1 Alaye, ä yində kə yisə̂ ə̂rɔ̂tə̂ Ndjapä ə̂në tshə mbrə̂ kə Alaglizə lə əgɔ Masedwanə kɔ kə e. 2 Azü Alaglizə nə sə̂ lə aərə əyo ngbatshe, bale əndje sə̂ də âgbɔ̂ ə̂rû tə̂ lɔsu əndje, ə̂në əndje sə̂ tə alayïəyo kɔ, əndje tô aərə rô pâ nə, 3 əndje kô aərə ə̂në əndje sə̂ də nə kɔ ə kô ndje rô pâ aərə ə̂në əndje sə̂ də nə kɔ, də tshelə əndje, mə wû də ala əmə. 4 Əndje kɨ̂ kə ä tə bandanə ə pa ä katə̂ äwä kə alane ndə kə pa alane ko aərə mbrə azü nə̂ Ndjapä ə̂në əndje sə mâ Jeruzalamə kɔ. 5 Əndje mbrə̂ ərə rô pâ ərə ə̂në ä ka ndə kə pa əndje mbrə kɔ: əndje kô tə̂ əndje əlînə də ə̂tə̂ əndje kə Âgbɔ̂ Əyïngerə, mandânə ndje kə ä Lïndə̂ ərə ə̂në tshelə Ndjapä yində nə kɔ. 6 Âdârə ə̂në ä shêra Titə ə pa tshə mbrə ə̂dû kosəra ə̂rɔ̂ lɔsu ə̂në tshə vɔ̂tə̂ nə gâ ye kɔ, lə takpa tə̂ e. 7 Ä wusə̂ nə ə pa, lə aərə nɔ̂, e sə kə mbrə ə̂rɔ̂ ərə: e sə də lɔsu, e wusə̂ əpʉ ə wusə̂ ərə, e sə də əgo kə mbrə aərə nɔ̂, e yində ä*. Rəkɔ, e mbrə̈ ndje ndə kə pa e mbrə kosəra ə̂rɔ̂ lɔsu səkɔ tə ə̂rɔ̂nə. 8 Ə də̂ ama də̂ mə za kə e kɔ ne, bale mə pa ndəma əgo kə mbrə ərə ə̂në angâ e sə də nə kɔ kə e, ndə kə pa mə wu kədə e yində angâ e tə banda əpʉ. 9 Mbrə ə̂në e wûsə̂ ə̂rɔ̂tə̂ Âgbɔ̂ Əyïngerə nə̂ əzə̂ Jezu Kristə gâ ye: ətshə ə̂në tshə sə tə əyïrishi kɔ, tshə mbrə̂ tə̂ ye tə əyïəyo mbrə e, ndə kə pa, tə̂ äwä əyo nə̂ ye nə, e do tə̂ e tə alayïrishi.

10 Əpʉ ərə ə̂në mə wu ənə̂ əmə lə ala əmə də̂ mə pa ndə nə kə e gâ pâ əpʉ səkɔ: ə sə tə ə̂rɔ̂ ərə mbrə e, e-e ə̂në, ə̂ngû ətshinə, e sə̂ tə aangbʉlî azü ə̂në tshelə e yîndə kə ko aərə nə kɔ â sə̂ ndje tə aangbʉlî azü ə̂në e kô aərə nə kɔ. 11 Rəkɔ, e mbrə̈ ərə səkɔ ndjɔ gâ tə̂ ama nə ə lï də aərə ə̂në e sə də nə kɔ kpəsəye. Leme-e ə̂në e zâ ama ndə kə pa e mbrə nə kɔ, e yîsə̂ nə gashu ə pa e yində nə ndə kə mbrə nə, e mbrə̈ ndje kʉ rə ndjɔ. 12 Alɔ ə̂në əzü kə sə də əgo ndə kə ko aərə, ə sə tə ə̂rɔ̂ ərə alɔ ə̂në tshə ko aərə nə Lïndə̂ aərə ə̂në tshə sə də nə kɔ, bale ə də̂ gâ pâ aərə ə̂në tshə sə sə də nə ne kɔ ne.

