1 Əmə, Piarə, əzü-awla nə̂ Jezu Kristə, mə ta ngrowô səye kə azü ə̂në Ndjapä kê əndje gâ ye kɔ, ə̂në əndje ndjɔ̂ tshelə əndje ə sə tə atshângâ ə sə lə ashɔ aəgɔ Pɔ də Galasi də Kapadɔsə də Azi gâ ndə Bitini* kɔ. 2 Abä də Ndjapä kê e ətshinə gâ ye ə lï də ərə ə̂në tshə gâmba angbʉlînə gâ ye kɔ. Tshə kô e kpî gashe tə̂ äwä Yîrə̂ ye ndə kə pa e dji əpʉ ama Jezu Kristə, ka ə̈ndjï ye ə̂në ə tû gâ ye kɔ yutu e mvo.

Ndjapä mbrə̈ ə̂rɔ̂tə̂ ye ə zä blatshe kə e gâ pâ nə gâ pâ nə!

3 A tɔ̈lɔ Ndjapä, Abä Âgbɔ̂ Əyïngerə nə̂ əzə̂ də Jezu Kristə! Tshə wû əyo əzə̂ ro pâ nə, â zû əndʉ əzə̂ tə̂ äwä kə she Jezu Kristə lə takpa tə̂ akuzu, ndə kə pa a za lɔsu əzə̂ gâ pâ ə̈bə̈ ərə ə̂në ə sə kə za sorô kə əzü kɔ. 4 A sə kə ka mbrə aə̂rɔ̂ aərə ə̂në tshə gâmba gâ ye kɔ ə̂në ə ndɨ ndɨ tə̂ ərə ne wala ə̈bə̈ sə sə kə dja tshekotə̂ nə ne wala ə ro ro tə̂ ərə ne kɔ, ə̂në tshə bâta mâ lafɔ mbrə e kɔ, 5 e-e ə̂në awlra nə̂ Ndjapä sə kə bata e kɔ, tə̂ äwä əpʉ lɔsu e ə̂në e za kə ətshə kɔ, ndə kə pa tshə she e lə kuzu. Tshə sə kə yisə̂ nə gashu tə̂ aə̂dû aəlo.

6 Rəkɔ, e sə̈ də ə̂rû ro pâ nə tə̂ lɔsu e, kədə ə lï kəmə ndə kə pa e sə koyo, kpəsəye lə alabə̈ aə̈ndö aəlo, tə̂ äwä aərə əyo kpî kpî kpî, 7 ndə kə pa aərə səkɔ tra ə wu ə̂rɔ̂ əpʉ lɔsu e. Lɔrə sə tə ərə ə̂në ə sə kə ro ə ro, bale əndje sə kə za gâ ala əwo ndə kə wu ə̂sə̂ ə̂rɔ̂ nə; əpʉ lɔsu e nə ə̂në ə ru ə ru lə aərə kə tra e nə kɔ ə sə tə âgbɔ̂ ərə ə rô lɔrə nə gâ ye. Alɔ ə̂në Jezu Kristə sə kə yi kumu ye, əpʉ lɔsu e nə sə kə sə tə ərə ə̂në Ndjapä ə tɔlɔ e ə mbe e ə lʉ e tə̂ äwänə je. 8 Ətshə Jezu nə, e wû ətshə wû ne, bale e sə kə yində ye. Ə̂në a lə ye, e wu ətshə wu ne, bale e za lɔsu e kə ətshə, â e sə də âgbɔ̂ ə̂rû ə̂në ə rô pâ nə, ə̂në əzü lï lï ndə kə pa ndə əpʉ nə ə pa ne kɔ, 9 mbrə ə̂në e sə kə sɔtə̂ äwä kə she lə kuzu mandâ əpʉ lɔsu e nə.

10 Aawopandəma Ndjapä prâ âdâ əpʉ kə she lə kuzu səkɔ ə yû aəpʉ gâ pâ nə. Əndje mʉ̂ ətshinə əpʉ ə̂rɔ̂tə̂ Ndjapä nə ə̂në ə sə mbrə e kɔ gâ ye. 11 Yîrə̂ Kristə nə ə̂në ə sə̂ lə əndje kɔ pâ ndə əpʉ aəyo ə̂në Kristə nə ə wu je kɔ də ə̂yî ə̂në tshə sɔtə̂ nə mandânə je kɔ ətshinə gâ ye. Bale, əndje prâ äwä ndə kə pa əndje wusə̂ alɔ aərə nə də äwä ə̂në ə wutu də nə je kɔ. 12 Ndjapä yîsə̂ nə kə əndje ə pa əpʉ nə ə̂në əndje yîsə̂ nə kɔ sə̂ sə̂ mbrə əndje də ə̂tə̂ əndje ne, bale ə sə mbrə e. Kpəsəye, aawomʉ Ə̂rɔ̂ Əpʉ yîsə̂ əpʉ səkɔ kə e, ə̂në əndje pâ əpʉ nə də awlra nə̂ Âgbɔ̂ Yîrə̂ ə̂në ə tô mâ lafɔ kɔ. Bale, əpʉ səkɔ, atrawaya nə̂ Ndjapä də ə̂tə̂ əndje yîndə kə wusə̂ nə.

