1 Ə̂në ä də a-Ndjapä nə kə mbrə kosəra nə kɔ, ä sə kə mʉ əpʉ kə e ndə kə pa ə̂rɔ̂tə̂ Ndjapä nə ə̂në e sɔ̂tə̂ nə kɔ, ə sə sə tə ambanə ne. 2 Mbrə ə̂në Ndjapä pa əpʉ ə pa:

«Tə̂ ə̂rɔ̂ alɔ,

mə djî əbə də kə yu ətshe nə̂ zə,

tə̂ əlo kə tshɔ azü lə kuzu,

mə yî kəna əmə kə əbə.»*

Wü-a, kpəsəye ə̂rɔ̂ alɔ nə kə səke, ə̂rɔ̂ əlo kə tshɔ azü lə kuzu kə səke.

3 Ä yi yində ndə kə pa azü pa əmbrʉ əpʉ gâ pâ kosəra nə̂ ä nə ne, âdârə ə̂në ä sə kə mbrə ndə kə pa ə̈bə̈ əzü te te mbrə ə̈bə̈ ərə ə̂në ä mbrə kɔ ne kɔ kə sə̂. 4 Bale, ä sə kə yisə̂ nə lə aərə nɔ̂ ə pa ä sə ngâ tə alayïkosəra nə̂ Ndjapä. Rəkɔ, ä kânga tshelə ä ngbatshe lə aərə əyo, lə aərə kanga də aərə kə za awa gâ lə ä; 5 azü dâ ä ə kô ä gâ lə kânga, ə̂kpû azü âfɔ tə̂ ä də əpʉ; ä mɔ̂ mandâ kosəra, əlo wû ala ä wû ne, ä rû tshelə ä də əgo. 6 Ä yisə̂ nə ə pa lɔsu ä sə mvo, ä wusə̂ ərə, ä wusə̂ kə ru tshelə ä, ä mbrə ə̂rɔ̂tə̂ ä kə azü, ä mbrə̂ ərə tə̂ äwä Âgbɔ̂ Yîrə̂, ä yində azü yi də lɔsu bishi ne. 7 Ä yîsə̂ djatra əpʉ kə azü, tə̂ äwä awlra nə̂ Ndjapä. Kə mbrə aərə də äwänə sə tə aərə koshe nə̂ ä ndə kə pa ä bata tə̂ ä də nə ə mbrə ndje də awlra. 8 Azü sə kə lʉ ä â alabə̈ əndje sə kə mbrə ərə gana lə ala ä; alabə̈ azü nə sə kə pa ə̂rɔ̂ əpʉ də əɨrɨ ä â alabə̈ əndje nə sə kə pa əmbrʉ əpʉ də əɨrɨ ä. Azü wû ä tə alayïəterə, kandää ä sə kə pa djatra əpʉ, 9 əndje wû ä mata azü ə̂në əndje wusə̂ əndje wu ne kɔ, kandää əndje wûsə̂ ä gâ ye, ə wû ä mata azü ə̂në əndje sə kə tshu ə tshu kɔ, kandää ä sə tə asorô; əndje dâ ä gâ ye, bale əndje wô ä wô ne. 10 Əndje zâ əyo gâ tə̂ lɔsu ä, bale ä sə də ə̂rû alɔnɔ̂ tə̂ lɔsu ä; əndje wû ä mata alayïəyo, bale ä mbrə̂ azü ngbatshe tə alayïrishi. Əndje wû ä mata azü ə̂në əndje sə sə də ə̈bə̈ ərə bale ne kɔ, kandää ä sə də aərə nɔ̂.

11 Agbɔbəngâ gala Kɔratə, ä pâ əpʉ kə e orâ gâ ye ə krɔ̂ lɔsu ä nɔ̂ kə e gâ ye. 12 Ä kânga lɔsu ä kânga kə e ne, bale e-e kə sə̂ â wə̂ra tə̂ e ndə kə krɔ lɔsu e kə ä kɔ. 13 Rəkɔ, mə sə kə pa əpʉ kə e mata aneshe tshelə əmə: e-e ndje, e krɔ̈ lɔsu e nɔ̂ kə ä!

14 E ngbö ngbö kəna e gâ tə̂ nə də azü ə̂në əndje za lɔsu əndje za kə Ndjapä ne kɔ lə aərə ne. Mbrə ə̂në kə mbrə ərə də äwänə də əmbrʉ ərə ə ngbo tə̂ əndje gâ tə̂ nə atâ a? Ə̂yîtshe də əbutshe ə ngbo gâ tə̂ nə atâ a? 15 Bale, Kristə nə də djablo ə dji tə̂ əndje atâ a? Ərə yea nə̂ əzü nə̂ Kristə kə sə lə ərə nə̂ əzü ə̂në tshə sə tə dulu kɔ? 16 Yea kə ngbo Anda Ndjapä də aamba andjapä gâ tə̂ nə? Mbrə ə̂në əzə̂, a sə tə Anda nə̂ Ndjapä ə̂në tshə sə tə sorô kɔ, mata ə̂në Ndjapä pâ əpʉ ə pa:

«Mə sə kə ma əgɔ lə takpa tə̂ əndje

ə na lə takpa tə̂ əndje;

mə sə kə sə tə Ndjapä nə̂ əndje

â əndje sə kə sə tə azü nə̂ əmə.»*

17 Âdârə ə̂në Əyïlingû pâ əpʉ ə pa:

«E wütu lə takpa tə̂ əndje gashu ə sə̈ mâ ngâ!

E gö göro əmbrʉ ərə bale ne,

mə sə kə ko e gâ tə̂ əmə.»*

18 Əyïlingû, tə Âgbɔ̂ Əyïworɔgbɔ pâ kwatə̂ye ə pa:

«Mə sə kə sə tə Abä mbrə e

â e sə kə sə tə aləvu əmə tə akoshe də ayashe.»*