1 Əmə, Palɔ, mə sə tə əzü-awla nə̂ Jezu Kristə, tə̂ äwä ərə ə̂në tshelə Ndjapä yində nə kɔ, ndə kə pa mə mʉ əpʉ sorô ə̂në ə sə lə Jezu Kristə nə, ə̂në Ndjapä zâ ama də əpʉ nə gâ ye kɔ. 2 Mə wlâ ngrowô səye kə əbə Timɔte, əgblə nə̂ əmə ə̂në mə yində zə wââ kɔ. Abä də Ndjapä gâ ndə Âgbɔ̂ Əyïngerə nə̂ əzə̂ də Jezu Kristə, mbrə̈ ə̂rɔ̂tə̂ əndje kə əbə ə wü əyo zə ə zä blatshe kə əbə!

3 Mə ka katə̂ kə pa ndə zə lə aəpʉ kə yu Ndjapä nə̂ əmə, sɔ də tsheləbu sɔ də alɔ ne â sə kə za mərshe tə bandanə kə Ndjapä ə̂në mə sə kə vrɔ ətshə də lɔsu ə̂në ə sə mvo, mata ə̂në alätä əmə mbrə̂ leme-e kɔ. 4 Ə̂në mə sə kə li tshelə əmə tə̂ ngɔla zə kɔ, mə sə də əgo ngbatshe ndə kə wu əbə, ndə kə pa tshelə əmə sə də ə̂rû rô pâ nə. 5 Mə sə kə li tshelə əmə ndje tə̂ əpʉ lɔsu ə̂në bə sə də nə, ə̂në ə sə tə djatra nə kɔ, mata ə̂në ätä zə tə yashe, Lɔyisə, gâ ndə əyï zə də Ənisə sə̂ də nə əlînə kɔ; mə wûsə̂ nə mâ tə̂ lɔsu əmə ə pa marä tə̂ əpʉ lɔsu sə̂ də̂ bə sə ndje də nə kɔ.

6 Âdârə ə̂në mə sə kə pa əpʉ kə əbə ndə kə pa bə li tshelə zə gâ tə̂ əpʉ səye: pë əwo âkrâ ə̂rɔ̂tə̂ Ndjapä gâ lafɔ, ə̂në bə sɔ̂tə̂ nə tə̂ äwä kə za kəna əmə gâ pâ zə kɔ. 7 Mbrə ə̂në ə də̂ Yîrə̂ awa də̂ Ndjapä nə zâ kə əzə̂ kɔ ne, bale Yîrə̂ awlra, də ənə̂ əpʉ kə yi tə̂ gâ ndə ənə̂ kə wusə̂ kə ru tshelə tə̂ ərə də̂ tshə zâ kə əzə̂ kɔ.

8 Rəkɔ, gana mbrə̈ əbə mbrə̈ ndə kə pa bə pa əpʉ gâ pâ əpʉ nə̂ Âgbɔ̂ Əyïngerə nə̂ əzə̂ wala gâ pâ əpʉ nə̂ əmə, əmə ə̂në mə sə tə əyïkânga mbrə ətshə kɔ ne. Bale, wü əyo gâ ndə əmə mbrə Ə̂rɔ̂ Əpʉ, ə zä lɔsu zə gâ tə̂ awlra nə̂ Ndjapä. 9 Ətshə kə tshɔ̂ əzə̂ lə kuzu â ê əzə̂ ndə kə pa a sə tə azü nə̂ ye kɔ, ə də̂ mbrə aərə ə̂në a mbrə̂ kɔ də̂ tshə ê əzə̂ kɔ ne. Bale tshə ê əzə̂ ə lï də ərə ə̂në tshə gâmba mâ tə̂ lɔsu ye də ə̂tə̂ ye ndə kə mbrə nə kɔ, Lïndə̂ ə̂rɔ̂tə̂ ye ə̂në tshə mbrə̂ kə əzə̂ tə̂ äwä Jezu Kristə nə angbʉlînə ndə kə pa tshə mbrə tshepashɔ kɔ. 10 Bale kpəsəye, Ndjapä nə yîsə̂ ə̂rɔ̂tə̂ ye səkɔ gashu tə̂ äwä Awoshe əzə̂ lə kuzu, Jezu Kristə nə ə̂në tshə nâ gâ ye kɔ. Jezu Kristə nə lîwu awlra kuzu gbrä gâ ye â, tə̂ äwä Ə̂rɔ̂ Əpʉ nə, tshə yîsə̂ sorô ə̂në ə ro ro tə̂ ərə ne kɔ ngbʉ̂ gashu kə azü gâ ye.

11 Mbrə Ə̂rɔ̂ Əpʉ səkɔ də̂ Ndjapä mbrə̂ əmə tə awomʉ əpʉ, tə əzü-awla, ndje tə awoyisə̂ ərə kɔ. 12 Mbrə nə ndje də̂ mə wu aəyo səke, bale gana nə mbrə əmə mbrə ne, mbrə ə̂në mə wusə̂ əzü ə̂në mə zâ lɔsu əmə kə ətshə gâ ye kɔ. Â mə wûsə̂ nə mâ tə̂ lɔsu əmə ə pa ətshə nə, tshə sə də awlra ndə kə pa tshə bata ərə ə̂në tshə zâ gâ lə kəna əmə gâ ye kɔ ʉrrr ndjɔ gâ tə̂ bale əlo. 13 Bäta aə̂rɔ̂ aəpʉ ə̂në bə djî lə ama əmə kɔ tə ə̈bə̈ ərə ə̂në bə sə kə mbrə ərə kʉ Lïndə̂ nə, lə əpʉ lɔsu də əpʉ kə yi tə̂ ə̂në ə sə tə̂ äwä Jezu Kristə nə kɔ. 14 Bäta aâtshɔ̂ aərə nɔ̂ ə̂në Ndjapä kô gâ lə kəna zə kɔ, tə̂ äwä Âgbɔ̂ Yîrə̂ ə̂në ə sə lə əzə̂ kɔ.

15 Bə wusə̂ nə ə pa azü nɔ̂ ə̂në əndje sə lə ashɔ əgɔ Azi kɔ tshî əmə tʉ gâ ye, Fijalə gâ ndə Herəmojanə sə lə takpa tə̂ azü səkɔ. 16 Âgbɔ̂ Əyïngerə mbrə̈ ə̂rɔ̂tə̂ ye kə azü tshelə bəngʉ nə̂ Ɔnezifɔrə, mbrə ə̂në alɔnɔ̂, tshə sə kə gbɔgbɔ lɔsu əmə, â gana mbrə ətshə mbrə, mbrə əmə ə̂në mə sə lə anda kânga kɔ ne. 17 Kandää, alɔ ə̂në tshə yî kumu ye mâ Rɔmə kɔ, tshə prâ äwä əmə katshä â sɔ̂tə̂ əmə. 18 Âgbɔ̂ Əyïngerə zä äwä kə ətshə ndə kə pa tshə sɔtə̂ ə̂rɔ̂tə̂ Ndjapä tə̂ bale əlo. Əbə də ə̂tə̂ zə, bə wusə̂ nə tə ə̂rɔ̂nə ə rô azü nɔ̂, äwä ə̂në tshə mbrə̂ aə̂rɔ̂ aərə kə əmə mâ Efazə kɔ gâ ye.