1 Alaye, rəkɔ mə sə kə mʉ əpʉ kə e ndə kə pa, mbrə ə̂rɔ̂tə̂ Ndjapä nə ə̂në ə sə ngbatshe kɔ, e zä tshekotə̂ e nɔ̂ kə Ndjapä nə tə ərə əkrɔ ə̂në ə sə tə sorô, ə sə kpî â ə̂në ə fʉ ə fʉ lə ala Ndjapä nə kɔ. Djatra äwä kə vrɔ Ndjapä nə ə̂në e lï ndə kə pa e vrɔ ətshə kɔ kə sə̂. 2 E mbrə̈ mbrə̈ tə̂ e Lïndə̂ kə mbrə tə̂ azü tshepashɔ tshe kpəsəye ne, bale e kätə̂ äwä kə Ndjapä tshə do tshelə kə wusə̂ ərə nə̂ e tə tafa nə, kanika e yerɔ äwä ərə ə̂në tshelə Ndjapä nə yində nə də ərə ə̂në ə sə tə ə̂rɔ̂ nə, ə̂në ə fʉ ə fʉ â ə lï nɔ̂ kɔ.

3 Tə̂ äwä ə̂rɔ̂tə̂ Ndjapä nə ə̂në tshə mbrə̂ kə əmə kɔ, mə pa kə e bale bale ə pa e wü tə̂ e wü tə əgbro azü ne, bale e sə̈ də aəpʉ ə̂në ə sə Lïndə̂ nə tə̂ lɔsu e, ə lï də əpʉ lɔsu ə̂në Ndjapä zâ kə əzü bale bale kɔ. 4 A sə də aərə tshekotə̂ əzə̂ ə̂në ə ngba ə ngba tə̂ əndu əzü kʉ bale, â aərə tshekotə̂ nə nɔ̂ mbrə mbrə kʉtə̂ kosəra bale ne. 5 Äwä bale ndje, əzə̂ ə̂në a ngba ə ngba kɔ, a mbrə̂ tə tshekotə̂ əzü kʉ bale lə Kristə gâ ye, â lə takpa tə̂ əzə̂, a sə nɔ̂ mata aərə tshekotə̂ əzü. 6 Ə̂në a sə də aâkrâ ə̂në ə sə kpî kpî kpî, Lïndə̂ ə̂rɔ̂tə̂ Ndjapä nə ə̂në tshə mbrə̂ kə əzə̂ kɔ, əzü ə̂në tshə sə də âkrâ kə pa ndəma Ndjapä, tshə mbrə̈ kosəra də nə ə lï də əpʉ lɔsu ə̂në tshə sə də nə kɔ. 7 Əzü ə̂në tshə sə də âkrâ ndə kə mbrə kosəra mbrə azü, tshə za tə̂ ye gâ tə̂ kosəra nə. Əzü ə̂në tshə sə kə yisə̂ ərə kə azü, tshə zä tə̂ ye gâ tə̂ kə yisə̂ ərə nə ə̂në tshə yisə̂ nə kɔ. 8 Əzü ə̂në tshə sə kə gbɔgbɔ lɔsu azü, tshə zä tə̂ ye gâ tə̂ nə. Əzü ə̂në tshə sə kə ko aərə kə azü, tshə kô tə aərə âkrâ; əzü ə̂në tshə sə gâ tə̂ kumu aangbɔ, tshə mbrə̈ kosəra nə də lɔsu ye nɔ̂; əzü ə̂në tshə sə kə ko aərə kə alayïəyo, tshə mbrə̈ də ə̂rû tə̂ lɔsu ye.

9 E yïndə azü yï də lɔsu e bishi ne. E wə̈ra tə̂ e tə̂ əmbrʉ ərə də lɔsu e bale; e zä tshelə e nɔ̂ gâ tə̂ kə mbrə ə̂rɔ̂ ərə. 10 Tə̂ äwä kə yi tə̂ tə alaye azü, e yï tə̂ e ngbatshe lə takpa tə̂ e. Tə̂ äwä kə lʉ azü, e lʉ̈ angâ e lə takpa tə̂ e ə ro e də ə̂tə̂ e. 11 E sə̈ də əgo ndə kə pa e mbrə kosəra, e mbrə̈ adɔ mbrə̈ ne. E sə̈ woradja woradja ə mbrə̈ kosəra kə Âgbɔ̂ Əyïngerə. 12 Tshelə e sə̈ də ə̂rû mbrə ərə ə̂në e za lɔsu e gâ pâ nə kɔ. E wüsə̂ kə ru tshelə e lə ərə əyo. E däka pə kʉ tə̂ äwä kə yu Ndjapä. 13 E kö aərə ə̂në azü nə̂ Ndjapä sə də əgo nə kɔ kə əndje. E wüsə̂ kə ko ayirə gâ lə aanda nə̂ e.

14 E tö ngwarə gâ pâ azü ə̂në əndje gi əyo tə̂ e kɔ; e tö ngwarə gâ pâ azü, e drä azü drä ne. 15 E sə̈ də ə̂rû də azü ə̂në əndje sə də ə̂rû kɔ, ə kɨ̈ əkɨ də azü ə̂në əndje sə kə kɨ nə kɔ. 16 Aəpʉ lɔsu e sə̈ kʉ bale lə takpa tə̂ e. E mä mä əgo ərə ə̂në ə rô e gâ ye kɔ ne, bale e mä də̂ əgo ərə ə̂në ə sə kʉ teashe kɔ. E wü tə̂ e wü lə ala e tə aawowusə̂ ərə ne.

17 E mbrə̈ əmbrʉ ərə mbrə̈ mandâ əmbrʉ ərə kə ə̈bə̈ əzü bale ne. E prä äwä ərə ə̂në ə sə tə ə̂rɔ̂ nə lə ala azü nɔ̂ kɔ. 18 Kədə äwä nə â sə je, â ərə nə â wu kʉtə̂ e, e sə̈ də blatshe də azü nɔ̂. 19 Alaye ə̂në mə yində e wââ kɔ, e mbrə̈ əmbrʉ ərə mbrə̈ də ə̂tə̂ e mandâ əmbrʉ ərə ə̂në azü mbrə̂ kə e kɔ bale ne. Bale, e kätə̂ äwä kə əkɔ nə̂ Ndjapä ə mbrə ərə. Mbrə ə̂në lə Fraka nə̂ Ndjapä Əyïlingû pâ əpʉ ə pa: «Əmə kə piyi ködä əmbrʉ ərə kə azü! Əmə kə piyi tshe mandâ əmbrʉ ərə kə əndje je.»* 20 Bale, tshə pâ kwatə̂ye ə pa: «Kədə əgo kə mi əyïkowɔ nə̂ zə, kö rəgo kə ətshə tshə zɨ; kədə əgo ə̂ngû kə mi ətshə, tö ə̂ngû kə ətshə tshə ndju. Mbrə ə̂në bə â mbrə rə, jiwo də̂ bə əra gâ lə akrɔ ye kɔ.»* 21 Kätə̂ äwä kä kə əmbrʉ ərə ə ro pâ zə ne, bale ro pâ əmbrʉ ərə nə tə̂ äwä ə̂rɔ̂ ərə.