1 Rəkɔ, kpəsəye əpʉ ngbanga sə sə kwatə̂ye lə kumu azü ə̂në əndje tɔ̂ popo Jezu Kristə gâ ye kɔ ne. 2 Mbrə ə̂në âgbɔ̂ əpʉ nə̂ Âgbɔ̂ Yîrə̂, ə̂në ə za sorô kə azü tə̂ äwä Jezu Kristə kɔ, djɔ̂ əbə* lə âgbɔ̂ əpʉ nyaka də kuzu gâ ye. 3 Ndjapä mbrə̂ ərə ə̂në âgbɔ̂ əpʉ nə̂ Mayïzə lï lï ndə kə mbrə nə ne kɔ gâ ye, mbrə ə̂në kə mɔ əzü kânga äwä tə̂ âgbɔ̂ əpʉ nə ndə kə mbrə nə: bale Ndjapä nə wlâ Ɨrɨ nə də ə̂tə̂ ye lə akwa əzü ə̂në ə sə mata akwa alayïnyaka kɔ ndə kə pa tshə djɔ əndje lə nyaka nə. Kôto səkɔ, Ndjapä nə wâ ngbanga gâ pâ nyaka nə ə̂në ə mbrə kosəra lə akwa azü nə kɔ gâ ye. 4 Ndjapä nə mbrə̂ ərə səkɔ ndə kə pa a mbrə tə̂ əzə̂ Lïndə̂ kə ma ərə də äwänə ə̂në âgbɔ̂ əpʉ nə zâ ama də nə gâ ye kɔ, əzə̂ ə̂në a mbrə tə̂ əzə̂ mbrə mandânə səye Lïndə̂ lɔsu əzə̂ ne kɔ, bale â sə kə mbrə tə̂ əzə̂ Lïndə̂ ndəma Âgbɔ̂ Yîrə̂ kɔ. 5 Mbrə ə̂në azü ə̂në lɔsu əndje sə kə yisə̂ äwä kə əndje kɔ, əndje sə kə mbrə aərə Lïndə̂ aəgo lɔsu əndje nə; bale, azü ə̂në Âgbɔ̂ Yîrə̂ nə sə kə yisə̂ äwä kə əndje kɔ, əndje sə kə mbrə aərə Lïndə̂ ndəma Âgbɔ̂ Yîrə̂ nə. 6 Kədə əzü kə ma tə̂ ye Lïndə̂ aəgo lɔsu ye, tshə sə kə na trɔ kuzu; bale, kədə əzü kə ma tə̂ ye Lïndə̂ Âgbɔ̂ Yîrə̂, tshə sə kə na gâ tə̂ sorô də blatshe. 7 Kə mbrə tə̂ Lïndə̂ lɔsu əzü mbrə â əzü wəra tə̂ ye tə̂ Ndjapä, tshə sə sə kə mbrə ərə Lïndə̂ âgbɔ̂ əpʉ nə̂ Ndjapä nə ne, tshə lï lï ndje ndə kə pa tshə mbrə rə ne. 8 Azü ə̂në əndje sə kə mbrə tə̂ əndje Lïndə̂ lɔsu əndje kɔ, əndje lï lï ndə kə fʉ lə ala Ndjapä ne.

9 Ənə̂ e, e sə sə kə mbrə tə̂ e Lïndə̂ lɔsu e nə̂ əzü ne, bale e sə kə mbrə tə̂ e Lïndə̂ Âgbɔ̂ Yîrə̂ nə, mbrə ə̂në Âgbɔ̂ Yîrə̂ nə sə lə e. Əzü ə̂në tshə sə sə də Yîrə̂ Kristə nə ne, tshə sə sə tə əzü nə̂ ye ne. 10 Kandää, kədə Kristə nə kə sə lə e, əndu e, tə djatra əpʉ nə, tshû mbrə nyaka gâ ye, bale Yîrə̂ nə sə tə sorô e mbrə ə̂në Ndjapä nə mbrə̂ e tə aə̂rɔ̂ azü lə ala ye gâ ye. 11 Â kədə Yîrə̂ ətshə ə̂në tshə shê Jezu lə takpa tə̂ akuzu kɔ kə sə lə e, ətshə nə ə̂në tshə shê Kristə nə lə takpa tə̂ akuzu nə kɔ, sə kə mbrə ndə kə pa aəndu e nə ə̂në ə sə kə tshu ə tshu kɔ sə də sorô tə̂ äwä Yîrə̂ ye nə ə̂në ə sə lə e nə kɔ.

