1 Kɛɗɔn masayi aru Ɗalapa shɔ raantanɛ pɛ̃niba n gaki ɔtɔ ɔ ã yuutɔ: ɔ ɔ̃ a suru ni wɔsɔ-wɔsɔ gbete Ɗa yɛ tɛɔ yɛ, aru shɔmkɔ ɔ̃rɛ Ɗalapa shɔ vɔ susari tasinɛ nizɛ. 2 Ɔkɔ ɓusi jakɨntimiyi vitɔ̃vɨng gelinɛ nɛ, ɔ yaa ɔ ruuvini pɛlinɛtɔ, ɔ kɔsi sisɨntɔ awɔ nyaba ɔ̃nɛ piti kpai, nɔgbete ɔyɛ zɛ vigbete Ɗalapa kasi nɛɔ pɛliyɛ, ukɔ ɔ̃rɛ vigbete tɔ̃vɨn a nyaba gbete Ɗalapa kasiyɛ piti kpai.

3 Aru vitɔ̃vɨng gbete Ɗalapa pɛliyɛː N nwarɔɔ nya jo au yuukɔ nɛ ɔkɔ tun yuu nɛ u tɛɛ kaka, ama nɛ pɔ̃n sisɨn ãnɛ jo nɛu ɔ̃ nagbete Ɗalapa ã yɛ. 4 Ɔ gbɔki aɗɔ abiini waanɛ, kopi gbɔki shopiya i vishonɛ ji ɗɔn a kɨ̃nkɨ̃n piti kpai. 5 A nyabamkɔ nagbete u waanɛm upɛ yɔpɔ gbete a kirisi ɗɔbiini, u dɔsitɛ u ɔ̃tɛ gbete piti kpai a gãsiyini naa u gboki bi gbete. 6 Kɛɗɔn u shovi shonɛ jo a vitɔ̃vɨng gbete Ɗalapa ãu bang ni a nyaba tɔ̃vɨn, u shovi shonɛ ayini, kɛ ɔ̃nɛ a nyaba shɔ Ɗalapa nyaruubii nwarinɛ u pɛli vishonɛ jo awuni nagbete u sisɨn ãnɛ ɔ̃ yɛ ni; 7 kɛ ɔ̃nɛ Ɗalapa basinɛ, u basiutɔ, kɛ ɔ̃nɛ shɔ vimatinɛ, u mati shɔtɔ; 8 kɛ ɔ̃nɛ zɔ bi masinɛ u pɛlitɔ ji nankɔ. Kɛ ɔ̃nɛ shɔ vi ãnɛ u ã a sisɨn gbete; yupɛ̃ni i sã shɔ nakaziti; shɔ shɔraa ntaayi i pɛli vishonɛ jo a sisɨn puru.

9 Zɔ ɔrinɛ ukɔ ɔ̃rɛ vitɔ̃vɨng pẽniba. Ɔ bɛ̃ɛ̃ rukɔ̃li a ɔ̃ vilanɛ yɛ tɔ, ɔ sã ɓɛjo nyaba tɔ̃vɨn pɛlinɛ. 10 Ɔ ɔri zɔtɔ a zɔ basinɛni waanɛ nagbete kirisa i pɛliyɛ. 11 Ɔ ɔ̃ shɔ vishonɛyi ɔkɔ ɔ̃nɛ pnzɛ̃, ɔ pɛli Ɗalapa vishonɛtɔ naa shɔgbete ãu surutɛ au biini piti kpai. 12 Ɔ sisɨn pɔ̃nɛu u ɔ̃ yɛti puru, ɔkɔ yɔriyunɛ awɔ yukɔnɛuni ɔ gaki Ɗalapa tɔ a lee-lee. 13 Ɔ vasiɔɔ vinaatɔ a mɛzɔ kirisa gbeteyi ɓɛɛ ɓa yɛ ni, ɔ tɛɛ shɔzati i naatɔ awɔ wɛrɛni.

14 Ɔ gaki Ɗalapa tɔ u tasi shɔgbete i bɛ̃ɛ̃ wɔ ruubii anɔni vɔ susari abiini- Nn ɔ gakiutɔ u tasiyi vɔ susãri abi ɓanɛ nɛu wiritɔ ɓa. 15 Ɔ nta yɛti purutɔ a shɔgbete i nta yɛti puru yɛ ni wɔsɔ̃n ɔ sɨntɔ a shɔgbete i a ɗɔɔ sɨnnɛ yɛ ni. 16 Ɔ ɔ̃ ɔ̃nɛ binyatɔ̃nɛ a zɔni, ɔkɛ ɔ̃nɛ shɔ yuu tunɛyi, ama ɔ shoji vigbete yɛ rawɔ yuu piti kpai yɛ. Ɔkɔ tasaɔ yuunɛ naa ɔpɛ shɔ sẽrẽẽyi.

17 Naa shɔwɔ kɛ pɛlaɔ vikɔ̃linɛ nɛ, ɔkɔ kɔsi nɔnɛ. Ɔ nta pɛlinɛ jo vigbete kopiya tunɛ nɛ pɛ vitɔ̃vɨng yɛ. 18 Ɔ pɛli jo vigbete ɔyɛ pɛliyɛ ɔ ɔ̃ ɔ̃nɛ binyatɔ̃nɛ a kopiya ni. 19 Ɔkɔ kɔsinɔ vikɔ̃linɛ gbete mɛsayi pɛlɔɔ yɛ nɛ, ama ɔkɛ kɔsinɔ nɛ ɔ yaa Ɗalapa u kɔsɔɔ nɔɔrɛ, aru Ɗalapa nyaruubii shatɛttɔ nɛ, <<N yɛ kɔsiyi nɔɔtɔ Ɗalapa sharɛ.>> 20 Naa kɛ pɛli vimnɛ, nɔgbete Ɗalapa nyaruubii sharɛ nɛ: << wɔ̃ɔ̃ kɛ sɨn mɛshɔnɔpɔ̃yi nɛ ɔ ãi vishaanɛtɔ i shaarɛ; I kɛ ntaa sutunɛ ɔ ãi miitɔ i boorɛ; Naa ɔkɛ pɛliyi vimnɛ nam i sisɨn yɛ tootɔ a yusẽẽni pẽniba.>> 21 Ɔkɔ ya rukɔ̃linɛ u rawɔ sisɨnrɛ, ama ɔ yiki rukɔ̃linɛ a vitɔ̃vɨng pɛlinɛ.