1 Rəkɔ a sə kə pa atâ a? A sə kə daka kʉ pə lə nyaka nə ndə kə pa ə̂rɔ̂tə̂ Ndjapä nə ro pâ nə a? 2 Bale ne! Əzə̂ ə̂në a tshû tə̂ nyaka gâ ye kɔ, a daka pə lə nyaka nə atâ a? 3 E wusə̂ nə wu ə pa əzə̂ nɔ̂ ə̂në a zâ batamo nə̂ Jezu Kristə gâ ye kɔ, batamo kuzu ye də̂ a zâ gâ ye kɔ ne a? 4 Tə̂ äwä batamo kuzu səkɔ, əndje shî əzə̂ də a-Jezu gâ ye ndə kə pa, mata ə̂në Kristə nə shê lə takpa tə̂ akuzu, tə̂ äwä ə̂yî Abä gâ ye kɔ, əzə̂ ndje a sə lə tafa kə sə əzə̂.

5 Mbrə ə̂në kədə a sə äwä bale mata ətshə tə̂ äwä kuzu ə̂në tshə tshû gâ ye kɔ, a she äwä bale mata ə̂në tshə shê gâ ye kɔ je. 6 A wusə̂ nə ə pa əndje kû angbrɔ əzü ə̂në a sə̂ leme-e tə̂ äwä nə kɔ gâ ala masheyɔ də Kristə nə gâ ye, ndə kə pa kushu nyaka nə lə əzə̂ nə tshu gâ ye kanika a da daka pə tə akanga nə̂ nyaka nə ne. 7 Mbrə ə̂në əzü ə̂në tshə tshû gâ ye kɔ, nyaka da daka pə lə kumu ye ne. 8 Kandää, kədə əzə̂ də a-Kristə nə kə tshû gâ ye kɔ, a wusə̂ nə mâ tə̂ lɔsu əzə̂ ə pa a də aəndje ə sə də sorô ndje je. 9 Ä wusə̂ nə ə pa Kristə nə ə̂në tshə shê lə takpa tə̂ akuzu gâ ye kɔ, tshə sə sə kə tshu kwatə̂ye ne; kuzu sə sə də awlra gâ pâ ye kwatəndje ne. 10 Ə̂në tshə tshû gâ ye kɔ, mbrə nyaka də̂ tshə tshû kɔ, äwä kpiabale gbrä; â ə̂në tshə sə də sorô kɔ, tshə sə də sorô nə mbrə Ndjapä. 11 Rəkɔ e-e ndje, e wü tə̂ e tə azü ə̂në e tshû mbrə nyaka gâ ye â sə də sorô mbrə Ndjapä, lə Jezu Kristə nə kɔ.

12 Rəkɔ, nyaka lï lï ndə kə pa ə sə də awlra gâ pâ əndu e ə̂në ə tshu ndə ə̈bə̈ alɔ je kɔ ne, â e lï lï ndə kə pa e mbrə ərə Lïndə̂ aəmbrʉ aəgo əndu e nə ne! 13 E kätə̂ äwä ndə kə pa ə za əndu e nə ndə äwä akosəra nə̂ nyaka nə gâ ye, ndə kə pa e mbrə əmbrʉ ərə ne! Bale, e zä tə̂ e gâ tə̂ äwä kosəra nə̂ Ndjapä, mata asorô ə̂në əndje shê gâ ye kɔ. E zä əndu e nə tə ərə kə mbrə də ərə ə̂në ə sə də äwänə kɔ. 14 Mbrə ə̂në nyaka sə sə də awlra gâ pâ e mandânə səye ne, e sə sə gâ tshekudu âgbɔ̂ əpʉ ne, bale e sə gâ tshekudu ə̂rɔ̂tə̂ Ndjapä â sə kɔ.

15 Rəkɔ yekɔ? A mbrə kəmə nyaka mbrə ə̂në a sə sə tshekudu âgbɔ̂ əpʉ nə ne, â sə tshekudu ə̂rɔ̂tə̂ Ndjapä nə kɔ a? Bale ne! 16 E wûsə̂ nə wû ə pa kədə e za tə̂ e tə akanga kə ə̈bə̈ əzü, ndə kə pa e dji əpʉ ama ye, e sə tə akanga nə̂ əzü nə ə̂në e sə kə dji əpʉ ama ye nə kɔ ne a? Wala tə akanga nyaka ə̂në ə na də əzü trɔ kuzu kɔ wala tə akanga kə dji əpʉ ama Ndjapä ə̂në ə na də əzü gâ tə̂ ərə ə̂në ə sə də äwänə kɔ ne a? 17 Bale, mərshe kə Ndjapä, mbrə ə̂në, mandânə ə̂në e sə̂ leme-e tə akanga nyaka kɔ, e mbrə̂ tə̂ e kpəsəye də lɔsu e nɔ̂ Lïndə̂ ərə ə̂në əndje yîsə̂ nə kə e gâ ye kɔ. 18 E wûtu tshekudu nyaka gâ ye, e dô tə̂ e tə akanga ərə ə̂në ə sə də äwänə kɔ gâ ye. 19 Mə sə kə pa əpʉ tə ənə̂ azü mbrə ə̂në e daka pə kə mɔ ə mɔ lə akwa e: äwä bale ə̂në e zâ tshekotə̂ e nɔ̂ leme-e tə akanga ərə kene də əmbrʉ ərə ndə kə pa e mbrə əmbrʉ ərə kɔ, äwä bale ndje, e zä tshekotə̂ e nɔ̂ kpəsəye tə akanga ərə ə̂në ə sə də äwänə kɔ, ndə kə pa e za tə̂ e kpî mbrə Ndjapä.

20 Alɔ ə̂në e dâka pə leme-e tə akanga nyaka kɔ, ə̈bə̈ ərə kô e kô də awlra ndə kə pa e ma ərə ə̂në ə sə də äwänə kɔ ne. 21 Bale, ərə yekɔ də̂ e sɔ̂tə̂ nə mandâ kə mbrə aərə ə̂në gana nə ə mbrə e kpəsəye kɔ? Mbrə ə̂në tshemandâ aərə səkɔ kə də̂ kuzu. 22 Bale kpəsəye, ə̂në e wûtu tshekudu nyaka nə gâ ye â dô tə̂ e tə akanga nə̂ Ndjapä gâ ye kɔ, tshemandâ nə kə də̂ kə pa e ma ərə ə̂në ə yisə̂ nə ə pa e sə kpî mbrə Ndjapä kanika ə sə də sorô nə̂ alɔnɔ̂. 23 Mbrə ə̂në ərə tshemandâ nyaka nə kə də̂ kuzu; bale âkrâ nə̂ Ndjapä nə lə ə̂rɔ̂tə̂ ye kə də̂ sorô nə̂ alɔnɔ̂ lə Jezu Kristə, Âgbɔ̂ Əyïngerə nə̂ əzə̂ nə.