1 Lə Kristə, mə sə kə pa djatra əpʉ, ə də̂ əterə də̂ mə pa kɔ ne; lɔsu əmə, tə̂ äwä Âgbɔ̂ Yîrə̂, wusə̂ nə ə pa djatra əpʉ də̂ mə pa kɔ: 2 mə sə də âgbɔ̂ əyo tə̂ lɔsu əmə â sə kə mbrə əmə a pa də rəka. 3 Ə ga ndə kə pa Ndjapä dra əmə gâ ye, tshelə takpa tə̂ əmə də Kristə nə sɔ̂ gâ ye mbrə ə̂rɔ̂ ərə mbrə alaye əmə, azü lə marä nə̂ əmə. 4 Əndje sə tə azü əgɔ Isərayalə: ə̂në Ndjapä mbrə̂ əndje tə̂ aləvu nə gâ ye, ə yîsə̂ ə̂yî ye kə əndje gâ ye, ə mbrə̂ mbʉkʉ də əndje gâ ye, ə zâ âgbɔ̂ əpʉ kə əndje gâ ye də əpʉ kə vrɔ ətshə gâ ndə aəpʉ ə̂në tshə zâ ama də nə gâ ye kɔ. 5 Əndje sə tə angwa alabä â Kristə nə, lə əzü tə̂ ye, wûtu lə marä nə̂ əndje, ətshə ə̂në tshə sə gâ pâ aərə nɔ̂ kɔ, tə Ndjapä ndə kə pa azü mbe ətshə alɔnɔ̂ kɔ. Asərəmə! 6 Ə sə sə ə pa Əpʉ Ndjapä nə mbrə̂ tə angbrɔ əpʉ gâ ye ne. Mbrə ə̂në ə də̂ azü nɔ̂ ə̂në əndje wûtu lə marä Isərayalə nə kɔ də̂ kə sə tə djatra azü əgɔ Isərayalə nə ne. 7 Â ə də̂ azü nɔ̂ ə̂në əndje zû əndje lə bəngʉ nə̂ Abraamo kɔ də̂ kə sə tə djatra aneshe nə̂ ye ne, mbrə ə̂në Ndjapä nə pâ kə Abraamo nə ə pa: «Tə̂ äwä Izakə də̂ bə sɔtə̂ angwa zə je ə̂në mə zâ ama də əpʉ nə kə əbə gâ ye kɔ.»* 8 Âdâ əpʉ sə̂ kə də̂: ə də̂ aneshe ə̂në əndje zû əndje lə əzü tə̂ əndje kɔ də̂ kə sə tə aneshe nə̂ Ndjapä nə ne; kʉtə̂ aneshe ə̂në əndje zû əndje Lïndə̂ əpʉ ə̂në Ndjapä nə zâ ama də nə kɔ kə sə tə djatra aneshe nə̂ ye nə. 9 Mbrə ə̂në əpʉ nə ə̂në Ndjapä nə zâ ama də nə gâ ye kɔ kə səye: «Kʉ tə̂ tshekɨ səye mandânə, mə sə kə na nə â Sara sə kə sɔtə̂ əgblə.»*

10 Ə də̂ əpʉ nə nɔ̂ də̂ kə sə̂ ne: əpʉ nə̂ Rəbeka sə ndje rə. Tshə zû amêyâ kə Izakə, tə abä əzə̂; 11 ə̂në əndje tê tê pa ə zu əndje ne kɔ â aneshe nə tê tê pa ə mbrə ə̂rɔ̂ ərə wala əmbrʉ ərə ne kɔ – â ndə kə pa ərə ə̂në Ndjapä nə gâmba gâ ye kɔ daka pə kpə mandânə Lïndə̂ kə ke ətshe nə̂ ye, 12 ə̂në ə ka ka gâ pâ əpʉ kə mbrə aərə ne kɔ, bale ə to mâ ndə ətshə ə̂në tshə e azü kɔ – bale tshə pâ kə Rəbeka nə ə pa: «Âgbɔ̂ nə ə sə tə kanga nə̂ əngʉ nə je.»* 13 Mata ə̂në Fraka nə̂ Ndjapä pâ əpʉ ə pa: «Mə yîndə Jakɔbə â tshelə əmə wə̂ra tə̂ ye tə̂ Esawu gâ ye.»*

14 Rəkɔ, a sə kə pa atâ a? Kə mbrə ərə nə̂ Ndjapä nə sə sə də äwänə ne a? Bale ne! 15 Mbrə ə̂në tshə pâ leme-e kə Mayïzə ə pa: «Mə sə kə wu əyo əzü ə̂në mə yində kə wu əyo ye, â mə sə kə mbrə ə̂rɔ̂nə kə əzü ə̂në mə yində kə mbrə ə̂rɔ̂nə kə ətshə kɔ.»* 16 Rəkɔ, ə̂rɔ̂tə̂ Ndjapä nə wu wu ədje ye ərə ə̂në tshelə azü yində nə kɔ ne wala aərə ə̂në əndje mbrə də awlra nə̂ əndje kɔ ne, bale ə wu kʉtə̂ Ndjapä nə ə̂në tshə wu əyo azü kɔ. 17 Mbrə ə̂në lə Fraka nə̂ Ndjapä, Ndjapä pâ kə Faraɔ ə pa: «Mə mbrə̂ əbə tə əyïngerə ndə kə pa mə yisə̂ awlra nə̂ əmə gashu lə zə kanika əɨrɨ əmə kɨ sɔ pâ ashɔ nɔ̂.»* 18 Rəkɔ, tshə sə kə wu əyo əzü ə̂në tshelə ye yində nə, â sə kə gbɔ lɔsu əzü ə̂në tshelə ye yində nə.

