1 Əzü nɔ̂ ə̂në tshə yində nə də lɔsu ye ə pa Jezu sə tə Kristə nə kɔ, tshə sə tə əgblə nə̂ Ndjapä, â əzü nɔ̂ ə̂në tshə yində Abä də Ndjapä nə, tshə yi ndje ndə aneshe nə̂ Ndjapä nə. 2 Tə̂ äwä ərə səye də̂ a sə kə wusə̂ nə ə pa a sə kə yində aneshe nə̂ Ndjapä nə: alɔ ə̂në a sə kə yində Ndjapä nə â sə kə mbrə ərə Lïndə̂ aəpʉ ə̂në tshə zâ ama də nə gâ ye kɔ. 3 Mbrə ə̂në äwä kə yində Ndjapä nə, kə də̂ kə pa a mbrə ərə ə lï də aəpʉ ə̂në tshə zâ ama də nə gâ ye kɔ. Â aəpʉ nə ə̂në tshə zâ ama də nə gâ ye kɔ, ə gbɔ gbɔ ne, 4 mbrə ə̂në əzü nɔ̂ ə̂në Ndjapä kə zû ətshə kɔ, tshə sə kə ro pâ tshepashɔ səye də awlra, â ərə nə ə̂në a rô tshepashɔ nə də nə də awlra gâ ye kɔ kə də̂ əpʉ lɔsu əzə̂. 5 Əde kə rô tshepashɔ də awlra nə gâ ye? Əzü tshî ə̂në tshə yində nə də lɔsu ye ə pa Jezu sə tə Ɨrɨ Ndjapä kɔ.

6 Ətshə, Jezu Kristə nə, kə nâ tə̂ äwä ə̂ngû də ə̈ndjï kɔ, ə də̂ kʉ də ə̂ngû nə də̂ ne, bale də ə̂ngû nə gâ ndə ə̈ndjï. Â Âgbɔ̂ Yîrə̂ kə pa ndə əpʉ nə kɔ, mbrə ə̂në Âgbɔ̂ Yîrə̂ nə sə tə djatra əpʉ nə. 7 Mbrə ə̂në əndje sə vəta â pa ndə əpʉ nə kɔ: 8 Âgbɔ̂ Yîrə̂ nə də ə̂ngû gâ ndə ə̈ndjï, â əpʉ nə̂ əndje vəta nə sə kʉ bale. 9 Kədə a sə kə dji əpʉ ə̂në azü ə pa kɔ, əpʉ ə̂në Ndjapä sə kə pa nə kɔ, ə ro ənə̂ azü nə, mbrə ə̂në əpʉ nə ə̂në Ndjapä nə ə pa kɔ, tshə pa gâ pâ Ɨrɨ nə. 10 Əzü ə̂në tshə za lɔsu ye kə Ɨrɨ Ndjapä nə, tshə sə də əpʉ səkɔ tə̂ lɔsu ye. Əzü ə̂në tshə yində əpʉ ə̂në Ndjapä nə ə pa kɔ yi də lɔsu ye ne, tshə za Ndjapä nə tə əyïəterə, mbrə ə̂në tshə za lɔsu ye za gâ pâ əpʉ nə ə̂në Ndjapä nə pâ gâ pâ Ɨrɨ nə kɔ ne. 11 Â əpʉ səkɔ ə̂në Ndjapä nə pâ kɔ kə də̂ Ndjapä nə zâ sorô nə̂ alɔnɔ̂ kə əzə̂, â sorô səkɔ sə lə Ɨrɨ nə. 12 Əzü ə̂në tshə sə də Ɨrɨ Ndjapä nə, tshə sə də sorô; əzü ə̂në tshə sə sə də Ɨrɨ Ndjapä nə ne, tshə sə sə də sorô ne.

13 Mə tâ ngrowô də əpʉ səkɔ kə e ndə kə pa e wusə̂ nə ə pa e sə də sorô nə̂ alɔnɔ̂, e-e ə̂në e za lɔsu e kə Ɨrɨ Ndjapä nə kɔ. 14 Ərə ə̂në a wusə̂ nə ngâ lə ala Ndjapä nə kɔ kə də̂, alɔ ə̂në a yu tshuku ə̈bə̈ ərə ə̂në ə lï də ərə ə̂në tshelə ye yində nə kɔ, tshə sə kə dji əzə̂. 15 Â kədə a wusə̂ nə ə pa tshə sə kə dji əzə̂, ərə nɔ̂ ə̂në a yu tshuku nə, a wusə̂ nə ə pa a sɔ̂tə̂ nə gâ ye.

16 Kədə ə̈bə̈ əzü kə wu aye nə də kə mbrə ə̈bə̈ nyaka ə̂në ə na na də ətshə gâ tə̂ äwä kuzu ne kɔ, tshə yü Ndjapä mbrə ətshə, Ndjapä nə sə kə za sorô kə aye nə nə. Əpʉ nə sə mbrə azü ə̂në əndje sə kə mbrə ə̈bə̈ nyaka ə̂në ə na na də əzü gâ tə̂ äwä kuzu ne kɔ. Ə̈bə̈ nyaka sə je ə̂në ə sə kə na də əzü trɔ kuzu, ə də̂ mbrə ənə̂ sə̂ kɔ də̂ mə pa e yu Ndjapä nə mbrə nə kɔ ne. 17 Əmbrʉ ərə nɔ̂ sə tə nyaka, â alabə̈ anyaka sə je ə̂në ə na na də əzü trɔ kuzu ne kɔ.

18 A wusə̂ nə ə pa əzü nɔ̂ ə̂në tshə sə tə əgblə nə̂ Ndjapä kɔ, tshə sə sə kə mbrə nyaka alɔnɔ̂ ne. Bale, Ɨrɨ Ndjapä nə sə kə bata ətshə, â djablo sə sə kə goro ətshə ne.

19 A wusə̂ nə ə pa a sə tə azü nə̂ Ndjapä nə, â tshepashɔ nɔ̂ sə tshekudu awlra nə̂ djablo.

20 Bale, a wusə̂ nə ndje ə pa Ɨrɨ Ndjapä nə nâ gâ ye, ə zâ kə wusə̂ ərə kə əzə̂ ndə kə pa a wusə̂ djatra Ndjapä nə. Â a sə lə djatra Ndjapä nə, lə Ɨrɨ nə də Jezu Kristə nə. Ətshə də̂ djatra Ndjapä nə də sorô nə̂ alɔnɔ̂ nə.

21 Aneshe nə̂ əmə, e bäta tə̂ e tə̂ aamba andjapä.