1 A wusə̂ nə ngâ ə pa kədə tshekotə̂ əzə̂ nə pâ ashɔ səye, ə̂në ə sə kʉ mata gbanda kɔ, kə ndɨ gâ ye, a sə də ə̈bə̈ anda mâ lafɔ ə̂në ə sə kə sə piii, ə̂në kəna Ndjapä kə mâ, ə də̂ kəna azü də̂ kə mâ kɔ ne. 2 Bale, a sə kə kɨ nə lə əndu nə kpəsəye â a ma djatra əgo ndə kə yi anda nə̂ əzə̂ nə mâ lafɔ kɔ tə ləba gâ tə̂ əzə̂. 3 Rəkɔ, kədə a yi gâ tə̂ əzə̂ nə, Ndjapä nə sə sə kə wu əzə̂ kpɔnderɔ ne. 4 Bale, ə̂në a daka pə lə gbanda nə kɔ, a sə kə kɨ nə, ərə sə kə ro pâ əzə̂. Ə də̂ mbrə ə̂në a yi yində kə wlerə tshekotə̂ əzü nə tə ləba gâ tʉ tə̂ əzə̂ kɔ ne, bale a yində kə yi tshekotə̂ tshe lafɔ gâ tə̂ əzə̂ gâ pâ nə, kanika sorô moro ərə ə̂në ə tshu je kɔ. 5 Bale, ətshə nə ə̂në tshə gâmba əzə̂ mbrə sorô səkɔ, kə də̂ Ndjapä nə ə̂në tshə zâ Âgbɔ̂ Yîrə̂ gâ tə̂ lɔsu əzə̂ mata əlî aə̂rɔ̂ aərə ə̂në a sɔtə̂ nə je kɔ. 6 Rəkɔ, a sə alɔnɔ̂ woradja woradja, ə wusə̂ nə ə pa kədə a daka pə lə tshekotə̂ əzə̂ nə, a daka pə ngrʉ̂ tə̂ Âgbɔ̂ Əyïngerə nə, 7 mbrə ə̂në, tə̂ äwä lɔsu də̂ a na ana kɔ, a na ana nə na ndə ala ne. 8 A sə alɔnɔ̂ woradja woradja ə yində nə rô pâ nə ə pa a tshi tshekotə̂ səye tʉ ə gu ə sə mâ ndə əzə̂ gâ ngotə̂ Âgbɔ̂ Əyïngerə nə. 9 Bale, ə sə rə ndje də̂ ä yində nə əlînə ə pa kə mbrə tə̂ ä fʉ lə ala ye, wala ä daka pə lə tshekotə̂ səye, wala ä tshi tʉ. 10 Mbrə ə̂në əzə̂ nɔ̂ lï ndə kə pa a ka gâ ətshi ngbanga nə̂ Kristə nə, ndə kə pa əzü bale bale sɔtə̂ ərə ə lï də ərə ə̂në tshə mbrə̂ gâ ye kɔ, wala tə ə̂rɔ̂nə wala tə əmbrʉnə, alɔ ə̂në tshə daka pə tə sorô pâ ashɔ səye kɔ.

11 Rəkɔ, ə̂në ä wûsə̂ ərə ə̂në ə pa kə kpe rawa Âgbɔ̂ Əyïngerə gâ ye kɔ, ä sə kə pra äwä ndə kə pa azü yində əpʉ səkɔ də lɔsu əndje. Ndjapä wusə̂ kə sə ä kpro, â mə wusə̂ nə ndje ə pa e yêrɔ əmə kpro mâ tə̂ lɔsu e gâ ye. 12 Ä sə sə kə pa ə̂rɔ̂ əpʉ nə̂ ä də ə̂tə̂ ä kwatə̂ ä kə e ne. Bale, ä za äwä kə e ndə kə pa e da əkro e tə̂ əpʉ nə̂ ä, kanika e sɔtə̂ äwä ndə kə pa əpʉ kə azü ə̂në əndje da əkro əndje kʉ tə̂ aərə ə̂në ə sə gashu kɔ, â da əkro əndje da tə̂ aərə ə̂në ə sə tə̂ lɔsu kɔ ne. 13 Ngâ, kədə ângwâ kə sə lə kumu ä, mbrə Ndjapä də̂ ângwâ nə sə̂ lə kumu ä nə kɔ. Bale, kədə ângwâ kə sə sə lə kumu ä ne, ä sə rə mbrə e. 14 Mbrə ə̂në əpʉ kə yində əzə̂ ə̂në Kristə nə yində əzə̂ kɔ, rô pâ ä gâ ye, ä-ä ə̂në ä wû ngâ ə pa: əzü bale tshû gâ ye mbrə azü nɔ̂, rəkɔ azü nɔ̂ tshû äwä bale ndje gâ ye. 15 Tshə tshû mbrə azü nɔ̂ gâ ye, ndə kə pa azü ə̂në əndje sə tə asorô kɔ, əndje sə sə də sorô nə mandânə səye kʉ mbrə əndje də ə̂tə̂ əndje ne, bale mbrə ətshə nə ə̂në tshə tshû ə shê gâ ye mbrə əndje kɔ.

16 Rəkɔ, mandânə səye, ä sə sə kə wusə̂ ə̈bə̈ əzü bale lə əzü tə̂ ä ne. Kədə kəmə ä wûsə̂ Kristə nə lə əzü tə̂ ye ətshinə, mandânə səye, ä sə sə kə wusə̂ ye rə kwatəndje ne. 17 Kədə ə̈bə̈ əzü kə tɔ̂ popo Kristə nə gâ ye, tshə sə tə tafa əzü. Aangbrɔ aərə rô gâ ye, aərə nɔ̂ dô tə̂ əndje tə tafa nə gâ ye. 18 Aərə sə̂ nɔ̂ kɔ to mâ ndə Ndjapä nə, ə̂në tshə shê tshelə takpa tə̂ əzə̂ də ətshə gâ mandânə, tə̂ äwä Kristə nə gâ ye kɔ â zâ kosəra kə she tshelə takpa tə̂ ye də azü gâ mandânə kə ä gâ ye kɔ. 19 Mbrə ə̂në Ndjapä nə kə shê tshelə takpa tə̂ ye də azü tshepashɔ gâ mandânə tə̂ äwä Kristə nə kɔ. Tshə ga ga ndə anyaka nə̂ azü nə ne, â zâ əpʉ kə she tshelə takpa tə̂ ye nə də azü gâ mandânə gâ lə ama ä ndə kə mʉ nə kə azü nə kɔ.

20 Rəkɔ, ä sə pâ ashɔ səye də əɨrɨ Kristə nə mata azü ə̂në Ndjapä nə sə kə mʉ əpʉ kə azü tə̂ äwä ä. Ä tegbɔ ə̈nü e də əɨrɨ Kristə nə: e yïndə nə tshelə takpa tə̂ e də Ndjapä nə tɔ gâ mandânə! 21 Kristə nə ə̂në tshə sə̂ sə̂ də nyaka lə kumu ye bale ne kɔ, Ndjapä nə zâ nyaka nə̂ əzə̂ gâ pâ ye gâ ye, kanika a do tə̂ əzə̂ tə aə̂rɔ̂ azü lə ala Ndjapä nə tə̂ äwä ye.