1 Rəkɔ, a dô tə̂ əzə̂ tə aə̂rɔ̂ azü lə ala Ndjapä nə gâ ye mbrə lɔsu əzə̂ â a sə kpəsəye də blatshe də Ndjapä nə tə̂ äwä Âgbɔ̂ Əyïngerə nə̂ əzə̂ də Jezu Kristə nə. 2 Tə̂ äwä Jezu nə, a lï ndə kə pa, tə̂ äwä lɔsu, a sɔtə̂ ə̂rɔ̂tə̂ Ndjapä ə̂në əzə̂ ka gâ pâ nə kpirə̂ kɔ. Â ərə ə̂në a da əkro əzə̂ tə̂ nə kɔ kə də̂ əpʉ ə̂në lɔsu əzə̂ nə sə gâ pâ nə ndə kə pa a sə lə ə̂yî nə̂ Ndjapä nə je. 3 Gâ pâ nə ndje, a sə kə da əkro əzə̂ tə̂ əpʉ aərə əyo nə̂ əzə̂, mbrə ə̂në a wusə̂ nə ə pa ərə əyo mbrə â əzü wusə̂ kə ru tshelə ye, 4 kə ru tshelə nə mbrə â əzü lï ndə kə pa tshə ka gbʉ gbʉ gbʉ lə ərə kə tra ətshə â kə ka gbʉ gbʉ gbʉ nə mbrə â əzü za lɔsu ye gâ pâ ndəma Ndjapä. 5 Əpʉ kə za lɔsu nə gâ pâ ndəma Ndjapä səkɔ sə sə kə mbrə gana gâ lə ala əzə̂ ne, mbrə ə̂në Ndjapä nə zâ əpʉ kə yi tə̂ nə̂ ye sɨ gâ tə̂ lɔsu əzə̂ gâ ye tə̂ äwä Âgbɔ̂ Yîrə̂ ə̂në tshə zâ ətshə kə əzə̂ gâ ye kɔ.

6 Mbrə ə̂në, alɔ ə̂në a sə̂ sə̂ də awlra leme-e ne kɔ, Kristə nə tshû mbrə alayïnyaka tə̂ alɔ ə̂në Ndjapä nə dɨ̂ gâ ye kɔ. 7 Ə gbɔ ə gbɔ ndə kə pa ə̈bə̈ əzü yində nə ndə kə tshu mbrə ə̈bə̈ ə̂rɔ̂ əzü. Ə̈bə̈ əzü lï əte ndə kə pa tshə tshu mbrə ə̈bə̈ awoma ə̂rɔ̂ ərə. 8 Bale, Ndjapä nə yîsə̂ nə kə əzə̂ ə pa tshə yində əzə̂ atâ: Kristə nə tshû mbrə əzə̂, alɔ ə̂në a dâka pə tə alayïnyaka kɔ. 9 Tə̂ äwä kə ka tə̂ ye tə kə to əkrɔ, əzə̂ dô tə̂ əzə̂ kpəsəye tə aə̂rɔ̂ azü lə ala Ndjapä nə; â gu də̂ əkɔ nə̂ Ndjapä nə, tshə tshɔ əzə̂ tshɔ lə nə ne a! 10 A sə̂ leme-e tə alayïkowɔ nə̂ Ndjapä, bale tshə shê tshelə takpa tə̂ əzə̂ də aəndje gâ tə̂ nə gâ ye tə̂ äwä kuzu Ɨrɨ nə. Â gu də̂, ə̂në tshelə takpa tə̂ əzə̂ də aəndje nə tɔ̂ gâ tə̂ nə gâ ye kɔ, a sə sə kə she lə kuzu tə̂ äwä sorô Ɨrɨ nə ne a! 11 Ə̈bə̈ ərə sə je kwatə̂ye: a sə kə da əkro əzə̂ tə̂ Ndjapä nə tə̂ äwä Âgbɔ̂ Əyïngerə nə̂ əzə̂ də Jezu Kristə nə, ə̂në mbrə ətshə də̂ tshelə takpa tə̂ əzə̂ də Ndjapä nə tɔ̂ gâ tə̂ nə kpəsəye gâ ye kɔ.

