1 Azü nɔ̂ ə̂në əndje sə tə akanga kɔ, əndje wü alayïnga əndje nə tə azü ə̂në əndje lï ndə kə pa əndje lʉ əndje kanika azü gu gu əɨrɨ Ndjapä də ərə ə̂në ä yisə̂ nə kɔ ne. 2 Â akanga ə̂në alayïnga əndje nə sə tə azü nə̂ Ndjapä kɔ, əndje pä pä alaye alane kə sə̂ ə za tə ə̈bə̈ ərə ndə kə katə̂ kə kpe rawa əndje ne, bale əndje mbrə̈ kosəra kə əndje ə rô pâ nə, mbrə ə̂në azü nə ə̂në əndje sə kə wu ə̂rɔ̂ nə lə kosəra nə̂ əndje nə kɔ kə də̂ azü nə̂ Ndjapä, ə̂në Ndjapä yində əndje ngbatshe kɔ.

Ərə ə̂në bə lï ndə kə pa bə yisə̂ nə ə za ama də əpʉ nə kɔ kə sə̂. 3 Kədə ə̈bə̈ əzü kə yisə̂ ə̈bə̈ ərə kpî kə azü â za ə̈bə̈ äwä kpî tə̂ adjatra aəpʉ nə̂ Âgbɔ̂ Əyïngerə nə̂ əzə̂ də Jezu Kristə nə, ndje tə̂ ərə ə̂në əndje yîsə̂ nə ə̂në ə lï də əpʉ lɔsu kɔ, 4 wuma bû ala ye gâ ye, tshə wusə̂ ərə wu bale ne, tshə sə də əmbrʉ əgo kə pa adongo ashera gâ pâ aəpʉ. Aərə səkɔ sə kə na də əpʉ kə za tshelə gâ tə̂ əzü, də akəpʉ, də əpʉ aə̂gû, də əpʉ kə lea əzü tə̂ ə̈bə̈ ərə tə ambanə, 5 də aəpʉ ashera ə̂në ə ngɔ nglɔ tə̂ ərə ne kɔ ə̂në ə sə lə takpa tə̂ azü ə̂në kə wusə̂ ərə nə̂ əndje dô tə̂ ye tə əmbrʉ nə gâ ye kɔ, ə̂në əndje wusə̂ djatra əpʉ wu bale ne kɔ. Əndje wu ənə̂ əndje ə pa kə tɔ popo Ndjapä nə sə tə ə̈bə̈ äwä kə sɔtə̂ aərə tə̂ nə.

6 Ngâ, kə tɔ popo Ndjapä nə sə tə ə̈bə̈ âgbɔ̂ äwä kə sɔtə̂ aərə tə̂ nə tə̂ əzü, kədə tshelə əzü nə sə kə mɔ tə̂ ərə ə̂në tshə sə də nə kɔ. 7 Mbrə ə̂në a nâ nâ də ə̈bə̈ ərə bale gâ pâ ashɔ ne, â äwä bale ndje a lï lï ndə kə gu na ye də ə̈bə̈ ərə bale ne. 8 Rəkɔ, kədə a sə də rəgo də ləba, ə lî də əzə̂ gâ ye. 9 Bale, azü ə̂në əndje yində kə sɔtə̂ aərə tshepashɔ ngbatshe kɔ, əndje sə kə te gâ lə ərə ə̂në ə frɔ əndje kɔ, ə te gâ lə ə̂kû, ə te gâ lə adongo aəmbrʉ aəgo əndɨ nɔ̂ ə̂në ə sə kə ndɨ əzü, ə̂në ə sə kə na də əzü gâ tə̂ äwä kuzu kɔ. 10 Mbrə ə̂në əgo ngendja sə tə əshe aəmbrʉ aərə nɔ̂. Alabə̈ azü ə̂në əndje zâ əgo ngendja nə gâ tə̂ əndje kɔ, əndje tshî äwä əpʉ lɔsu nə tʉ gâ ye, â əndje də ə̂tə̂ əndje, əndje yî tə̂ əndje gâ lə aərə ə̂në ə djîngli tshelə akrɔ əndje kɔ gâ ye.

