1 E-e ndje, ayashe, e djï əpʉ ama aläkɔ̈ e, kanika, kədə alabə̈ aläkɔ̈ e nə kə wəra tə̂ əndje ndə kə yində Əpʉ Ndjapä də lɔsu əndje, əndje za lɔsu əndje kə Ndjapä nə mbrə kə mbrə tə̂ alawɔ əndje nə, ə̂në əzü pa əpʉ pa kə əndje ne kɔ, 2 ə̂në əndje wu kə mbrə tə̂ e ə̂në ə sə də äwänə kɔ â e sə kə lʉ Ndjapä nə kɔ. 3 Gao nə̂ e sə̈ sə̈ tə gao tshekotə̂ e gashu ne: kə ngbo sukumu e tə aya nə, adongo aərə gao lɔrə gâ ndə aə̂rɔ̂ aləba. 4 Bale, gao nə̂ e nə sə̈ djoko lə nə, mâ tə̂ lɔsu e, gao nə kə də̂ lɔsu ə̂në ə sə ngboo ə sə lə blatshe, gao rə kə ro ro tə̂ ərə ne kɔ; ərə ə̂në ə sə tə âgbɔ̂ ərə lə ala Ndjapä kɔ kə sə̂. 5 Rə də̂ ayashe tshe leme-e, ə̂në əndje sə̂ kpî mbrə Ndjapä ə zâ lɔsu əndje gâ pâ Ndjapä nə kɔ, əndje sə̂ kə mbrə gao kɔ â sə̂ kə dji əpʉ ama aläkɔ̈ əndje kɔ, 6 mata Sara ə̂në tshə sə̂ kə dji əpʉ ama Abraamo ə sə̂ kə e ətshə tə âgbɔ̂ əzü nə̂ ye kɔ. E dô tə̂ e kpəsəye tə aneshe yashe nə̂ ye gâ ye, ə̂në e sə kə mbrə ə̂rɔ̂ ərə â awa ə̈bə̈ ərə bale toworo e toworo lə kə mbrə ərə nə ne kɔ.

7 E-e də̂ akoshe, äwä bale ndje, e gä ndə alawɔ e lə kə sə e də aəndje bale, ə wusə̂ nə ə pa yashe mɔ ə mɔ ngbatshe tə̂ koshe. E lʉ̈ əndje mbrə ə̂në, mata e, əndje sə kə sɔtə̂ sorô ndje lə ə̂rɔ̂tə̂ Ndjapä nə. E mbrə̈ rə kanika ə̈bə̈ ərə kânga äwä kânga tə̂ aəpʉ ə̂në e pa kə Ndjapä nə kɔ ne.

8 Ə̂dû əpʉ nə, əpʉ lɔsu e sə̈ kʉ bale, e wü angâ e tə azü, ə yï tə̂ e tə alaye azü, ə mbrə̈ ə̂rɔ̂tə̂ e kə angâ e ə ngʉ̈ tə̂ e ətshi angâ e. 9 E mbrə̈ mbrə̈ əmbrʉ ərə mandâ əmbrʉ ərə ne, ə gü ə̂gû gü mandâ ə̂gû ne, bale e tö ngwarə gâ pâ azü, mbrə ə̂në mbrə nə də̂ Ndjapä ê e kɔ, kanika tshə to ngwarə gâ pâ e. 10 Mbrə ə̂në, Fraka nə̂ Ndjapä pâ:

«Kədə ə̈bə̈ əzü kə yində ə̂rɔ̂ kə sə ətshə lə sorô tə̂ ye,

â yində kə wu aəlo ye pâ ashɔ lə ə̂rû,

tshə bäta ama ye tə̂ əmbrʉ əpʉ,

ə bäta ama ye tə̂ aəpʉ kə frɔ ətshe;

11 tshə kätə̂ äwä əmbrʉ ərə ə mbrə̈ ə̂rɔ̂ ərə;

tshə prä äwä blatshe ə grɔ̈ äwä nə.