13 Ə sə sə ndə kə pa ä mbrə e gâ lə əyo alɔ ə̂në e sə kə ko aərə ndə kə pa e tɨ angâ e də nə gâ lafɔ kɔ ne. Bale, tə̂ äwä kə ko aərə nə, e lï ə lï də angâ e nə. 14 Kpəsəye, e sə də aərə ngbatshe; e lï ndə kə pa e tɨ azü ə̂në əndje sə sə də aərə ne kɔ gâ lafɔ. Ndə ə̈bə̈ alɔ, kədə e sə sə də aərə ndje ne â əndje sə də aərə ngbatshe, əndje lï ndə kə pa əndje tɨ e ndje gâ lafɔ. Rə də̂, e-e də aəndje sə kə lï ə lï, 15 mata ə̂në Fraka nə̂ Ndjapä pâ əpʉ ə pa:

«Ətshə ə̂në tshə rɔ̂ aərə ngbatshe kɔ,

tshə sə̂ sə̂ də ə̈bə̈ ərə bale rô pâ nə ne;

â ətshə ə̂në tshə rɔ̂ ərə kʉ teashe kɔ,

ə̈bə̈ ərə bale tshɔ ətshə tshɔ ne.»*

16 Mərshe kə Ndjapä ə̂në tshə zâ gâ tə̂ lɔsu Titə ndə kə pa tshə sə də əgo ndə kə mbrə ə̂rɔ̂ nə kə e, mata ə̂në mə sə də nə kɔ. 17 Mbrə ə̂në Titə nə yîndə əpʉ ə̂në ä pâ kə ətshə kɔ â mbrə̂ ərə rô pâ ərə ə̂në ä yû tshuku nə kə ətshə kɔ. Ndə tshelə dje ye də ə̂tə̂ ye də̂ tshə âfɔ ndə kə na gâ ndə e je kɔ. 18 Ä wlâ ətshə də aye əzü ə̂në azü lə Alaglizə nɔ̂ sə kə tra ətshə mbrə ə̂rɔ̂ kosəra ə̂në tshə mbrə ndə kə mʉ Ə̂rɔ̂ Əpʉ kɔ. 19 Gâ pâ nə, azü lə Alaglizə nə kê ətshə ndə kə pa tshə te gâ ndə ä lə ana kosəra ə̂rɔ̂tə̂ ə̂në ä sə kə mbrə nə kɔ. Ä sə kə ma kosəra səkɔ ndə kə pa azü vrɔ kʉtə̂ Âgbɔ̂ Əyïngerə tshî, ndje ndə kə pa ä yisə̂ əgo kə mbrə ə̂rɔ̂ ərə tə̂ lɔsu ä kɔ gashu.

20 A yi yində kə pa azü pa tə̂ ä mbrə əgerə ngendja ə̂në azü ngbô gâ tə̂ nə ə kô kə ä kɔ ne. 21 Mbrə ə̂në ä pra äwä ndə kə pa ä mbrə ərə ə̂në ə sə tə ə̂rɔ̂nə kɔ, ə də̂ kʉ lə ala Âgbɔ̂ Əyïngerə də̂ ne, bale lə ala azü ndje.

22 Ä wlâ əndje də aye əzə̂ ə̂në, lə alabə̈ aərə ngbatshe, ä trâ ətshə ndə kə wu əgo kə mbrə kosəra nə̂ ye gâ ye, â kpəsəye tshə yisə̂ nə gashu ə rô pâ nə mbrə ə̂në tshə za lɔsu ye nɔ̂ gâ pâ e kɔ. 23 Rəkɔ, ənə̂ Titə, tshə sə tə gbɔbəngâ əmə lə ana, ndje tə gbɔbəngâ əmə lə kosəra ngotə̂ e. Gu də ənə̂ alaye əzə̂ nə, azü lə Alaglizə kə wlâ əndje kɔ; əndje sə kə ma kosəra mbrə kə mbe Kristə. 24 Rəkɔ, lə ala azü lə Alaglizə, e yïsə̂ nə gashu ə pa e yində əndje ngâ ə yïsə̂ nə ə pa ä da əkro ä tə̂ e də äwänə kə əndje.