12 Rəkɔ, alaye əmə, a sə də ə̈bə̈ ködä lə kumu əzə̂, bale ə də̂ ənə̂ lə əzü tə̂ əzə̂ nə də̂ ne, ndə kə pa a mbrə tə̂ əzə̂ Lïndə̂ aəgo lɔsu əzə̂ nə ne. 13 Mbrə ə̂në kədə e mbrə tə̂ e Lïndə̂ lɔsu e nə, e sə kə tshu nə. Bale kədə, tə̂ äwä Âgbɔ̂ Yîrə̂ nə, də̂ e wo kə mbrə tə̂ e lə akwa əzü nə gâ ye, e sə kə sə də sorô. 14 Mbrə ə̂në azü nɔ̂ ə̂në Yîrə̂ nə̂ Ndjapä nə sə kə yisə̂ äwä kə əndje kɔ sə tə aləvu Ndjapä nə. 15 Mbrə ə̂në ə də̂ yîrə̂ kə mbrə e tə akanga, ə̂në ə daka pə kə mbrə awa gâ lə e kɔ, də̂ e sɔ̂tə̂ nə kɔ ne, bale e sɔ̂tə̂ Yîrə̂ ə̂në tshə mbrə̂ e tə aləvu Ndjapä gâ ye kɔ, ə̂në tə̂ äwä ye a sə kə ta râwâ tə̂ Ndjapä ə pa: «Abba! Abä!» kɔ. 16 Yîrə̂ nə də ə̂tə̂ ye sə kə pa əpʉ kə yîrə̂ əzə̂ ə pa a sə tə aneshe nə̂ Ndjapä. 17 Kandää, kədə a sə tə aneshe nə̂ Ndjapä nə, a sɔtə̂ aərə ə̂në Ndjapä nə zâ ama də əpʉ nə kə azü nə̂ ye gâ ye kɔ ndje je, əzə̂ də a-Kristə ə sɔtə̂ nə äwä bale je. Kədə əzə̂ də aəndje, tə djatra əpʉ, kə wu əyo, əzə̂ də aəndje ə sə lə ə̂yî ye ndje je.

18 Mə wu ənə̂ əmə ə pa aəyo ə̂në a wu kpəsəye kɔ lï lï də ə̂yî ə̂në Ndjapä ə yisə̂ nə kə əzə̂ gashu tala je kɔ ne. 19 Aərə nɔ̂ ə̂në Ndjapä mbrə̂ gâ ye kɔ ka ə ka ndə kə pa alɔ ə̂në Ndjapä nə ə yisə̂ aneshe nə̂ ye gashu tə̂ nə kɔ wutu diawû. 20 Mbrə ə̂në tsheshu nə ə̂në Ndjapä nə mbrə̂ gâ ye kɔ tê gâ tshekudu awlra aərə ə̂në ə tɔ tɔ gâ tə̂ ə̈bə̈ ərə ne kɔ gâ ye, ə də̂ mbrə ə̂në ə tə nə də ə̂tə̂ ye kə yində nə kɔ ne, bale mbrə ə̂në Ndjapä nə kə zâ gâ tshekudu awlra səkɔ. Bale, ə̈bə̈ ərə ndə kə pa tsheshu nə za lɔsu ye gâ pâ nə daka pə je. 21 Tsheshu səkɔ ə̂në Ndjapä nə mbrə̂ gâ ye kɔ də ə̂tə̂ ye ə wutu ndə ə̈bə̈ alɔ tshekudu awlra kə ndɨ ərə ə̂në ə za ətshə tə kanga kɔ je â ə sə äwä bale lə kə sə aneshe nə̂ Ndjapä ndə tshelə əndje lə ə̂yî je. 22 Kandää, a wusə̂ nə ə pa, ʉrrr ndjɔ kpəsəye, tsheshu nə nɔ̂ ə̂në Ndjapä nə mbrə̂ gâ ye kɔ sə kə kɨ nə ə sə kə wu əyo mata yashe ə̂në tshə sə kə zu nə kɔ. 23 Ə də̂ kʉtə̂ tsheshu nə də̂ ne. Əzə̂ ə̂në a sɔ̂tə̂ Âgbɔ̂ Yîrə̂ nə gâ ye mata əlî ərə aâkrâ nə̂ Ndjapä kɔ, a sə kə kɨ nə ndje djoko lə əzə̂ â sə kə ka ndə kə pa Ndjapä nə mbrə əzə̂ tə aləvu nə ngâ ə djɔ əzə̂ lə aərə əyo nɔ̂. 24 Mbrə ə̂në Ndjapä nə shê əzə̂ lə kuzu gâ ye, bale, əpʉ nə sə pə kʉ tə ərə ə̂në a za lɔsu əzə̂ gâ pâ nə. Kədə əzü kə wu ərə ə̂në tshə za lɔsu ye gâ pâ nə kɔ, ərə nə da daka pə tə ərə kə za lɔsu gâ pâ nə kwatəndje ne: ərə ə̂në əzü sə kə wu nə ə wu kɔ, tshə lï ndə kə pa tshə za lɔsu ye kwatə̂ye gâ pâ nə a? 25 Bale, kədə a za lɔsu əzə̂ gâ pâ ərə ə̂në a wu wu ne kɔ, a sə kə ru ə ru â ka mbrə nə.