12 Nyaka nâ gâ pâ ashɔ mbrə əzü bale, Adamə, â nyaka nə nâ də əpʉ kuzu. Bale kuzu nə rô sɔ pâ azü nɔ̂, mbrə ə̂në azü nɔ̂ mbrə̂ nyaka gâ ye. 13 Angbʉlînə ndə kə pa Ndjapä za âgbɔ̂ əpʉ kə Mayïzə, nyaka sə̂ pâ ashɔ gâ ye, bale, ə̂në âgbɔ̂ əpʉ nə tê tê pa ə sə je ne kɔ, Ndjapä nə gâ gâ ndə əpʉ nyaka nə ne. 14 Kandää, ə vɔ̂tə̂ nə mâ tə̂ Adamə ʉrrr ndjɔ gâ tə̂ Mayïzə, kuzu sə̂ də awlra, ndje pâ azü ə̂në əndje mbə̂ mbrə̂ nyaka mata Adamə nə ne kɔ, ə̂në tshə djî əpʉ ama Ndjapä nə djî ne kɔ.

Adamə nə sə tə foto ətshə ə̂në tshə na je kɔ. 15 Bale, nyaka nə̂ Adamə nə lï lï də əgerə âkrâ nə̂ Ndjapä nə ne. Ngâ, azü ngbatshe tshû mbrə nyaka nə̂ əzü bale gâ ye, bale ə̂rɔ̂tə̂ Ndjapä sə ngbatshe ə rô â âkrâ ə̂në tshə mbrə̂ kə azü ngbatshe tə̂ äwä əzü bale, Jezu Kristə nə kɔ, ə sə tə âgbɔ̂ ərə ə rô ərə sə̂ nɔ̂. 16 Âkrâ nə̂ Ndjapä nə mbrə̂ ə̈bə̈ ərə ndje ə rô nyaka nə̂ əzü bale nə; mbrə ə̂në tshemandâ nyaka nə̂ əzü bale nə kə də̂ əpʉ kə wa ngbanga gâ pâ azü â tshemandâ âkrâ nə̂ Ndjapä nə kə də̂ kə pa tshə mbrə azü nə, ə̂në anyaka nə̂ əndje sə ngbatshe kɔ, tə aə̂rɔ̂ azü lə ala ye. 17 Ngâ, tə̂ äwä əzü bale, tə̂ äwä nyaka nə̂ əzü bale, kuzu tê pâ azü nɔ̂. Bale tə̂ äwä Jezu Kristə tshî, azü sɔtə̂ aərə ngbatshe rô pâ nə djoko ndə Ndjapä: tshə ma ə̂rɔ̂tə̂ kə əndje rô pâ nə ə mbrə əndje tə aə̂rɔ̂ azü lə ala ye â əndje sə kə sə də sorô â sə tə alayïngerə də aəndje je mbrə Kristə nə.

18 Rəkɔ, nyaka nə̂ əzü bale, Adamə nə, nâ də əpʉ ngbanga gâ lə kumu azü nɔ̂. Äwä bale ndje, ə̂rɔ̂ kə ma ərə nə̂ əzü bale, Jezu Kristə nə, djɔ̂ azü nɔ̂ lə əpʉ ngbanga səkɔ ə za sorô kə əndje. 19 Tə̂ äwä kə dji əpʉ ama dji ne nə̂ əzü bale, ə̂kpû azü tê lə nyaka gâ ye. Äwä bale ndje, tə̂ äwä kə dji əpʉ ama nə̂ əzü bale, ə̂kpû azü dô tə̂ əndje tə aə̂rɔ̂ azü lə ala Ndjapä nə.

20 Âgbɔ̂ əpʉ nə wûtu â tshelə nyaka zû yɔɔɔ; bale tə̂ ətshe ə̂në nyaka sə ngbatshe tə̂ nə kɔ, ə̂rