1 Ərə ə̂në ə sə̂ je leme-e pə tə̂ ama nə, ərə ə̂në ä djî əpʉ nə, ərə ə̂në ä wû də ala ä, ərə ə̂në ä shêkɔ ʉrrr ə gôro də kəna ä gâ ye kɔ, kə də̂ Əpʉ ə̂në ə sə kə za sorô kə əzü kɔ. 2 Djatra əpʉ, sorô nə mâ tə̂ ye gashu, ä wû â ä sə kə pa ndə əpʉ ərə nə ə̂në ä yêrɔ əpʉ nə gâ ye kɔ; sorô nə̂ alɔnɔ̂ nə də̂ ä sə kə mʉ əpʉ nə kə e, sorô nə ə̂në ə sə̂ leme-e ngotə̂ Abä, â ə̂në ə mâ tə̂ ye gashu kə ä kɔ. 3 Ərə ə̂në ä wû ə djî əpʉ nə gâ ye kɔ, də̂ ä sə kə mʉ əpʉ nə kə e ndje, kanika a də a-e ndje sə də əpʉ lɔsu kʉ bale. Kandää, əpʉ lɔsu nə ə̂në a sə də nə kʉ bale kɔ, a sə də nə də Abä gâ ndə Ɨrɨ nə də Jezu Kristə. 4 Ä sə kə ta fraka də əpʉ səkɔ kə e kanika ə̂rû ə̂në a sə də nə kɔ lï nɔ̂.

5 Əpʉ ə̂në ä djî lə ama Jezu Kristə, ə̂në ä sə kə mʉ əpʉ nə kə e kɔ kə də̂: Ndjapä sə tə ə̂yîəwo, â əbutshe bale sə sə lə ye ne. 6 Kədə a pa a sə də əpʉ lɔsu kʉ bale də ətshə, â a sə kə na ana lə əbutshe, a sə kə pa əterə, â a mbrə ərə mbrə tə̂ äwä djatra əpʉ ne. 7 Bale, kədə a sə kə na ana lə ə̂yîəwo, mata ə̂në ətshə də ə̂tə̂ ye, tshə sə lə ə̂yîəwo kɔ, kandää a sə də əpʉ lɔsu nə kʉ bale lə takpa tə̂ əzə̂ gâ ye, â ə̈ndjï Ɨrɨ nə də Jezu sə kə yutu anyaka nə̂ əzə̂ nɔ̂.

8 Kədə a pa a sə sə də nyaka lə kumu əzə̂ ne, kandää, a frɔ tə̂ əzə̂ ə frɔ də ə̂tə̂ əzə̂, â djatra əpʉ sə sə lə əzə̂ ne. 9 Kədə a pa ndə anyaka nə̂ əzə̂ gashu kə Ndjapä nə, ətshə ə̂në tshə sə tə awombrə tshelə ndəma ye kɔ â sə tə awombrə ərə də äwänə kɔ, tshə sə kə gba tshelə anyaka lə kumu əzə̂ ə sə kə yutu aəmbrʉ aərə nɔ̂ tə̂ əzə̂. 10 Kədə a pa a mbrə nyaka mbrə ne, a do ətshə tə əyïəterə gâ ye, â əpʉ nə̂ ye sə sə tə̂ lɔsu əzə̂ ne.