1 Ngä ngä kə yawaza koshe ne, bale pä əpʉ kə ətshə mata abä zə, ə pä əpʉ kə amɔdɔ mata alaye zə, 2 ə pä əpʉ kə yawaza yashe mata əyï zə, ə pä əpʉ kə alamvera mata alakobɔ zə, mbrə̈ rə də lɔsu ə̂në ə sə mvo nɔ̂ kɔ.

3 Gä ndə ayashe koya, əndje ə̂në əndje sə tə djatra ayashe koya nə kɔ. 4 Kədə ə̈bə̈ yashe koya kə sə də aneshe wala alätä nə, əndje mända angbʉlînə ndə kə pa əndje mbrə ərə tə̂ äwä əpʉ Ndjapä lə anda nə̂ əndje də ə̂tə̂ əndje, ə kïrə də ərə ə̂në alabä əndje də alayï əndje mbrə̂ kə əndje kɔ, mbrə ə̂në ərə ə̂në ə fʉ lə ala Ndjapä kɔ kə sə̂. 5 Djatra yashe koya, ətshə nə ə̂në tshə sə kʉtə̂ ye kɔ, tshə zâ lɔsu ye gâ pâ Ndjapä ə sə kə gbɔ də äwä kə yu Ndjapä də kə kɨ ə̂sə̂ əyo tə̂ ye kə Ndjapä nə sɔ də tsheləbu sɔ də alɔ. 6 Bale, ətshə nə ə̂në tshə sə kə grɔ äwä aərə ə̂në ə fʉ ə fʉ tə̂ ye kɔ, tshə tshû gâ ye, ə̂në tshə daka pə tə sorô kɔ. 7 Əpʉ ə̂në bə lï ndə kə pa bə za ama də nə kə ayashe koya nə kɔ kə sə̂, kanika ə̈bə̈ əpʉ bale sə sə lə kumu əndje ne. 8 Kədə ə̈bə̈ əzü kə bata alayɔ nə bata, dîrî dîrî azü tshelə anda nə̂ ye ne, tshə tshî äwä əpʉ lɔsu tʉ gâ ye â sə tə əmbrʉ əzü ə rô əzü ə̂në tshə wusə̂ Ndjapä wu ne kɔ.

9 Ndə kə pa bə za əɨrɨ ə̈bə̈ yashe koya gâ lə takpa tə̂ ayashe koya nə, ayə nə sə̈ də ə̂ngû zazü vəta gâ ye kane, ə sə̈ ətshinə də koshe kʉ bale; 10 azü wüsə̂ aə̂rɔ̂ aərə ə̂në tshə mbrə̂ gâ ye kɔ: tshə bâta aneshe gâ ye, tshə kô ayirə gâ lə anda nə̂ ye gâ ye, tshə yûtu aə̈nü azü nə̂ Ndjapä gâ ye, tshə gâ ndə azü ə̂në əndje sə̂ lə aərə əyo kɔ gâ ye, ə zâ tə̂ ye gâ tə̂ kə mbrə adongo aə̂rɔ̂ aərə nɔ̂ gâ ye.

