1 Bale, Âgbɔ̂ Yîrə̂ pa orâ ə pa tə̂ alɔ kə nglɔ tshepashɔ, alabə̈ azü sə kə tshi äwä əpʉ lɔsu tʉ ndə kə pa əndje tɔ popo aafrɔ ayirə̂ ə za äwä kə yisə̂ aərə nə̂ əndje nə. 2 Aawoyisə̂ aəpʉ əterə, ə̂në lɔsu əndje wusə̂ ə̂rɔ̂ ərə wu ne kɔ, mbrə ə̂në lɔsu əndje sə də ndrokɔ əmbrʉ ərə gâ ye a pa də kowɔ ə̂në ə drô ngirə kɔ kə sho lɔsu əndje nə kɔ, əndje sə kə frɔ azü səkɔ də aəpʉ tshelə ama əndje ə̂në ə sə bishi bishi kɔ. 3 Əndje shera azü ndə kə pa əndje ko tə̂ əndje ko ə za ama ndə kə pa azü zɨ alabə̈ arəgo zɨ, arəgo ə̂në Ndjapä mbrə̂ gâ ye kɔ ndə kə pa azü ə̂në əndje wusə̂ Ndjapä ə wusə̂ djatra əpʉ kɔ, əndje zɨ də kə za mərshe kə Ndjapä nə kɔ. 4 Kandää, aərə nɔ̂ ə̂në Ndjapä mbrə̂ gâ ye kɔ, ə sə tə ə̂rɔ̂nə, â ə̈bə̈ ərə bale ndə kə pa əzü wəra tə̂ ye tə̂ nə guta gu ne, bale əzü lï ndə kə pa tshə zɨ ə za mərshe kə Ndjapä, 5 mbrə ə̂në Əpʉ Ndjapä də kə yu Ndjapä mbrə̂ aərə nɔ̂ mvo gâ ye.

6 Kədə bə sə kə yisə̂ əpʉ səkɔ nɔ̂ kə alaye, bə sə kə sə tə ə̂rɔ̂ əyïkosəra nə̂ Jezu Kristə, bə sə kə yisə̂ nə ə pa aəpʉ lɔsu gâ ndə ə̂rɔ̂ kə yisə̂ ərə ə̂në bə mbrə tə̂ zə alɔnɔ̂ Lïndə̂ nə kɔ kə sə̂ â gbɔgbɔ əbə kɔ. 7 Bale, wə̈ra tə̂ zə tə̂ andəmaterə ə̂në ə sə kʉ tə aamba aəpʉ, ə̂në ə sə kpî tə̂ əpʉ lɔsu kɔ. Bale, trä tə̂ zə tə̂ äwä kə tɔ popo Ndjapä. 8 Mbrə ə̂në kə tra tə̂ əzü lə akwa ye tɔ gâ tə̂ ə̂rɔ̂ ərə kʉ teashe, bale kə za tə̂ əzü nɔ̂ kə Ndjapä sə kə tɔ gâ tə̂ aə̂rɔ̂ aərə nɔ̂: ə zâ ama də əpʉ sorô kə əzü nə mbrə tshe kpəsəye də tshe dambʉ. 9 Əpʉ səkɔ sə tə djatra əpʉ ə̂në ə lï ndə kə pa azü nɔ̂ yində nə də lɔsu əndje nɔ̂. 10 Mbrə ə̂në a za lɔsu əzə̂ gâ pâ Ndjapä ə̂në tshə sə tə sorô kɔ, ə̂në tshə sə tə Awoshe azü nɔ̂, dîrî dîrî azü ə̂në əndje za lɔsu əndje kə Ndjapä kɔ, â sə kə mbrə kosəra ngbatshe ə sə kə mbrə awlra kɔ. 11 Əpʉ ə̂në bə lï ndə kə pa bə za ama də nə ə yisə̂ nə kɔ kə sə̂.

12 Mbrə̈ ndə kə pa ə̈bə̈ əzü bale wu wu əbə lə ala ye tə əgblə ne, bale sə̈ tə ə̈bə̈ ə̂rɔ̂ ərə tə̂ äwä əpʉ ama zə də kə mbrə tə̂ zə də kə yində azü də əpʉ lɔsu zə də äwä kə sə əbə mvo ndə kə pa azü ə̂në əndje zâ lɔsu əndje kə Ndjapä gâ ye kɔ, əndje wu ə mbrə tə̂ əndje mata əbə. 13 Ʉrrr ndjɔ gâ tə̂ əlo kə gu əmə, zä lɔsu zə gâ pâ kə dɨ Fraka nə̂ Ndjapä kə azü nɔ̂, gâ pâ əpʉ kə gbɔgbɔ lɔsu azü, gâ pâ kə yisə̂ ərə kə əndje. 14 Dö tshepa zə dö gbo âkrâ ə̂në Ndjapä zâ kə əbə lə ə̂rɔ̂tə̂ ye, ə̂në ə sə lə zə kɔ ne, ə̂në tshə zâ kə əbə tə̂ äwä ndəma ye, alɔ ə̂në aangbɔ aâgbɔ̂ azü kô kəna əndje gâ pâ zə kɔ. 15 Zä lɔsu zə gâ tə̂ əpʉ səkɔ, ə zä tə̂ zə nɔ̂ gâ tə̂ kosəra nə, kanika azü nɔ̂ wu ə pa bə sə kə gerə lə əpʉ lɔsu nə je. 16 Ala zə gbɔ̈ tə̂ zə də ə̂tə̂ zə, ndje tə̂ äwä kə yisə̂ ərə nə̂ zə; gbɔ̈ də äwä aərə səkɔ nɔ̂. Mbrə ə̂në kədə bə mbrə rə, bə sə kə tshɔ tə̂ zə də ə̂tə̂ zə lə kuzu də azü ə̂në əndje sə kə dji əbə kɔ.