1 Ə sə tə ə̂rɔ̂nə ndə kə pa bə wusə̂ ərə səye: tə̂ bale aəlo tshepashɔ, alɔ nə sə kə sə tə əmbrʉnə. 2 Mbrə ə̂në azü sə kə sə tə alayïkpütü, tə azü kə ma əgo ngendja rô pâ nə, tə alayïwuma, tə alayïgbama, tə aawogu Ndjapä, tə aawodji əpʉ ama alabä əndje də alayï əndje dji ne, tə azü ə̂në əndje wusə̂ ə̂rɔ̂ ərə ə̂në azü ə mbrə kə əndje kɔ wu ne, tə azü ə̂në əndje kpe rawa aərə nə̂ Ndjapä kpe ne kɔ. 3 Əndje sə sə kə sə də lɔsu əzü ne, ə wu əyo angâ əndje wu ne, ə sə kə pa tə̂ angâ əndje, ə wusə̂ kə ru tshelə əndje tə̂ ərə wu ne, ə sə kə gi əyo tə̂ angâ əndje, ə sə tə alayïkowɔ nə̂ ə̂rɔ̂ ərə. 4 Əndje sə kə sə tə aawoka angâ əndje, tə aawombrə ərə ə tegbɔ kumu əndje tegbɔ ne, tə azü ə̂në wuma bû ala əndje gâ ye kɔ, əndje sə kə yində aərə ə̂në ə fʉ ə fʉ tə̂ əndje kɔ ə rô Ndjapä. 5 Əndje sə kə mbrə ərə a pa də əndje tɔ̂ popo Ndjapä gâ ye, kandää, əndje sə kə tshi äwä awlra əpʉ lɔsu nə tʉ. Dö tshepa zə gbo marä tə̂ azü səkɔ! 6 Alabə̈ azü nə sə je lə takpa tə̂ əndje ə̂në əndje sə kə na lə abəngʉ na na ye, ndə kə pa də aə̂kû nə̂ əndje, əndje ko ayashe ə̂në lɔsu əndje gbɔ gbɔ ne kɔ, ə̂në anyaka rô pâ nə lə kumu əndje gâ ye kɔ â adongo aəgo aərə sə kə ko əndje ə ro də əndje kɔ, 7 ə̂në əndje sə kə manda aərə alɔnɔ̂, bale əndje lï lï ndə kə tɔ gâ tə̂ äwä kə wusə̂ djatra əpʉ alɔ bale ne kɔ. 8 Äwä bale, mata ə̂në Janasə də Jambrasə wə̂ra tə̂ əndje tə̂ əpʉ ama Mayïzə kɔ, azü səkɔ sə kə wəra tə̂ əndje tə̂ djatra əpʉ nə. Kə wusə̂ ərə nə̂ əndje dô tə̂ ye tə əmbrʉ nə gâ ye â əpʉ lɔsu əndje nə tɔ tɔ gâ tə̂ ə̈bə̈ ərə bale ne. 9 Bale, əndje sə sə kə na ngrʉ̂ ne mbrə ə̂në azü nɔ̂ sə kə wusə̂ əndɨ əndje, mata ə̂në azü wûsə̂ əndɨ Janasə də Jambrasə gâ ye kɔ.

10 Bale ənə̂ zə, bə zâ äwä əmə gâ ye lə aərə nɔ̂: lə äwä kə yisə̂ aərə nə̂ əmə, lə äwä kə mbrə tə̂ əmə, lə aərə ə̂në mə yində kə mbrə nə kɔ, lə əpʉ lɔsu əmə, lə kə kânga tshelə əmə, lə kə yi tə̂ nə̂ əmə, lə kə ru tshelə əmə ə ru lə aərə, 11 lə əyo ə̂në azü gî tə̂ əmə, də əyo ə̂në mə wû mâ Atiɔshə, mâ Ikɔniɔmə, mâ Listrə kɔ. Əyo ənə̂ta də̂ mə wû wû ne! Â lə aərə əyo sə̂ nɔ̂, Âgbɔ̂ Əyïngerə djɔ̂ əmə gâ ye. 12 Ngâ, azü nɔ̂ ə̂në əndje sə kə mbrə tə̂ əndje tə̂ äwä kə tɔ popo Ndjapä tə̂ äwä Jezu Kristə nə kɔ, azü sə kə gi əyo tə̂ əndje. 13 Bale, aəmbrʉ azü gâ ndə aawofrɔ azü sə kə na na ye alɔnɔ̂ gâ ətshinə lə əmbrʉ ərə, â sə kə frɔ azü, â sə kə frɔ tə̂ əndje də ə̂tə̂ əndje. 14 Bale ənə̂ zə, däka pə tə̂ äwä ərə ə̂në bə mânda gâ ye kɔ, ə̂në bə wûsə̂ nə mâ tə̂ lɔsu zə ə pa ə sə tə djatra əpʉ kɔ. Bə wûsə̂ azü nə ə̂në əndje yîsə̂ nə kə əbə kɔ gâ ye. 15 Kerə pə lə əgblə tə̂ zə, bə wûsə̂ Fraka nə̂ Ndjapä gâ ye; ə lï ndə kə pa ə za äwä kə wusə̂ âdâ ərə kə əbə, ə̂në ə sə kə yisə̂ äwä kə she lə kuzu tə̂ äwä əpʉ lɔsu ə̂në bə zâ kə Jezu Kristə nə kɔ. 16 Əpʉ nɔ̂ lə Fraka nə̂ Ndjapä tô lə ama Ndjapä də ə̂tə̂ ye, â ə lï ndə kə yisə̂ ərə kə əzü, ə yisə̂ əmbrʉ ərə ə̂në əzü mbrə kɔ kə ətshə, ə kirə də əzü gâ tə̂ ə̂rɔ̂ äwä, ə yisə̂ äwä kə mbrə ərə də äwänə kə əzü, 17 ndə kə pa əzü nə̂ Ndjapä gamba tə̂ ye ə sə də aərə nɔ̂ ndə kə mbrə də ə̂rɔ̂ kosəra nɔ̂.