11 Bale, wə̈ra tə̂ zə ndə kə ko əɨrɨ ayashe koya ə̂në əndje daka pə tə alamvera kɔ; mbrə ə̂në, alɔ ə̂në aəgo lɔsu əndje sə kə sɔ əndje gashe tə̂ Kristə nə, əndje sə kə ma əgo kə ko akoshe 12 â əndje sə kə za əpʉ gâ lə kumu əndje mbrə kə ndjɔ tshelə əpʉ ama əndje ə̂në əndje zâ ətshinə gâ ye kɔ.* 13 Â gâ pâ ərə səkɔ, əndje sə sə də ə̈bə̈ ərə kə mbrə nə ne, â əndje wusə̂ kə na kʉ lə manda bale bale na na ye; ə də̂ kʉtə̂ əpʉ adɔ nə də̂ ne, əndje sə də əpʉ lə ama əndje ngbatshe ə sə kə yi ama əndje gâ lə əpʉ nɔ̂, ə sə kə pa əpʉ ərə ə̂në əzü lï lï kəmə kə pa ndə nə ne kɔ. 14 Rəkɔ, mə yi ənə̂ əmə ndə kə pa ayashe koya ə̂në əndje daka pə tə alamvera kɔ kö akoshe, ə zü aneshe, ə sə̈ tə aə̂rɔ̂ ayashe anda, ndə kə pa əndje za äwä za kə alayïəpʉ nə̂ əzə̂ ndə kə pa əmbrʉ əpʉ də əɨrɨ əzə̂ ne. 15 Mbrə ə̂në alabə̈ ayashe koya tshî äwä lɔsu tʉ ə zâ äwä Sataa gâ ye. 16 Kədə ə̈bə̈ yashe tə əzü nə̂ Ndjapä kə sə də ayashe koya lə bəngʉ nə̂ ye, tshə bäta əndje ə zä kongbɔ nə zä gâ pâ Laglizə nə ne, kanika Laglizə nə mbrə kə əndje ənə̂ sə̂ ə̂në əndje sə tə djatra ayashe koya nə kɔ.

17 Aâgbɔ̂ azü ə̂në əndje sə kə yisə̂ äwä kə Laglizə nə tə ə̂rɔ̂nə kɔ, azü nə wü əndje lə ala əndje tə azü ə̂në əndje lï də kə lʉ əndje äwä bishi, dîrî dîrî əndje ənə̂ sə̂ ə̂në əndje sə kə mbrə kosəra ngbatshe ə sə kə pa Əpʉ Ndjapä kə azü nə â sə kə yisə̂ ərə kə əndje kɔ. 18 Mbrə ə̂në Fraka nə̂ Ndjapä pa: «Bə sə sə kə i ama pagra ə̂në tshə sə kə do tshelə aə̂lê rəgo kɔ gâ tə̂ nə ne.»* Ə pâ kwatəndje ə pa: «Əyïkosəra lï ndə kə pa tshə sɔtə̂ ngendja kosəra nə̂ ye.»* 19 Yï yïndə ə̈bə̈ əpʉ kə lea ə̈bə̈ âgbɔ̂ əzü Laglizə nə ne, kədə azü bishi wala vəta kə pa gâ ye kane bə yində nə. 20 Aâgbɔ̂ azü nə ə̂në əndje sə kə ma nyaka, ngä kə əndje lə ala azü nɔ̂, kanika awa mbrə ndje ə̂dû əndje nə ndə kə mbrə əmbrʉ ərə.

21 Mə sə kə za ama kə əbə, lə ala Ndjapä, lə ala Jezu Kristə ndje lə ala atrawaya nə̂ Ndjapä ə̂në tshə kê əndje gâ ye kɔ, ndə kə pa bə mbrə ərə ə lï də aâgbɔ̂ aəpʉ səkɔ, ə të të gâ ndə ə̈bə̈ əzü wala ə wü tshelə azü ə wü ka ə mbrə ə̈bə̈ ərə ne. 22 Zä kəna zə zä diawû diawû gâ pâ ə̈bə̈ əzü ne, të të gâ ndə ə̈bə̈ əzü lə anyaka nə̂ ye ne. Ə̈bə̈ də ə̂tə̂ zə, bäta tə̂ zə mvo.

23 Kätə̂ äwä kə ndju kʉtə̂ ə̂ngû gâ ye, bale ndjü duva teashe teashe mbrə tshelə zə nə, mbrə ə̂në ə sə kə ka əbə alɔnɔ̂ kɔ.

24 Anyaka nə̂ alabə̈ azü, azü sə kə wusə̂ nə kʉ katshä angbʉlînə ndə kə pa əndje wa ngbanga gâ pâ əndje. Bale, ənə̂ alabə̈ azü nə, ʉrrr gâ mandânə gâ ye də̂ azü sə kə wusə̂ nə. 25 Äwä bale ndje, aə̂rɔ̂ aərə ə̂në əzü mbrə, azü sə kə wu katshä də ala əndje, bale aənə̂ sə̂ ə̂në azü sə sə kə wu nə katshä ne kɔ, ə lï lï ndə kə daka pə lə əbutshe ne.