1 Gâ pâ əpʉ kə ko aərə mbrə azü nə̂ Ndjapä lə ashɔ əgɔ Jude, ə sə sə tə ə̈bə̈ əpʉ ndə kə pa mə ta fraka ə ta kwatə̂mə kə e gâ pâ əpʉ nə ne. 2 Mbrə ə̂në mə wusə̂ nə ə pa e yində kə ko aərə â mə sə kə da əkro əmə tə̂ e kə azü əgɔ Masedwanə â pâ kə əndje ə pa: «Azü tshe Akayi gâmba aərə nə̂ əndje lə ə̂ngû ətshinə gâ ye.» Əgo ə̂në e sə də nə ndə kə pa e ko aərə nə kɔ zâ ndje əgo gâ tə̂ lɔsu alabə̈ azü ngbatshe ndə kə pa əndje ko ndje aərə. 3 Bale, mə wlâ alaye əzə̂ səkɔ kə e ndə kə pa kə tra e sə̂ ə̂në mə tra e kɔ, əpʉ nə sə sə ambanə ne. Mata ə̂në mə pâ ndə nə gâ ye kɔ: e yïsə̂ nə ngâ ə pa e gâmba tə̂ e gâ ye. 4 Kədə ä də azü tshe Masedwanə kə na mâ je, â əndje wu ə pa e gâmba tə̂ e gâmba ne, əpʉ sə̂ ə̂në mə pâ gâ ye kɔ sə kə do tə̂ ye tə ərə gana lə ala ä; bale â ə də̂ gana nə̂ e nə, mə sə sə kə pa ndə nə ne. 5 Rəkɔ, mə wû tə ə̂rɔ̂nə lə ala əmə ndə kə pa mə pa əpʉ kə alaye əzə̂ nə, əndje na ənə̂ əndje ətshinə mâ ndə e je ə wu aərə âkrâ nə ə̂në e zâ ama də əpʉ nə gâ ye kɔ. Rəkɔ, azü sə kə wu ə pa e gâmba aərə nə gâ ye tə âkrâ, ə də̂ də əmbrʉ lɔsu də̂ ne.

6 E wüsə̂ nə ə pa: ətshə ə̂në tshə lu ərə kʉ teashe, tshə sə kə kɔ nə kʉ teashe ndje, â ətshə ə̂në tshə lu aərə ngbatshe, tshə sə kə kɔ nə ndje ngbatshe. 7 Əzü bale bale zä ərə mata ə̂në tshə gâmba mâ tə̂ lɔsu ye ndə kə za nə kɔ, ə də̂ də əkɔ də̂ ne wala əndje za ətshə ə za də awlra ne. Mbrə ə̂në Ndjapä yində əzü ə̂në tshə za ərə də ə̂rû. 8 Bale, Ndjapä lï ndə kə pa tshə ko adongo aərə nɔ̂ kə e, ndə kə pa e sə də aərə alɔnɔ̂ ə lï də e ə sə də aərə kwatəndje ngbatshe ndə kə mbrə də ə̂rɔ̂ kosəra nɔ̂. 9 Mata ə̂në Fraka nə̂ Ndjapä pâ əpʉ ə pa:

«Tshə ko aərə tə âkrâ kə alayïəyo,

kə ma aərə nə̂ ye nə də äwänə daka pə je alɔnɔ̂.»*

10 Ndjapä ə̂në tshə ko angwa rəgo kə awolu rəgo ə ko rəgo kə zɨ nə kə ətshə kɔ, tshə ko angwa rəgo kə e je ə zu tshelə angwa rəgo nə kə e je, kanika âkrâ nə̂ e nə le ngbatshe. 11 Tshə mbrə e tə aawosɔtə̂ aərə ngbatshe alɔnɔ̂ je ndə kə pa e kra âkrâ alɔnɔ̂ â, tə̂ äwä ä, azü sə kə za mərshe kə Ndjapä mbrə âkrâ nə̂ e nə. 12 Mbrə ə̂në kosəra sə̂ ə̂në e mbrə ə ko aərə səkɔ, ə sə sə kʉ mbrə kə tɨ azü nə̂ Ndjapä gâ lafɔ ne, ə sə ndje mbrə ndə kə pa azü ngbatshe za mərshe mbrə nə kə Ndjapä nə. 13 Azü nə ə wu kosəra nə tə ə̈bə̈ âgbɔ̂ ərə je, ə vrɔ Ndjapä je mbrə ə̂në e sə kə mbrə tə̂ e ə lï də Ə̂rɔ̂ Əpʉ nə̂ Kristə nə kɔ. Əndje vrɔ ndje Ndjapä nə mbrə âkrâ nə̂ e ə̂në e krâ tə̂ əndje də nə, ndje də azü nɔ̂ kɔ je. 14 Əndje sə kə yu Ndjapä mbrə e â sə kə yində e, mbrə ə̂rɔ̂tə̂ Ndjapä nə ə̂në tshə mbrə̂ kə e rô pâ nə gâ ye kɔ. 15 A zä mərshe kə Ndjapä mbrə âkrâ nə̂ ye nə ə̂në ə̈bə̈ ərə kə lï də nə sə sə je ne kɔ!