1 Rəkɔ, mə wû tə ə̂rɔ̂nə lə ala əmə ndə kə pa mə do tə̂ əmə do mâ ndə e je ə za əyo gâ tə̂ lɔsu e ne. 2 Mbrə ə̂në kədə mə za əyo gâ tə̂ lɔsu e, əde kə za ə̂rû gâ tə̂ lɔsu əmə? Ə də̂ əzü nə ə̂në mə zâ əyo nə gâ tə̂ lɔsu ye kɔ də̂ ne a? 3 Mə tâ fraka nə mata ə̂në mə pâ gâ ye kɔ, ndə kə pa alɔ kə yi kumu əmə, azü ə̂në əndje lï ndə kə za ə̂rû gâ tə̂ lɔsu əmə kɔ, əndje za əyo za gâ tə̂ lɔsu əmə ne. Mə wusə̂ nə ngâ ə pa alɔ ə̂në mə sə də ə̂rû tə̂ lɔsu əmə, e-e nɔ̂ ndje, e sə də ə̂rû tə̂ lɔsu e. 4 Mə tâ fraka alɔ nə sə̂ kə e də əyo, də əkɔ tə̂ lɔsu əmə, də ngɔla əmə djuru djuru. Mə tâ fraka nə tâ ndə kə pa mə za əyo gâ tə̂ lɔsu e ne, bale ndə kə pa e wusə̂ nə ə pa mə yində e rô pâ nə gâ ye.

5 Kədə ə̈bə̈ əzü kə za əyo gâ tə̂ lɔsu abəngâ nə, ə də̂ əmə də̂ tshə zâ əyo nə gâ tə̂ lɔsu əmə kɔ ne, bale tshə zâ əyo nə gâ tə̂ lɔsu e nɔ̂ gâ ye, wala kədə mə pa əpʉ nə pa ro pâ nə ne, kʉ gâ tə̂ lɔsu alabə̈ azü nə lə takpa tə̂ e. 6 Ənə̂ əzü nə səkɔ, kədə ə̂dû azü nə nɔ̂ kə ngâ kə ətshə gâ ye, ə lî gâ ye, 7 ndə kə pa, mandânə, e gba tshelə əpʉ nə lə kumu ye ə zɨtɨ lɔsu ye kanika tshə sə sə də əyo tə̂ lɔsu ye ə ro pâ nə ne. 8 Rəkɔ, mə pa kə e, e yïsə̂ nə kə ətshə ə pa e yində ye. 9 Mbrə ə̂në mə tâ fraka nə kə e ndje ndə kə pa mə tra lɔsu e ə wusə̂ nə kədə e sə kə dji əpʉ ama əmə lə aərə nɔ̂. 10 Bale, əzü ə̂në e gba tshelə əpʉ lə kumu ye, mə gba tshelə əpʉ nə ndje lə kumu ye. Ənə̂ əmə, ə̂në mə gbâ tshelə əpʉ lə kumu ə̈bə̈ əzü kɔ, mbrə e lə ala Kristə də̂ mə gbâ tshelə əpʉ nə kɔ, 11 ndə kə pa a katə̂ äwä ka kə Sataa, tshə ro pa əzə̂ ne, mbrə ə̂në a wûsə̂ aərə ə̂në tshə yində kə mbrə nə kɔ gâ ye.

12 Alɔ ə̂në mə yî kumu əmə mâ Trowasə ndə kə mʉ Ə̂rɔ̂ Əpʉ nə Kristə kɔ, bale ə̂në Âgbɔ̂ Əyïngerə krɔ̂ äwä kə əmə gâ ye kɔ, 13 lɔsu əmə sə sə kpirə̂ ne, mbrə ə̂në mə wû wû Titə, aye əmə ne. Bale, mə kâtə̂ azü nə ə gû mâ Masedwanə.

14 A zä mərshe kə Ndjapä ə̂në tshə ko əzə̂ gâ lə ana ngblɔɔ nə̂ azü ə̂në əndje na mandâ Kristə ə̂në tshə rô pâ aawlra nɔ̂ gâ ye kɔ, â tə̂ äwä əzə̂, tshə mbrə â azü sə kə wusə̂ Kristə nə tə̂ ətshe nɔ̂ na na ye, mata kə fu yombo ə̂në ə za ətshe kɔ. 15 Mbrə Ndjapä, a sə ngâ tə ə̂rɔ̂ kə fu yombo nə̂ Kristə nə lə takpa tə̂ azü ə̂në əndje shê lə kuzu gâ ye kɔ, ndje lə takpa tə̂ azü ə̂në əndje sə tə̂ äwä ndə kə tshu nə kɔ. 16 Ənə̂ azü nə ə̂në əndje sə tə̂ äwä kə tshu nə kɔ, ə sə tə tshefʉ kuzu ə̂në ə na də əzü nə gâ tə̂ kuzu kɔ; ənə̂ ə̂dû azü nə, ə sə tə tshefʉ sorô ə̂në ə na də əzü gâ tə̂ sorô kɔ. Bale, əde kə lï də marä tə̂ kosəra rə? 17 Ä sə sə tə azü ə̂në ä ka Əpʉ nə̂ Ndjapä nə ə ka kɔ, mata alabə̈ azü ngbatshe ə̂në əndje mbrə kɔ ne. Bale, ä sə kə pa djatra əpʉ də əɨrɨ Ndjapä, lə ala Ndjapä nə ndje lə Kristə nə.