19 Bale, bə sə pa kə əmə ə pa: «Mbrə yekɔ də̂ Ndjapä nə daka pə ndə kə nga kə əzə̂ kɔ? Mbrə ə̂në əde kə lï ndə kə pa tshə wəra tə̂ ye tə̂ ərə ə̂në tshelə Ndjapä nə yîndə nə gâ ye kɔ?» 20 Bale, rəkɔ bə sə tə əde, əbə, əzü, ndə kə pa bə shera əpʉ ama Ndjapä nə? Ləsû ətɔ lï ndə kə pa kə awoso nə ə pa: «Bə mbrə̂ əmə rəke mbrə yekɔ?» 21 Awoso ləsû nə lï lï ndə kə pa tshə mbrə ərə ə̂në tshelə ye yində nə kɔ də ətɔ nə ne a? Kʉ də ətɔ səkɔ, tshə lï lï ndə kə pa tshə so ə̈bə̈ ləsû ə̂në ə fʉ tə bandanə kɔ wala ə̈bə̈ amba ləsû nə ne a?

22 Kədə Ndjapä nə yində kə yisə̂ əkɔ nə̂ ye də awlra nə̂ ye gashu kə azü, bale bə sə kə pa atâ? Tshə rû tshelə ye ngbatshe tə̂ azü ə̂në əndje lî kəmə ndə kə pa əkɔ nə̂ ye nə te gâ pâ əndje â əndje lî ndə kə pa tshə liwu əndje gâ ye kɔ. 23 Bale, tshə mbrə̂ rə mbrə ə̂në tshə yî ndje ndə kə pa tshə ma ə̂yî ye ə̂në ə rô pâ nə gâ ye kɔ gashu mbrə alabə̈ aata azü nə, əndje ə̂në tshə wu əyo əndje, ə̂në tshə gâmba əndje ətshinə gâ ye mbrə ə̂yî ye nə kɔ. 24 Əzə̂, a sə lə takpa tə̂ azü nə ə̂në tshə ê əndje gâ ye kɔ, ə də̂ kʉ lə takpa tə̂ Ajuwufu nə də̂ ne, bale lə takpa tə̂ ə̂dû amarä ndje. 25 Əpʉ ə̂në tshə pâ lə fraka nə̂ Ɔze kɔ kə sə̂ ə pa:

«Azü ə̂në əndje sə sə tə azü nə̂ əmə ne kɔ,

mə sə kə e əndje tə azü nə̂ əmə,

â marä ə̂në mə yində nə yi ne kɔ,

mə sə kə e tə marä ə̂në mə yində nə ngbatshe kɔ.*

26 Â tə̂ ətshe ə̂në əndje sə kə pa kə əndje ə pa:

"E sə sə tə azü nə̂ əmə ne" kɔ,

kʉ kôto, əndje sə kə e əndje

tə aləvu Ndjapä ə̂në tshə sə tə sorô kɔ.»*

27 Ezayi pa ndje ənə̂ ye gâ pâ əpʉ nə̂ azü əgɔ Isərayalə nə ə pa: «Kədə azü əgɔ Isərayalə nə kə ngbâ kəmə mata mindu tə̂ ama ə̂ngû əngbrʉ, kʉtə̂ ə̈bə̈ ə̂dû əndje lə takpa nə kə she lə kuzu je; 28 mbrə ə̂në əpʉ ə̂në Əyïlingû pâ gâ ye kɔ, tshə sə kə mbrə ndəma nə nɔ̂ katshä katshä pâ ashɔ.»*

29 Â mata ə̂në kʉtə̂ Ezayi nə, tshə pâ əlînə ə pa:

«Kədə Əyïlingû Âgbɔ̂ Əyïworɔgbɔ

kə kâ kâtə̂ alabə̈ aangwa əzə̂ kəmə tʉ ne,

a sə̂ kə sə kəmə mata azü əgɔ Sɔdɔmə gâ ye,

a sə̂ kə sə kəmə mata azü əgɔ Gɔmɔrə gâ ye.»*

30 Rəkɔ, a pa atâ â sə kɔ? Azü ə̂në əndje sə sə tə Ajuwufu ne kɔ, ə̂në əndje pâ prâ äwä ndə kə pa əndje sə tə aə̂rɔ̂ azü lə ala Ndjapä ne kɔ, Ndjapä nə mbrə̂ əndje tə aə̂rɔ̂ azü lə ala ye gâ ye, tə̂ äwä əpʉ lɔsu əndje. 31 Â bale, azü əgɔ Isərayalə nə, ə̂në əndje prâ äwä ndə kə pa alane sə tə aə̂rɔ̂ azü lə ala Ndjapä nə tə̂ äwä âgbɔ̂ əpʉ kɔ, əndje tɔ̂ tɔ̂ gâ tə̂ nə ne. 32 Mbrə yekɔ? Mbrə ə̂në əndje pâ prâ äwä ndə kə sə tə aə̂rɔ̂ azü nə lə ala Ndjapä nə tə̂ äwä lɔsu əndje ne, əndje wû ənə̂ əndje ə pa alane sə kə sə tə aə̂rɔ̂ azü nə tə̂ äwä aərə ə̂në alane ə mbrə kɔ. Əndje zâ tə̂ əndje trɔ əkpʉ ə̂në azü ə te tə̂ nə kɔ, 33 ə̂në Fraka nə̂ Ndjapä pa ndə nə ə pa:

«E wü-a, mə za ə̈bə̈ əkpʉ ə̂në azü ko ə̈nü əndje trɔ nə kɔ mâ Siɔ,

əkpʉ ə̂në əndje te tə̂ nə kɔ.

Bale, əzü ə̂në tshə za lɔsu ye kə ətshə,

gana sə sə kə ngɔ ətshə bale ne.»*