1 Ə lï ndə kə pa mə da əkro əmə, gu də̂, ə də̂ ə̂rɔ̂ ərə də̂ kə sə̂ ne. Bale, mə sə kə pa ndəma aərə ə̂në Âgbɔ̂ Əyïngerə mâ kə əmə ə yîsə̂ nə kə əmə kɔ. 2 Mə wusə̂ ə̈bə̈ əzü nə̂ Kristə* ə̂në, ə mâ ə̂ngû morofo amanə vəna gâ ye, Ndjapä zâ ətshə ə ô də ətshə mâ tə̂ vəta tshelafɔ* kɔ. Wala də əndu ye kə sə̂ a? Mə wusə̂ nə wu ne; wala ə də̂ də əndu ye də̂ ne a? Mə wusə̂ nə wu, kʉtə̂ Ndjapä kə wusə̂ nə. 3 Bale, mə wusə̂ nə ə pa koshe səkɔ – wala də əndu ye wala ə də̂ də əndu ye də̂ ne a? Mə wusə̂ nə wu, Ndjapä kə wusə̂ nə – 4 Ndjapä zâ ətshə ə ô də ətshə mâ lə paradi â tshə djî aəpʉ ə̂në əzü lï lï ndə kə pa nə ne kɔ, ə̂në əndje shera əzü ndə kə pa tshə tra ndə kə pa nə kɔ. 5 Mə sə kə da əkro əmə tə̂ marä tə̂ əzü rə, bale mə sə sə kə da əkro əmə tə̂ əmə də ə̂tə̂ əmə ne, də̂ ne, mə sə kə da əkro əmə nə kʉ mbrə tə̂ ə̂në mə mɔ ə mɔ kɔ. 6 Kədə mə yində kə da əkro əmə, mə sə sə kə sə tə əyïyirə̈ ne, mbrə ə̂në mə sə kə pa djatra əpʉ. Bale, mə sə sə tə̂ äwä kə da əkro əmə nə ne, mbrə ə̂në mə yində nə yi ə pa ə̈bə̈ əzü wu əmə lə ala ye ə rô pâ ərə ə̂në tshə sə kə wu də əpʉ ə̂në tshə sə kə dji gâ pâ əmə kɔ ne.

7 Bale, ndə kə pa mə da əkro əmə da mbrə aərə ə̂në Ndjapä yîsə̂ nə kə əmə ə̂në ə rô pâ kumu azü kɔ ne, ə̈bə̈ ərə jô əmə lə akwa əmə tə əshi, mata ə̈bə̈ əyïawla nə̂ Sataa ndə kə pa tshə da əmə kanika mə da əkro əmə da ne. 8 Äwä vəta, mə yû Âgbɔ̂ Əyïngerə ə pa tshə gi ərə səkɔ gashe tə̂ əmə. 9 Bale, tshə pâ kə əmə ə pa: «Ə̂rɔ̂tə̂ əmə lï də əbə gâ ye. Mbrə ə̂në awlra nə̂ əmə sə kə mbrə ərə alɔ ə̂në əzü sə sə də awlra ne kɔ.» Rəkɔ, mə sə kə da əkro əmə kʉ mbrə tə̂ ə̂në mə mɔ ə mɔ kɔ, kanika awlra nə̂ Kristə nə sə gâ pâ əmə. 10 Âdârə ə̂në tshelə əmə mɔ ə mɔ mbrə tə̂ ə̂në mə gbɔ gbɔ ne kɔ, lə aə̂gû ə̂në azü ə gu əmə də nə kɔ, lə əyo ə̂në ə mbrə əmə kɔ, lə əyo ə̂në azü ə gi tə̂ əmə kɔ, lə aəmbrʉ aərə ə̂në ə wutu gâ tə̂ əmə mbrə Kristə nə kɔ kə sə̂. Mbrə ə̂në, alɔ ə̂në mə mɔ ə mɔ kɔ də̂ mə sə kə sə də awlra.