12 Mbrə ə̂në ala Əyïlingû sə gâ pâ aə̂rɔ̂ azü

â tshə sə kə dra ətu ye ndə kə dji aəpʉ nə̂ əndje,

bale Əyïlingû sə kə wəra tə̂ ye tə̂ azü ə̂në əndje sə kə mbrə əmbrʉ ərə kɔ.»*

13 Rəkɔ, əde kə gi əyo tə̂ e, kədə e ma əgo kə mbrə ə̂rɔ̂ ərə? 14 Bale, kədə e wu əyo kəmə mbrə kə mbrə ərə də äwänə, ənə̂ e tə ə̂rɔ̂nə! E mbrə̈ mbrə̈ awa azü bale ne, ə kätə̂ äwä kä kə ə̈bə̈ ərə ə djingli tshelə akrɔ e ne. 15 Bale, mâ tə̂ lɔsu e, e lʉ̈ Kristə nə tə Âgbɔ̂ Əyïngerə. E gämba tə̂ e alɔnɔ̂ ndə kə pa e a ama e ə pa əpʉ kə əzü ə̂në tshə sə kə yu e gâ pâ əpʉ ərə ə̂në e za lɔsu e gâ pâ nə kɔ. 16 Bale, e pä əpʉ nə də ə̂rɔ̂ ama ə lʉ̈ əzü nə, ə sə̈ də ə̂rɔ̂ lɔsu, kanika, azü ə̂në əndje sə kə lea e tə̂ ə̈bə̈ əpʉ ə sə kə gu e mbrə ə̂në e sə kə mbrə tə̂ e tə ə̂rɔ̂nə tə azü nə̂ Kristə nə kɔ, gana ngɔ̈ əndje. 17 Mbrə ə̂në ə sə tə ə̂rɔ̂nə ndə kə pa əzü mbrə ə̂rɔ̂ ərə ə wu əyo, kədə Ndjapä kə yində nə rə, ə ro ndə kə pa əzü nə mbrə əmbrʉ ərə ə wu əyo.

18 Ngâ, Kristə nə də ə̂tə̂ ye tshû* äwä bale gbrä mbrə anyaka gâ ye, ətshə, ə̂rɔ̂ əzü, tshə tshû mbrə azü ə̂në əpʉ sə lə kumu əndje kɔ, ndə kə pa tshə ko e ə gu də e kə Ndjapä. Əndje wô əndu ye, bale Âgbɔ̂ Yîrə̂ shê ətshə â tshə sə tə sorô. 19 Tə̂ äwä Âgbɔ̂ Yîrə̂ nə də̂ tshə nâ na ye ndje ə mʉ̂ əpʉ kə akuzu ə̂në əndje sə̂ lə kânga kɔ, 20 kə azü ə̂në, leme-e, əndje wə̂ra tə̂ əndje ndə kə dji əpʉ ama Ndjapä, alɔ ə̂në Ndjapä nə kânga tshelə ye ə ka mbrə əndje kɔ, tə̂ alɔ ə̂në Nɔwe sə̂ kə mbrə bato ə̂në azü kʉ klangbandja nə, mindû amanə vəta, lî gâ lə nə â Ndjapä tshɔ̂ əndje lə kuzu lə ə̂ngû kɔ. 21 Ə sə tə ə̈bə̈ ərə ə̂në ə yisə̂ nə ə pa batamo sə kə tshɔ e lə kuzu kpəsəye, tə̂ äwä kə she Jezu Kristə nə. Ə sə sə tə batamo kə yutu əbru tə̂ tshekotə̂ əzü ne, bale ə sə tə kə za tə̂ əzü kə Ndjapä də lɔsu ə̂në ə sə mvo kɔ. 22 Jezu Kristə nə gû mâ lafɔ gâ ye, ə sə gâ tʉ gâ ndə ndəkɔ Ndjapä â atrawaya nə̂ Ndjapä də ayirə̂ ə̂në əndje sə də ngerə gâ ndə əndje nə sə̂ ə̂në əndje sə də awlra kɔ sə gâ tshekudu ye.