ̃n kɛkn.

8 N kasirɛ geerin Ampiliyatu nya, n shɔ masa gbete u ɓasi yuu ayini au ɓeyelapa nii. 9 N kasirɛ ɔ geerin wɔsɔ̃n Uribanu nya, n shɔ vishonɛ gbete au pɛli Kirisi vishonɛ a wuniyɛ, a yɛnɛ Sitakis, n masa ɔrinɛ. ɗɔbii. 10 N kasirɛ ɔ geerin Apilɛs nya, shɔgbete au ã yuu tɛttɔ a Kirisi biini a shɔ pɔ̃siu naa tɛttɔ. Nya genɛ yɛnɛ shɔgbete shɔ yeeyi a Aritobulu i yeenɛ. 11 N kasirɛ ɔ geerin Herodiya bi, masa Yahudawayi, wɔɔ sɔ̃n Kirisa a Nakisu yi yeenɛ.

12 N kasirɛ ɔ geerin Tirafena a Tirifosa nya, shɔu shoshi Uɓeyelapa viyɛ, a n masa ɔrinɛ Perisi, shɔgbete au shɔshi Uɓeyelapa vitɛ waanɛ. 13 N kasirɛ ɔ geerin Rufusi nya, a ɓini ni shɔgbete au shoshi Uɓeyelapa vi shɔ zɛu nii tɛttɔ waanɛ, gbete au tun naa ɓɛjaa. 14 N kasirɛ ɔ geerin Asinkiritu a Filgon nya, a Hemas a Patirobasi a Herimasi a shɔ Kirisa gãsiyi gbete i a wuniyɛ. 15 N kasirɛ geerin Filologu a Juliya, wɔsɔ̃n Nireyu a ɓɛnani, yɛnɛ Olimpasi a shɔ Ɗa gɨnnɛ gbete i a wuniyɛni kpai. 16 Ɔ gee zɔ nyatɔ a zɔ nakɔ̃tinɛ abi. Shɔ wɛrɛ Ɗa Kirisiyi i gee ɔ nyatɛ piti kpai.

17 N gaki ɔtɔ masayi: Ɔ kɔyuutɔ a shɔgbeteyi kasɔɔ yuu vɔsinɛ a sisɨn lɛsinɛ a nyaba gbete ɔ tɛɛ vi matinɛyɛ. Ɔkɔ ɓasi yuunɛ a yini! 18 Aru shɔgbete i pɛli iri vim i ɓa shɔgbete i shɔshi Kirisi Uɓeyelapa viyɛ ɓa, ama see i yɛti kɔ sheeli. Ai nyanwanɛ gbete shɔ̃shɔ̃mi i ɗakijo shɔgbete i weshɔ ai nyayɛ. 19 Ko-piya i nta wɔɔ ruubii tɛttɔ aru yuu ãnɛ gbete ɔ ã a Ɗanyaruubiini, jo ruumkɔ n nta binyatɔ̃nɛtɔ a ɔkɔni. N kasirɛ ɔ ɔ̃ shɔ kpẽtɔ aru vigbete tɔ̃vɨnyɛ, ama ɔ ɔ̃ shɔ tɔ̃vɨn ayuu vigbete ɓa tɔ̃vɨn ɓayɛ ni. 20 Ɗalapa gbete au kɔ ɔ̃rɛ u nyaba binyatɔ̃nɛ, ɓa dɔkɔkɔ ɓa yɛ pɔ̃rɛ ɔ nali japẽpẽ au tɛɛli doo.

Uɓeyelapa Yesɔ u vitɔ̃vɨng pɛlinɛ u ɔ̃ a ɔkɔni.Nankɔ.

21 Timoti, n masa vishonɛ pɛlinɛ gee wɔ nyatɛ; a Lusiyani a Jason wɔsɔ̃n Susibata u shɔ yuu ɓasinɛ Yahudawayi gee wɔ nyatɛ piti kpai. 22 Nkɔ Tartiyu, shɔgbete au beerɔɔ sẽkom, gee wɔ nyatɛ.

23 Gayu n shɔ nɔɔsinɛ, au wɛrɛkɔ shɔ Kirisayi kpaa zɔrɛ, gee wɔ nyatɛ; Irasitusi, shɔ saa sãnɛ koomou, a u ɓɛzɔ̃ Kartusiyi i gee wɔ nyatɛ. 24 Mɛnɛ Uɓeyelapa Yesɔ Kirisi vitɔ̃vɨng pɛlinɛ u ɔ̃ a ɔkɔni piti kpai. Nankɔ.

25 U ã Ɗalapa bɛlinɛtɔ! Ukɔ yɛ sɨnrɛ a shi dɔkaziti aa sisɨn ãnɛni, nagbete ruutɔ̃vɨng shayɛnɛ nkɔng nwari shɔ nya aru Yesɔ Kirisi a nɔgbete shɔ shɛshi ruutɔ̃vɨng a shɔ ɓusi si tẽẽ tẽẽyɛ atette saa gbete i tɛ yɛ. 26 Dɔdɔrim, a shɔ shɛshi ruu nizɛutɛ a ɓili deredere a kaa Ɗalapa janyagadi i vi beenɛ; a nya ãsinɛ gbete Ɗalapa a vi tɛu kaka ɓa yɛ tasi shɔ ladurumiyi ruutɔ̃vɨngtɛ piti kpai, aru shɔgbeteyi kɛ ã sisɨn nɛ i gɨntɔ piti kpai.

27 U ã jo Ɗalapa kɔ sheeli bassinɛ, u yɔbm ukɔ ɔ̃rɛ shɔ kpẽnɛ piti kpai, bɛlinɛ kaa ɓɛjaa Yesɔ Kirisi bi dɔdɔtrim yɛnɛ ɗekɨn dangdang! Nankɔ.