1 Ä kwatə̂ ä ə pa ə̂rɔ̂ əpʉ də əɨrɨ ä də ə̂tə̂ a? Wala ä mbrə əgo ndə kə pa əndje ta fraka ə pa ə̂rɔ̂ əpʉ nə̂ ä gâ lə nə ka ä na də nə kə e, wala ä yu tshuku fraka nə lə kəna e, mata ə̂në alabə̈ azü nə ə mbrə kɔ a? 2 E-e də̂ fraka nə̂ ä nə, ə̂në əndje tâ gâ tə̂ lɔsu ä, ə̂në azü nɔ̂ wûsə̂ nə gâ ye ə sə kə dɨ nə kɔ. 3 Ə sə tə djatra əpʉ e sə tə fraka nə ə̂në Kristə tâ kə azü gâ ye, tə̂ äwä kosəra nə̂ ä kɔ. Tshə tâ fraka nə tâ də ə̂ngû ngrowô nə ne, bale tshə tâ də Yîrə̂ Ndjapä, Ndjapä nə ə̂në tshə sə tə sorô kɔ. Tshə tâ fraka nə tâ gâ pâ əkpʉ ne, bale tshə tâ gâ tə̂ lɔsu azü.

4 Əpʉ rə də̂ ä za lɔsu ä kʉ gâ pâ nə tə̂ äwä Kristə nə, lə ala Ndjapä kɔ. 5 Ä wu ənə̂ ä ə pa, ä-ä də ə̂tə̂ ä, ä lï lï ndə kə pa ä mbrə ə̈bə̈ ərə kʉtə̂ ä ne, bale awlra kə mbrə ərə nə̂ ä nə to mâ ndə Ndjapä nə. 6 Tshə mbrə̂ ä ndje tə azü ə̂në ä lï ndə kə sə tə alayïkosəra tafa mbʉkʉ. Tafa mbʉkʉ nə ka ka gâ pâ âgbɔ̂ əpʉ ə̂në əndje ta ə ta kɔ ne, bale ə ka gâ pâ Âgbɔ̂ Yîrə̂, mbrə ə̂në âgbɔ̂ əpʉ nə ə̂në əndje ta ə ta kɔ wo azü ə wo, bale Âgbɔ̂ Yîrə̂ nə sə kə za sorô.

7 Leme-e, əndje tâ aəpʉ lə âgbɔ̂ əpʉ nə gâ pâ aəkpʉ â ə̂yî Ndjapä tshê tə̂ alɔ nə səkɔ. Tshitshi Mayïzə tshê ndje mandâ ə̂yî Ndjapä səkɔ â aneshe əgɔ Isərayalə lî lî ndə kə pa əndje shekɔ tshitshi ye nə mbrə ə̂yî səkɔ ne, ə̂në ə sə̂ kə ro ə ro kɔ.* Bale, kədə âgbɔ̂ əpʉ nə ə̂në kosəra nə na də azü ə na gâ tə̂ kuzu kɔ kə sə̂ də marä tə̂ ə̂yî rə, 8 ə̂yî kosəra nə̂ Âgbɔ̂ Yîrə̂ nə sə sə kə sə ənə̂ ye ro pâ nə ne a! 9 Kədə kosəra nə̂ âgbɔ̂ əpʉ nə ə̂në ə sə̂ tə kə wa ngbanga gâ pâ azü kɔ kə sə̂ də ə̂yî gâ ye, kosəra nə̂ Âgbɔ̂ Yîrə̂ nə ə̂në ə sə tə kə mbrə azü lə ala Ndjapä tə aə̂rɔ̂ azü kɔ, ə̂yî nə sə sə kə ro ə̂yî kosəra nə̂ âgbɔ̂ əpʉ nə ne a! 10 Bale, rəkɔ ə̂yî ə̂në ə tshê leme-e kɔ, sə sə tə ə̈bə̈ ərə bale ətshi ə̂yî tshe kpəsəye ə̂në ə tshe ə ro pâ nə kɔ ne. 11 Mbrə ə̂në, kədə ərə ə̂në ə sə kə ro ə ro kɔ kə sə də ə̂yî ye tə̂ nə, ərə ə̂në ə daka pə piii je kɔ ə sə sə də ə̂yî ə ro pâ nə ne a!

12 Ə̂në a sə də marä tə̂ əpʉ rə ə̂në a za lɔsu əzə̂ gâ pâ nə kɔ, awa ə̈bə̈ ərə mbrə əzə̂ mbrə ne. 13 Ä sə sə kə mbrə mata Mayïzə ə̂në tshə zâ ləba ə zâ gâ ətshi ye kɔ ne, ndə kə pa aneshe əgɔ Isərayalə nə shekɔ kə nglɔ ə̂yî ərə ə̂në ə sə kə ro ə ro kɔ ne. 14 Bale, kə wusə̂ ərə nə̂ əndje tê buuu gâ ye. Mbrə ə̂në ndjɔ kpəsəye, ləba nə ə̂në ə kânga tshitshi əndje nə kɔ daka pə je, alɔ ə̂në əndje sə kə dɨ fraka Angbrɔ Mbʉkʉ nə. Əndje djɔ̂ djɔ̂ ləba nə ne, mbrə ə̂në kʉ lə Kristə də̂ ləba nə sə kə ro nə. 15 Ndjɔ kpəsəye, alɔ ə̂në əndje sə kə dɨ afraka nə̂ Mayïzə nə, ə̈bə̈ ləba za tshepa lɔsu əndje. 16 Bale, alɔ ə̂në əzü do tə̂ ye gu nə gâ tə̂ Âgbɔ̂ Əyïngerə, ləba nə sə kə djɔ nə.* 17 Kandää, Âgbɔ̂ Əyïngerə nə kə də̂ Yîrə̂, â tə̂ ətshe ə̂në Yîrə̂ Âgbɔ̂ Əyïngerə nə sə tə̂ nə, azü sə ndə tshelə əndje. 18 Əzə̂ nɔ̂ ə̂në əndje djɔ̂ ləba nə tə̂ tshitshi əzə̂ gâ ye kɔ, ə̂yî Âgbɔ̂ Əyïngerə nə sə kə tshe lə əzə̂ mata ə̂yî ərə ə̂në ə tshe la tatra kɔ. Âgbɔ̂ Əyïngerə nə, tə Yîrə̂ nə, sə kə do əzə̂ kpî mata ətshə â ə̂yî əzə̂ nə sə kə gerə nə alɔnɔ̂.