1 Rəkɔ, mə sə kə pa əpʉ kə aâgbɔ̂ azü Laglizə nə ə̂në əndje sə lə takpa tə̂ e kɔ. Əmə, mə sə tə âgbɔ̂ əzü mata əndje, mə sə tə əzü ə̂në mə wû ərə əyo ə̂në ə wûtu gâ tə̂ Kristə kɔ də ala əmə gâ ye â mə sə kə sə ndje lə ə̂yî ə̂në ə wutu je kɔ. 2 E bäta ə̂kpû andalimi ə̂në Ndjapä kô əndje gâ lə kəna e kɔ tə ə̂rɔ̂nə. E lïshi pâ əndje də ə̂rɔ̂ lɔsu, mata ə̂në Ndjapä yində nə kɔ, e mbrə̈ mbrə̈ a pa də əndje ko e ə ko də awlra â e mbrə kɔ ne. E mbrə̈ mbrə̈ ndə əgo ngendja ne, bale e mbrə̈ rə də awlra e nɔ̂. 3 E mbrə̈ mbrə̈ a pa də e sə gâ pâ azü nə ə̂në Ndjapä nə kô əndje gâ lə kəna e kɔ tə kə mbrə ngerə də awlra ne, bale tə azü ə̂në kə mbrə tə̂ e sə də äwänə ndə kə pa ə̂kpû andalimi nə mbrə tə̂ əndje mata e. 4 Bale, alɔ ə̂në âgbɔ̂ awobata andalimi nə kə yi kumu ye, e sə kə sɔtə̂ ə̂rɔ̂ ərə ə̂në ə daka pə alɔnɔ̂ kɔ, ə̂në kə mbe ətshe sə lə nə kɔ mandânə.

5 Amɔdɔ, e-e ndje, e djï əpʉ ama aâgbɔ̂ azü Laglizə nə. Bale, e-e nɔ̂, e mbrə̈ tə̂ e tə aəngʉ azü lə kə sə e lə takpa tə̂ e, mbrə ə̂në Fraka nə̂ Ndjapä pâ: «Ndjapä wəra tə̂ ye tə̂ alayïwuma, bale tshə sə kə mbrə ə̂rɔ̂tə̂ ye kə azü ə̂në əndje mbrə tə̂ əndje tə aəngʉ azü kɔ.»* 6 Rəkɔ, e mbrə̈ tə̂ e teashe tshekudu awlra nə̂ Ndjapä, kanika tshə mbrə e tə əgbro azü tə̂ alɔ ə̂në tshelə ye yində nə. 7 E kö aəpʉ aərə ə̂në ə lʉ e tə̂ lɔsu e kɔ nɔ̂ ə ko gâ lə kəna ye, mbrə ə̂në tshə sə kə ga ndə e.*

8 E sə̈ də ə̈kü ala e, ala e gbɔ̈! Əyïkowɔ nə̂ e, djablo, sə kə na djitshe djitshe mata bamara ə̂në tshə sə kə lea nə ə sə kə pra əzü ndə kə zɨ ətshə kɔ. 9 E kä tə akoshe ətshi ye ə kä kpirə̂ gâ pâ əpʉ lɔsu, ə wüsə̂ nə ə pa alaye e pâ ashɔ sə kə wu ndje kʉtə̂ marä tə̂ aərə əyo səkɔ. 10 Alɔ ə̂në e wu əyo lə ə̈bə̈ ə̈ndö əlo gâ ye, Ndjapä, ə̂në tshə mbrə ə̂rɔ̂tə̂ ye kə azü kɔ, ə̂në tshə ê e, tə̂ äwä Kristə, ndə kə pa e sə lə ə̂yî ye ə̂në ə sə piii kɔ, tshə gamba əndʉ e də ə̂tə̂ ye je, ə gbɔgbɔ lɔsu e je, ə gbɔgbɔ e je â ə̈bə̈ ərə sə sə kə meme e bale ne. 11 Awlra sə̈ tə ənə̂ ye də ə̂ngû də ə̂ngû! Asərəmə!

12 Tə̂ äwä Silasə, ə̂në mə wu ətshə tə aye ə̂në tshə lï kɔ, də̂ mə ta aə̈ndö aəpʉ səye kə e kɔ, ndə kə pa mə gbɔgbɔ lɔsu e, ə pa əpʉ kə e ə pa djatra ə̂rɔ̂tə̂ Ndjapä də̂ e tɔ popo nə kɔ.

13 Laglizə ə̂në ə sə mâ Babilɔnə*, ə̂në Ndjapä kê azü nə gâ ye mata e kɔ, bla e. Ɨrɨ əmə* də Markə bla e ndje. 14 E blä tə̂ e lə takpa tə̂ e ə ɔ̈ ama e tə̂ äwä kə yi tə̂ e tə azü nə̂ Kristə.

Blatshe sə̈ də e nɔ̂ ə̂në e sə lə Kristə nə kɔ!