11 Mə pâ əpʉ mata əyïyirə̈, e-e kə mbrə̂ â mə pâ əpʉ rə kɔ. E-e kəmə kə lï ndə kə pa e pa ə̂rɔ̂ əpʉ nə̂ əmə. Mbrə ə̂në azü-awla ə̂në əndje pa alane rô ə̂dû azü-awla nɔ̂ gâ ye kɔ, əndje rô əmə rô lə ə̈bə̈ ərə bale ne, əmə ə̂në mə sə sə tə ə̈bə̈ ərə bale ne kɔ. 12 E wû aərə ə̂në mə mbrə̂ lə takpa tə̂ e, ə̂në ə yîsə̂ nə ngâ gashu gâ ye ə pa mə sə tə əzü-awla kɔ: tə̂ äwä kə kânga tshelə əmə lə aərə nɔ̂, tə̂ äwä aərə kə za awa gâ lə azü də aərə ə̂në ə rô pâ kumu azü gâ ndə aərə aə̈lü. 13 Yea də̂ ə̂dû Alaglizə sɔ̂tə̂ nə â e sə sə də nə ne? Kʉtə̂ ərə ə̂në mə yində nə yi ə pa e ndɨ aərə nə̂ e mbrə əmə ne kɔ a? E gbä tshelə əpʉ səkɔ lə kumu əmə!

14 Kpəsəye, mə sə trö ndə kə pa mə na mâ ndə e je tə vəta nə â mə sə sə kə sə tə kongbɔ gâ pâ e ne. Mbrə ə̂në ə də̂ aərə nə̂ e də̂ mə pra äwä nə kɔ ne, bale e-e də̂ mə pra äwä e kɔ. Ə də̂ aneshe də̂ kə ngbo aərə gâ tə̂ nə mbrə alabä əndje də alayï əndje ne, bale alabä aneshe kə ngbo aərə gâ tə̂ nə mbrə aləvu əndje nə. 15 Ənə̂ əmə, mə sə kə ndɨ aərə nə̂ əmə ə ka tə̂ əmə də ə̂tə̂ əmə mbrə e. Ə̂në mə yində e rô pâ nə kɔ, e sə kə yində əmə kʉ teashe a?

16 Rəkɔ, e yində nə ə pa mə sə̂ sə̂ tə kongbɔ gâ pâ e ne. Bale, alabə̈ azü pa ənə̂ əndje ə pa mə sə tə əyïəterə, mə frɔ e ə frɔ də əpʉ əterə. 17 Mə kô aərə tə̂ e tə̂ äwä ə̈bə̈ əzü lə takpa tə̂ əndje ə̂në mə wlâ əndje kə e kɔ a? 18 Mə mʉ̂ əpʉ kə Titə ə pa tshə na mâ ndə e â wlâ ətshə də aye əzə̂ nə. Titə nə kô aərə tə̂ e a? Ä də ətshə, ä mbrə̂ ərə mbrə̂ tə̂ äwä əpʉ lɔsu bale ə nâ ana lə əndʉ ä bale ne a?

19 Ə vɔ̂tə̂ nə gâ tə̂ ə̈bə̈ əlo, e pa ənə̂ e mâ lə kumu e ə pa ä sə kə pa əpʉ ndə kə pa əpʉ sə sə lə kumu ä ətshi e ne. Bale ne! Lə ala Ndjapä, lə əpʉ Kristə, də̂ ä pa əpʉ səke, â ä sə kə pa aəpʉ sə̂ rə nɔ̂, alaye əmə ə̂në mə yində e ngbatshe kɔ, ndə kə pa e gbɔgbɔ tə̂ e. 20 Mə sə kə mbrə awa ndə kə pa, alɔ ə̂në mə sə kə yi kumu əmə, mə wu e wu mata ə̂në mə yîndə nə kəmə kɔ ne, â e wu ndje əmə wu mata ə̂në e yîndə nə kəmə kɔ ne. Mə mbrə awa ndə kə pa kəpʉ də kə za tshelə gâ tə̂ əzü də əkɔ də kə mbrə ərə tə alayïnga azü də kə pa tə̂ azü də kə na ana də əɨrɨ azü də kə da əkro gâ ndə kə mbrə ərə mbrə də äwänə ne sə je lə takpa tə̂ e. 21 Mə mbrə awa ndə kə pa, alɔ kə yi kumu əmə, Ndjapä nə̂ əmə mbrə gana lə ala əmə gâ pâ əpʉ nə̂ e, ndə kə pa mə kɨ mbrə azü ngbatshe ə̂në əndje daka pə ndə kə mbrə nyaka mata ənə̂ leme-e kɔ â tshi äwä ərə kene də əpʉ ə̂trû gâ ndə kə mbrə ərə ndə kumu əndje ə̂në əndje mbrə kɔ tshi tʉ ne kɔ.