1 Aneshe nə̂ əmə, mə ta ngrowô də əpʉ səkɔ kə e ndə kə pa e ma nyaka ma ne. Bale, kədə ə̈bə̈ əzü kə ma nyaka, a sə də ə̈bə̈ əyïkɔkɔ̂ ngotə̂ Abä: Jezu Kristə, ə̂në tshə sə tə ə̂rɔ̂ əzü kɔ. 2 Mbrə ə̂në, Jezu Kristə nə də ə̂tə̂ ye tshû mbrə əzə̂ ndə kə gba tshelə anyaka nə̂ əzə̂, ə də̂ kʉtə̂ ənə̂ əzə̂ nə də̂ ne, bale ənə̂ azü tshepashɔ nɔ̂ ndje.

3 Kədə a mbrə ərə ə lï də aâgbɔ̂ aəpʉ nə̂ Ndjapä, ə yisə̂ nə ə pa a yerɔ Ndjapä nə kpro. 4 Əzü ə̂në tshə pa: «Mə wusə̂ ye» â bata aâgbɔ̂ aəpʉ nə̂ ye bata ne, tshə sə tə əyïəterə, â ətshə nə, djatra əpʉ sə sə lə ye ne. 5 Bale, əzü ə̂në tshə mbrə ərə ə lï də əpʉ nə̂ ye, tshə yində Ndjapä nə ngâ də lɔsu tə̂ äwä ə̂në ə lï nɔ̂ gâ ye. Rə də̂ a sə kə wusə̂ nə ə pa a tɔ̂ popo ətshə gâ ye. 6 Əzü ə̂në tshə pa əne tɔ̂ popo ətshə gâ ye, tshə lï ndə kə mbrə tə̂ ye ndje mata ə̂në Jezu Kristə nə sə̂ leme-e kɔ.

7 Alaye əmə ə̂në mə yində e ngbatshe kɔ, ə də̂ ə̈bə̈ tafa âgbɔ̂ əpʉ də̂ mə sə kə ta ngrowô də əpʉ nə kə e kɔ ne, bale ə sə tə angbrɔ âgbɔ̂ əpʉ ə̂në e wûsə̂ nə kerə pə tə̂ ama nə gâ ye kɔ; angbrɔ âgbɔ̂ əpʉ səkɔ kə də̂ əpʉ sə̂ ə̂në e djî gâ ye kɔ. 8 Gâ pâ nə ndje, ə sə tə tafa âgbɔ̂ əpʉ də̂ mə ta ngrowô də əpʉ nə kə e kɔ, ə̂në əpʉ nə sə tə djatra əpʉ lə Kristə nə, ndje le e kɔ, mbrə ə̂në əbutshe sə kə ro nə â djatra ə̂yîəwo nə vɔ̂tə̂ kə tshe gâ ye.

9 Əzü ə̂në tshə pa əne sə lə ə̂yîəwo, â wəra tə̂ ye tə̂ aye nə, tshə daka pə lə əbutshe. 10 Əzü ə̂në tshə yində aye nə, tshə sə lə ə̂yîəwo nə â ə̈bə̈ ərə lə ye ndə kə pa tshə te mbrə nə guta gu ne. 11 Bale, əzü ə̂në tshelə ye wəra tə̂ ye tə̂ aye nə, tshə daka pə lə əbutshe. Tshə sə kə na ana lə əbutshe â wusə̂ ətshe ə̂në tshə na tə̂ nə kɔ wu ne, mbrə ə̂në əbutshe nə bû ala ye gâ ye.

12 Aneshe nə̂ əmə, mə ta ngrowô səye kə e, mbrə ə̂në Ndjapä gbâ tshelə anyaka lə kumu e mbrə əɨrɨ Jezu Kristə nə gâ ye. 13 Alabä, mə ta ngrowô səye kə e mbrə ə̂në e wûsə̂ ətshə ə̂në tshə sə je pə tə̂ ama nə kɔ gâ ye. Amɔdɔ, mə ta ngrowô səye kə e mbrə ə̂në e rô pâ djablo nə də awlra gâ ye.

14 Aneshe nə̂ əmə, mə ta ngrowô səye kə e, mbrə ə̂në e wûsə̂ Abä gâ ye. Alabä, mə ta ngrowô səye kə e, mbrə ə̂në e wûsə̂ ətshə ə̂në tshə sə je pə tə̂ ama nə kɔ gâ ye. Amɔdɔ, mə ta ngrowô səye kə e mbrə ə̂në e gbɔ ə gbɔ â Əpʉ Ndjapä sə tə̂ lɔsu e â e rô pâ djablo nə də awlra gâ ye.