26 Äwä bale ndje, Âgbɔ̂ Yîrə̂ ndje sə kə na ə tɨ əzə̂ gâ lafɔ, mbrə ə̂në a mɔ ə mɔ. Ngâ, a wu wusə̂ kə yu Ndjapä də äwänə ne; bale, Âgbɔ̂ Yîrə̂ nə də ə̂tə̂ ye sə kə yu Ndjapä nə mbrə əzə̂ də əkɨ əyo ə̂në ə̈bə̈ əpʉ sə sə kə wutu də nə gashu ne kɔ. 27 Â Ndjapä nə ə̂në tshə sə kə wu aərə tə̂ lɔsu azü kɔ wûsə̂ ərə ə̂në Âgbɔ̂ Yîrə̂ nə ə yu tshuku nə kɔ gâ ye, mbrə ə̂në Âgbɔ̂ Yîrə̂ nə sə kə yu Ndjapä nə mbrə azü ə̂në əndje zâ lɔsu əndje kə Ndjapä nə gâ ye, mata ə̂në tshelə Ndjapä nə yində nə kɔ.

28 A wusə̂ nə ə pa aərə nɔ̂ sə kə ma kosəra mvrɔ mbrə ə̂rɔ̂ ərə nə̂ azü ə̂në əndje yində Ndjapä kɔ, nə̂ azü ə̂në Ndjapä nə ê əndje gâ ye Lïndə̂ ərə ə̂në tshə gâmba gâ ye kɔ. 29 Mbrə ə̂në Ndjapä nə kê əndje ətshinə gâ ye; tshə zâ ama ndje ətshinə gâ ye ndə kə pa tshə mbrə əndje, əndje sə tə foto Ɨrɨ nə nə, kanika Ɨri nə nə sə tə âgbɔ̂ nə̂ alaye azü ə̂në əndje ngba ə ngba tə bandanə kɔ. 30 Â azü nə ə̂në tshə kê əndje ətshinə gâ ye kɔ, tshə ê ndje əndje gâ ye; â əndje nə ə̂në tshə ê əndje gâ ye kɔ, tshə mbrə̂ ndje əndje tə aə̂rɔ̂ azü lə ala ye gâ ye; â əndje nə ə̂në tshə mbrə̂ əndje nə tə aə̂rɔ̂ azü nə lə ala ye nə gâ ye kɔ, tshə kô ndje əndje gâ lə ə̂yî ye gâ ye.

31 A sə kə pa atâ gâ pâ əpʉ səkɔ? Kədə Ndjapä nə kə sə mbrə əzə̂, əde kə lï ndə kə za tshelə ye gâ tə̂ əzə̂? 32 Ndjapä nə gbɔ̂ tə̂ Ɨri nə də ə̂tə̂ ye gbɔ̂ ne, bale tshə kâ ətshə ndje mbrə əzə̂ nɔ̂ gâ ye: tshə ko aərə nɔ̂ ko kə əzə̂, lə ə̂rɔ̂tə̂ ye, də Ɨrɨ nə je ne atâ a? 33 Əde kə lea azü ə̂në Ndjapä nə kê əndje gâ ye kɔ je? Əzü bale ne! Mbrə ə̂në Ndjapä nə kə wu azü tə ə̂rɔ̂nə lə ala ye kɔ. 34 Rəkɔ, əde kə lï ndə kə pa tshə wa ngbanga gâ lə kumu əndje? Əzü bale ne! Mbrə ə̂në Jezu Kristə nə kə sə tə ətshə ə̂në tshə tshû gâ ye kɔ, â gâ pâ nə, tshə shê gâ ye ə sə gâ ndə ndəkɔ Ndjapä nə â sə kə yu Ndjapä nə mbrə əzə̂. 35 Əde kə lï ndə kə pa tshə sɔ əzə̂ gashe tə̂ kə yində əzə̂ ə̂në Kristə nə yîndə əzə̂ kɔ? Ərə əyo wala âgbɔ̂ awa wala ərə kanga ə̂në azü ə mbrə tə̂ əzə̂ kɔ wala əgo wala aərə ə̂në a sə sə də nə ne kɔ wala ə̈bə̈ əmbrʉ ərə wala kuzu a? 36 Mata ə̂në Fraka nə̂ Ndjapä pâ əpʉ ə pa:

«Mbrə əbə,

ä sə lə ama kuzu alɔnɔ̂,

azü wu ä tə andalimi ə̂në əndje sə kə wa angrɔ əndje ə wa kɔ.»*

37 Bale, lə aərə səkɔ nɔ̂, a rô pâ nə də awlra gâ ye tə̂ äwä ətshə nə ə̂në tshə yîndə əzə̂ gâ ye kɔ. 38 Mbrə ə̂në mə wusə̂ nə mâ tə̂ lɔsu əmə ə pa wala kuzu wala sorô wala atrawaya nə̂ Ndjapä wala aawlra tshelafɔ wala tshe kpəsəye wala tshe dambʉ wala aawlra ə̂në ə sə gâ pâ aərə kɔ, 39 wala aawlra tshelə əyi wala aawlra djoko tʉ wala ə̈bə̈ ata ərə ə̂në Ndjapä mbrə̂ gâ ye kɔ lï lï ndə kə pa ə sɔ əzə̂ gashe tə̂ kə yində əzə̂ ə̂në Ndjapä nə yində əzə̂ lə Jezu Kristə, Âgbɔ̂ Əyïngerə nə̂ əzə̂ kɔ bale ne.