1 Kɛɗɔn u yɛ shakɛnɛ iviya? U yɛ ɗekɨn a ruuvini pɛlinɛ ni aru Ɗalapa vitɔ̃vɨng pɛlinɛ u shakɛtɔ ya? 2 Nn, ɓa ɗɔkɔ ɓa! U shɔgbete u vɔ a ruuvini u yɛ ɔ̃ kɛpi kovi a yɛti ruuvini viya? 3 Aru ɔ ji zɛ ɓa nɛ shɔgbete shɔ pɛliu batizima a Yesɔ nii yɛ, shɔ pɛliu batizima u tasi nɛ u a Yesɔ Kirisi ni gbete. 4 Naa shɔ pɛliu Batizimatɛ, ɔ̃ kɛ naa shɔ gbãu a Kirisi ni nyazɔ a ɗagbete vɔyɛ, nagbete shɔ yusi Kirisi a saa yɛ au ɓeye bassinɛ, ukɔ ma u ɔ̃ sɔ̃njo a suru sɔɔ ni. 5 Ji tẽẽ-tẽẽ u ɔ̃ gbete awuni au kaa vɔnɛ gbete vɔyɛ, ji nyabankɔ uyɛ ɔ̃gbete a wuni a kagbete yulapa a saa yɛ. 6 U zɛtɛttɔ u ɔ̃nɛ kpali, pɔ̃tɛ u vɔtɛ kirisi a kaa naa ɓanɛ laa, a nɔgbete kaka ruuvini gbete u pɛliyɛ u lɛsirɛ, aru uyɛ ɔ̃ jaa foo ruuvini tɔɓa. 7 Naa ukɛ vɔnɛ, siu raa naatɛ a ruuvini kakani. 8 Nɔgbete u vɔ a Yesɔni, u ã sisɨntɛ u yɛ ɔ̃ sɔ̃njo a wuni. 9 Nagbete u zɛ tɛttɔ Kirisi yulapatɛ a vɔnɛni yɛ vɔ tɔɓa vɔrɔyɛ roo kpati ɓa au yuuni ɓa. 10 Ji nankɔ, aru gbete vɔtɛttɔ, vɔrɔ kaka tɔɓa au yuuni ɓa; a dɔdɔrim yɛ ɔ̃u ɔ̃nɛ a nyazɔ a Ɗalapani. 11 Ji nankɔ a kpaa sisɨntɔ aa yuuni nɛmpɛ vɔrɔ, naa ruuvini ruubii ji nankɔ, ama ɔ ɔ̃ ɔ̃nɛ binyatɔ̃nɛ a Ɗalapani a kaa Kirisi Yesɔ kabii. 12 Ɔ̃ tɛ kaka jazɨ awɔ kɔrɔ ɔkɔɔ yaa ruuvini nɛ u roo kpati awɔ bi gbete vɔtɔmini, kɛɗɔn nɗa a gɨn vigbete a bi kasiyɛ. 13 Ɔ̃rɔɔtɛ kaka jazɨng akɔrɔ ɔkɔ ã ruuvini << kabii wɔɔnɛ aru vigɔ̃nlɔrɔ pɛlinɛni. Kɛ ɔ̃nɛ ɗɔkɔ ɔ ã yuu a Ɗalapa bi, naa shɔgbete shɔ yusiyi a vɔrɔ anɛ suru, a ã yuu piti kpai a Ɗalapa bi aru gbete u shɔ shovi tɔ̃vɨn a wuniyɛ.>> 14 Ruuvini ukɔ ɔ̃nɛ ɔ shɔwɛrɛ; ɔ ji ɔ̃ ɓa tɔ̃ɔ̃ Musa nya ãsinɛ ɓa ama ɔ ɔ̃ a Ɗalapa vitɔ̃vɨng pɛlinɛ.

15 Kɛpi koviya? U pɛli kɛ ruuvini aru gbete Musa nya ãsinɛ u kaka ɓa au yuuni ɓa, see Ɗalapa vitɔ̃vɨng pɛlinɛ ya? Nyaba pɛlinɛ ɓa! 16 Nizɛ kɔ ɔ zɛtɛttɔ ɔkɛ ã yuunɛ naa jafoo nɛn gɨn shɔwɔɔ nya, ɔ pɛ jafoo nizɛ kɔ a shɔwɛrɛ gbete ɔ gɨn u nyayɛ ɗɔbiini ko ruuvini, gbete yɛ sɨnrɛ ɔ vɔyɛ, ko shɔ nya gɨnnɛ, gbete yɛ pɔ̃rɛ ɔ ɔ̃ a Ɗalapani nyazɔ. 17 Ama dɔ̃rinɛ yɛnɛ Ɗalapa ɗekɨn! Ko aɗagbete ɔ sipɛ jafoo a ruuvini naani, ɔ gɨn nyautɛ a sisɨn ni piti kpai aru vitɔ̃vɨng gbete ɔ kpaa a yɛti vigbete shɔ matɔɔyɛ ɔ tɛyɛ. 18 Shɔ rawɔtɛ a ruuvini naani, ɔ rikɛtɛ jafoo a ruu vitɔ̃vɨng pɛlinɛ. 19 (N shovi a nyakoo gbete shɔ nwa a lee-leeyɛ aru bi vɔnɛ gbete ɔ pɛli vikɔ̃linɛ awɔ biiyɛ.) A ɗawɔ ɔ piti kpai ɔ ã yuu naa jafoo aɗɔgbete ɔ pɛli vikɔ̃linɛ a lanɛni nɛ ruu vigɔ̃nlɔrɔ pɛlinɛ. Ɔ̃tɛ kaka jazɨng akɔrɔ dɔdɔrim ɔ ãwɔɔ yuu nɔgbete naa jafoo vitɔ̃vɨng pɛlinɛ aru wɔsɔ-wɔsɔ a Ɗalapa ɗekɨn. 20 Naa ɔ si jafoo a ruuvini naa, ɔ yuu kɔnɛ si ɓa a vitɔ̃vɨng pɛlinɛni ɓa. 21 Ɔ kpaakɛ ivi aru vikɔ̃linɛ gbete ɔ pɛliyɛ a dɔdɔrim ɔ nta yusẽe tɛ au yuunim viya? Vigbete ɔ pɛliyɛ piti kpai u nya yisinɛ ukɔ ɔ̃rɛ vɔnɛ! 22 Ama dɔdɔrim naa shɔ raawɔtɛ a ruuvini naani ɔ kɛ jafoo a Ɗalapa ɗekɨn. Vigbete ɔyɛ kpaa yɛ ukɔ ɔ̃rɛ yuu ãnɛ au bi piti kpai, a u nya yisinɛ piti yɛ ɔ̃kɛ suru gbete yisi nya ɓayɛ. 23 Arumkɔ ruuvini shori shɔ vi ɗɔnwanɛ a vɔrɔ; ama vigbete Ɗalapa ã shɔ wezɛyɛ ukɔ ɔ̃rɛ suru gbete sɔ̃ nya ɓayɛ a yuu ɓasi Kirisi Yesɔ Uɓeyelapa.