15 E yï yïndə əmbrʉ tshepashɔ wala aərə tshepashɔ nə ne. Kədə ə̈bə̈ əzü kə yində tshepashɔ nə, tshə yində Abä yi ne. 16 Mbrə ə̂në aərə nɔ̂ ə̂në ə sə pâ ashɔ kɔ: əgo lɔsu əzü, də əgo aərə ə̂në ala əzü ə wu kɔ gâ ndə kə da əkro azü ə̂në əndje da mbrə aərə ə̂në əndje sə də nə kɔ, aərə sə̂ nɔ̂ kɔ to to mâ ndə Abä ne, bale ə to kpə pâ ashɔ səye. 17 Tshepashɔ sə kə ro nə də əgo aərə tshepashɔ nə ndje. Bale, əzü ə̂në tshə sə kə mbrə ərə ə̂në tshelə Ndjapä yində nə kɔ sə kə daka pə piii.

18 Aneshe nə̂ əmə, alɔ nglɔ̂ nɔ̂ gâ ye â a lə ye! E djî ə pa Əyïkowɔ nə̂ Kristə sə kə na gu nə. Kpəsəye alayïkowɔ nə̂ Kristə nə ngba ə ngba, â kôto də̂ a wusə̂ nə ə pa alɔ nə nglɔ̂ nɔ̂ gâ ye. 19 Əndje âfɔ lə takpa tə̂ əzə̂ â wûtu gashu kɔ, bale əndje sə sə tə djatra azü nə̂ əzə̂ ne. Mbrə ə̂në, kədə əndje sə̂ kəmə tə azü nə̂ əzə̂, əndje sə̂ kə daka pə kəmə gâ ngotə̂ əzə̂. Bale, kə ro əndje nə lə takpa tə̂ əzə̂ nə yisə̂ nə ngbʉ̂ gashu ə pa ə̈bə̈ əzü bale lə takpa tə̂ əndje sə sə tə djatra əzü nə̂ əzə̂ bale ne.

20 Ənə̂ e, e sɔ̂tə̂ Âgbɔ̂ Yîrə̂ ə̂në Kristə zâ ətshə kə e kɔ gâ ye, â e-e nɔ̂, e wûsə̂ nə gâ ye. 21 Mə tâ ngrowô nə kə e, ə də̂ mbrə ə̂në e wusə̂ djatra əpʉ nə wu ne kɔ, bale mbrə ə̂në e wûsə̂ nə gâ ye, â mbrə ə̂në ə̈bə̈ əpʉ əterə bale sə sə kə wutu lə djatra əpʉ nə ne.

22 Rəkɔ, əde kə sə tə əyïəterə nə? Ətshə kə də̂ əzü ə̂në tshə pa Jezu sə sə tə Kristə nə ne kɔ. Â əzü ə̂në tshə wəra tə̂ ye tə̂ Abä gâ ndə Ɨrɨ nə kɔ, ətshə kə sə tə əyïkowɔ nə̂ Kristə nə kɔ. 23 Əzü nɔ̂ ə̂në tshə wəra tə̂ ye tə̂ Ɨrɨ nə, tshə wə̂ra tə̂ ye ndje tə̂ Abä gâ ye. Əzü ə̂në tshə wusə̂ Ɨrɨ nə, tshə wusə̂ Abä ndje.

24 Ənə̂ e, e bäta əpʉ ə̂në e djî pə tə̂ ama nə kɔ tə̂ lɔsu e. Kədə əpʉ ə̂në e djî pə tə̂ ama nə kɔ kə sə tə̂ lɔsu e, e-e ndje, e sə kə tɔ popo Ɨrɨ nə də Abä. 25 Əpʉ ə̂në ətshə nə, tshə zâ ama də nə kə əzə̂ gâ ye kɔ kə səke: sorô nə̂ alɔnɔ̂.

26 Mə tâ ngrowô də əpʉ səkɔ kə e gâ pâ əpʉ azü ə̂në əndje djingli e kɔ. 27 Ənə̂ e, Âgbɔ̂ Yîrə̂ ə̂në Kristə nə zâ ətshə kə e gâ ye kɔ, sə tə̂ lɔsu e, â e ma ma əgo ndə kə pa ə̈bə̈ əzü yisə̂ ərə ə yi kə e ne, mbrə ə̂në Âgbɔ̂ Yîrə̂ nə sə kə yisə̂ aərə nɔ̂ kə e. Aərə ə̂në tshə yisə̂ nə kə e kɔ sə tə djatra əpʉ â ə sə sə tə əterə ne. Rəkɔ, e tɔ̈ popo Kristə nə mata ə̂në Âgbɔ̂ Yîrə̂ nə yîsə̂ äwä nə kə e gâ ye kɔ.

28 Bale, aneshe nə̂ əmə, e däka pə tə̂ kə tɔ popo ətshə, kanika, tə̂ alɔ kə gu ətshə nə, a mbrə awa mbrə ne ka gana ngɔ əzə̂ ngɔ ndə kə sə ngrʉ̂ tə̂ ye kədə tshə yi kumu ye ne.

29 Ə̂në e wusə̂ nə ə pa Kristə sə kə mbrə ərə də äwänə kɔ, e wüsə̂ nə ndje ə pa əzü nɔ̂ ə̂në tshə sə kə mbrə ərə də äwänə, Ndjapä kə zû ətshə kɔ.