João 2

काना नगर म बिहाव

1 फिर तीसरो दिन गलील प्रदेश को काना नगर म एक बिहाव होतो, अऊर यीशु की माय भी उत होती। 2 यीशु अऊर ओको चेला भी ऊ बिहाव म निमन्त्रित होतो। 3 जब अंगूररस खतम भय गयो, त यीशु की माय न ओको सी कह्यो, "उन्को जवर अंगूरीरस नहीं रह्यो।"

4 यीशु न उत्तर दियो "हे बाई, मोख का करनो हय मोख मत बतावो? अभी मोरो समय नहीं आयो।"

5 यीशु की माय न सेवकों सी कह्यो, "जो कुछ ऊ तुम सी कहेंन, उच करो।"

6 उत यहूदियों ख हाथ पाय धोय क शुद्ध करन की रीति को अनुसार गोटा को छे घड़ा रख्यो होतो, जेको म सौ लीटर पानी समावत होतो। 7 यीशु न सेवकों सी कह्यो, "घड़ा म पानी भर देवो।" उन्न उन्ख लबालब भर दियो। 8 तब ओन उन्को सी कह्यो, "थोड़ो सो पानी निकाल क भोज को मुखिया को जवर ले जावो।" अऊर हि ले गयो। 9 जब भोज को मुखिया न ऊ पानी चख्यो, जो अंगूररस बन गयो होतो अऊर नहीं जानत होतो कि ऊ कित सी आयो हय पर जिन सेवकों न पानी निकाल्यो होतो हि जानत होतो, त भोज को मुखिया न दूल्हा ख बुलायो, 10 अऊर ओको सी कह्यो "हर एक आदमी पहिले अच्छो अंगूररस देवय हय, अऊर जब लोग पी क सन्तुष्ट होय जावय हंय, तब फिको देवय हय; पर तय न अच्छो अंगूररस अभी तक रख्यो हय।"

11 यीशु न गलील को काना नगर म अपनो यो पहिलो चिन्ह चमत्कार दिखाय क अपनी महिमा प्रगट करी अऊर ओको चेलावों न ओको पर विश्वास करयो।