11 Ə də̂ ənə̂ zə, əzü nə̂ Ndjapä, kpë äwä aərə səkɔ. Grɔ̈ də̂ äwä kə mbrə ərə də äwänə, äwä kə tɔ popo Ndjapä, äwä əpʉ lɔsu, äwä kə yi tə̂, äwä kə kânga lɔsu lə aərə, də äwä zɨtɨ lɔsu. 12 Mbrə̈ ə̂rɔ̂ awlra əpʉ lɔsu, ə tëgbɔ sorô nə̂ alɔnɔ̂, ə̂në Ndjapä ê əbə ndə nə kɔ, ə̂në bə pâ ndə əpʉ lɔsu zə tə ə̂rɔ̂nə lə ala azü ngbatshe ə̂në əndje sə̂ je kɔ. 13 Mə sə kə za ama kə əbə lə ala Ndjapä ə̂në tshə sə kə za sorô kə aərə nɔ̂ kɔ, ndje lə ala Jezu Kristə ə̂në tshə pâ əpʉ lɔsu tə ə̂rɔ̂nə lə ala Pasə Pilatə kɔ, 14 ndə kə pa bə bata əpʉ ama əmə ə sə sə də ə̈bə̈ əmbrʉ ərə tə̂ lɔsu zə wala də ə̈bə̈ əpʉ lə kumu zə ne, ʉrrr ndjɔ gâ tə̂ alɔ kə gu Âgbɔ̂ Əyïngerə nə̂ əzə̂ də Jezu Kristə nə. 15 Tshə sə kə gu tə̂ alɔ ə̂në Ndjapä dɨ̂ gâ ye, Ndjapä nə ə̂në tshə lï ndə kə pa azü mbe ətshə kɔ â ətshə tshî kə sə gâ pâ aərə prââ, tə Əyïngerə nə̂ alayïngerə nɔ̂, tə Âgbɔ̂ Əyïngerə nə̂ aâgbɔ̂ alayïngerə nɔ̂. 16 Ətshə tshî kə tshu tshu tə̂ ərə ne, ətshə ə̂në tshə mbrə əgɔ lə ə̂yîtshe ə̂në əzü lï lï kə na gâ tə̂ nə ne kɔ, ətshə ə̂në əzü bale wû ətshə wû ne wala lï lï ndə kə wu ətshə ne kɔ. Kə lʉ ətshe gâ ndə awlra nə̂ alɔnɔ̂ sə̈ tə ənə̂ ye! Asərəmə!

17 Zä ama kə alayï kə sə də aərə tshepashɔ ndə kə pa əndje da əkro əndje da ne, ə za lɔsu əndje za gâ pâ aərə ə̂në ə sə kə ro ə ro kɔ ne, bale əndje zä lɔsu əndje gâ pâ Ndjapä ə̂në tshə sə kə ko aərə nɔ̂ kə əzə̂ tə ambanə ndə kə pa a sə də ə̂rû tə̂ äwä nə kɔ. 18 Əndje mbrə̈ ə̂rɔ̂ ərə, əndje sə̈ tə alayïrishi kə mbrə aə̂rɔ̂ aərə ngbatshe, əndje sə̈ tə alayïâkrâ ə tö aərə kə azü. 19 Rəkɔ, əndje sə kə ngbo aərə gâ tə̂ nə mbrə əndje mbrə tshe dambʉ mata ə̈bə̈ agrɔ ə̂në ə̈nü nə sə nge nge nge kɔ, kanika əndje sɔtə̂ djatra sorô.

20 Wââ Timɔte, bäta ərə ə̂në əndje zâ gâ lə kəna zə gâ ye kɔ. Kätə̂ äwä aəpʉ tshelə ama ə̂në ə tɔ tɔ gâ tə̂ ə̈bə̈ ərə bale ne kɔ, ə̂në ə lï lï də əpʉ lɔsu ne kɔ, də aəpʉ ashera nə̂ azü ə̂në əndje pa alane wusə̂ ərə kɔ â ə sə sə tə djatra kə wusə̂ ərə ne kɔ. 21 Alabə̈ azü ə̂në əndje wu ə pa alane sə də kə wusə̂ ərə səkɔ, əndje rô ngrʉ̂ tə̂ äwä əpʉ lɔsu nə gashe gâ ye.

Ə̂rɔ̂tə̂ Ndjapä sə̈ də e!