13 Rəkɔ, e sə̈ trö ndə kə mbrə ərə, e sə̈ də ə̈kü ala e, e zä lɔsu e nɔ̂ gâ pâ ə̂rɔ̂tə̂ Ndjapä ə̂në tshə sə kə mbrə kə e alɔ ə̂në Jezu Kristə ə yi kumu ye je kɔ. 14 Mata aneshe kə dji əpʉ ama, e mbrə̈ tə̂ e mbrə̈ Lïndə̂ aəgo aərə ə̂në e sə̂ də nə leme-e ətshinə kɔ ne, alɔ ə̂në e tê tê pa ə wusə̂ ərə ne kɔ. 15 Bale, mata ə̂në Ndjapä ə̂në tshə ê e kɔ sə kpî kɔ, e-e ndje, e sə̈ kpî lə kə mbrə tə̂ e nɔ̂. 16 Mbrə ə̂në Fraka nə̂ Ndjapä pâ: «E sə̈ kpî, mbrə ə̂në əmə, mə sə kpî.»*

17 Bale, kədə, ətshə ə̂në tshə sə sə kə wu tshelə azü ə wu ə wu â wa ngbanga əzü bale bale ə lï də aərə ə̂në əzü nə mbrə kɔ ne kɔ də̂ e sə kə e ətshə tə Abä, e mbrə̈ tə̂ e də kə kpe awa ye lə kə sə e pâ ashɔ. 18 E wüsə̂ nə ə pa ə də̂ tə̂ äwä aərə ə̂në ə ndɨ ə ndɨ kɔ, mata ngendja wala lɔrə, də̂ Ndjapä djɔ̂ e lə kə mbrə tə̂ e ə̂në ə tɔ tɔ gâ tə̂ ə̈bə̈ ərə bale ne kɔ ne, ə̂në e za angwa nə mandâ alätä e kɔ. 19 Bale, tə̂ äwä ə̈ndjï Kristə nə ə̂në ndogɔ nə gbɔ wââ kɔ, mata ənə̂ aya ndalimi ə̂në ə̈bə̈ ərə tshekotə̂ ye ndɨ̂ ndɨ̂ bale ne â tshə sə mvo kɔ, də̂ Ndjapä nə djɔ̂ e kɔ. 20 Ndjapä nə kê ətshə ətshinə, angbʉlînə ndə kə pa tshə so tshepashɔ, â tshə yîsə̂ ye ngbʉ̂ gashu tə̂ alɔ səke ə̂në ə sə tə bale nə kɔ, mbrə e. 21 Tə̂ äwä ye, e za lɔsu e kə Ndjapä nə ə̂në tshə shê ətshə lə takpa tə̂ akuzu gâ ye ə zâ kə mbe ətshe kə ətshə gâ ye kɔ, â əpʉ lɔsu e gâ ndə ərə ə̂në e za lɔsu e gâ pâ nə kɔ sə lə Ndjapä nə.

22 Tə̂ äwä kə mbrə ərə Lïndə̂ djatra əpʉ, e dô tə̂ e tə azü ə̂në əndje sə mvo gâ ye, ndə kə pa e yi tə̂ e tə alaye də lɔsu bale. Rəkɔ, e yï tə̂ e tə bandanə lə takpa tə̂ e də lɔsu e nɔ̂. 23 Mbrə ə̂në əndje zû e kwatəndje gâ ye, ə də̂ lə angwa ə̂në ə tshu ə tshu kɔ də̂ ne, bale lə angwa ə̂në ə tshu tshu tə̂ ərə ne kɔ, tə̂ äwä Əpʉ Ndjapä ə̂në ə sə tə sorô ə daka pə piii kɔ. 24 Mbrə ə̂në Fraka nə̂ Ndjapä pâ:

«Əzü nɔ̂ sə mata güsü,

â gao ye nɔ̂ sə mata ndɔkɔ lə güsü.

Güsü nə â orɔ, ndɔkɔ nə te gâ tʉ,

25 bale əpʉ nə̂ Âgbɔ̂ Əyïngerə daka pə piii.»*

Əpʉ səkɔ kə də̂ Ə̂rɔ̂ Əpʉ ə̂në əndje mʉ̂ kə e gâ ye kɔ.