1 Ə̂në lə ə̂rɔ̂tə̂ Ndjapä nə, tshə zâ kosəra səye kə ä gâ ye kɔ, ä sə sə kə mɔ tə̂ äwä nə ne. 2 Ä wə̂ra tə̂ ä tə̂ aərə nɔ̂ ə̂në azü ə mbrə lə angbanə tə aərə gana kɔ gâ ye, ä mbrə tə̂ ä mbrə tə aawofrɔ azü ne ə do tshelə Əpʉ Ndjapä do ə do ne. Bale, ä sə kə yisə̂ djatra əpʉ ngâ gashu kə azü, rə də̂ azü nɔ̂, lə ala Ndjapä, sə kə za lɔsu əndje kʉ gâ pâ ä. 3 Kədə Ə̂rɔ̂ Əpʉ nə ə̂në ä mʉ kə azü kɔ də̂ ala nə wu wutu orâ gashu ne, ala əpʉ nə daka pə lə kəwû tə̂ azü ə̂në əndje sə tə̂ äwä kuzu kɔ, 4 tə̂ azü ə̂në əndje za lɔsu əndje za kə Ndjapä ne kɔ. Bale, ndjapä tshepashɔ səke bû lɔsu əndje gâ ye, kanika əndje wu wu ə̂yî Ə̂rɔ̂ Əpʉ nə̂ Kristə nə ə̂në ə tshe kɔ ne. Kandää, Kristə nə sə tə foto Ndjapä. 5 Ə də̂ əpʉ nə̂ ä də ə̂tə̂ ä də̂ ä sə kə yisə̂ əpʉ gâ pâ nə kɔ ne. Bale, Jezu Kristə, tə Âgbɔ̂ Əyïngerə nə də̂ ä mʉ əpʉ ye kɔ. Ənə̂ ä, ä pa ä sə tə alayïkosəra nə̂ e mbrə Jezu nə. 6 Mbrə ə̂në Ndjapä nə ə̂në tshə pâ: «Ə̂yîalɔ tɔ̈ lə əbutshe!» kɔ, tshə tɔ̂ tə̂ lɔsu əzə̂ ndə kə pa a wusə̂ ə̂yî Ndjapä nə ə̂në ə tshe tshitshi Kristə nə kɔ.

7 Bale, ä-ä ə̂në ä za ə̂rɔ̂ ərə səkɔ ä sə mata ləsû ə̂tô, ndə kə pa azü wusə̂ nə ə pa awlra səkɔ ə̂në ə rô ə̂dû awlra nɔ̂ gâ ye kɔ afɔ mâ ndə Ndjapä, ə sə sə tə ənə̂ ä ne. 8 Azü pêrə tshelə ä lə aərə nɔ̂, bale əndje shî tshelə â shî ne; ä wusə̂ ərə ə̂në ä mbrə kɔ wu ne, bale lɔsu ä tê tê ne; 9 əndje gî əyo tə̂ ä, bale Ndjapä tshî ä tshî tʉ ne; əndje gêta ä, bale ä tshû tshû ne. 10 Alɔnɔ̂, ä za kuzu Jezu gâ tə̂ ä, lə akwa ä, kanika azü wu sorô Jezu nə ndje lə akwa ä nə. 11 Mbrə ə̂në əzə̂ ə̂në a sə də sorô kɔ, mbrə Jezu nə, alɔnɔ̂ azü sə kə ka əzə̂ gâ lə ama kuzu, kanika azü wu sorô Jezu nə ndje lə akwa əzə̂ ə̂në ə tshu je kɔ. 12 Rəkɔ, kuzu sə də kosəra lə ä, bale sorô sə ndje də kosəra lə e.

13 Bale, mata ə̂në əzə̂ sə kʉ də əpʉ lɔsu bale, Lïndə̂ əpʉ ə̂në Fraka nə̂ Ndjapä pâ: «Mə yîndə əpʉ nə də lɔsu əmə gâ ye, âdârə ə̂në mə pâ əpʉ kɔ kə sə̂.»* Ä-ä ndje, ä yində əpʉ nə də lɔsu ä, âdârə ə̂në ä pa əpʉ nə kɔ kə sə̂. 14 Ä wusə̂ nə ə pa ətshə ə̂në tshə shê Âgbɔ̂ Əyïngerə Jezu nə gâ ye kɔ, tshə she ä ndje je gâ ndə Jezu nə ə ko əzə̂ də a-e tɔ gâ ətshi ye je. 15 Bale, aərə sə̂ nɔ̂ kɔ wutu gâ tə̂ ä mbrə e, ndə kə pa tshelə ə̂rɔ̂tə̂ Ndjapä sə kə zu nə kanika azü ə̂në əndje ngba ngbatshe kɔ, əndje za mərshe kə Ndjapä nə ndə kə pa əndje mbe ətshə.

16 Âdârə ə̂në ä mɔ mɔ ne kɔ kə sə̂. Bale, kədə tshekotə̂ ä nə̂ əzü sə kə ndɨ nə teashe teashe, tshekotə̂ ä djoko lə nə, sə kə do tə̂ ye tə tafa nə alɔnɔ̂. 17 Mbrə ə̂në aərə əyo ə̂në ä sə lə nə kʉ mbrə ə̈bə̈ alɔ kɔ, ə sə kʉ teashe, ə gamba ä mbrə ə̂yî ə̂në ə sə piii, ə̂në ə lʉ ə lʉ kɔ, ə̂në ə lï lï də aərə əyo səkɔ ne kɔ. 18 Ä li lishi ndje gâ tə̂ aərə ə̂në ala əzə̂ wu ə wu kɔ ne, bale ä ko ala ä kʉ gâ tə̂ aərə ə̂në ala əzü wu wu ne kɔ. Mbrə ə̂në aərə ə̂në ala əzü wu ə wu kɔ, ə sə kʉ mbrə ə̈bə̈ alɔ â aərə ə̂në ala əzü wu wu ne kɔ sə ənə̂ ye piii.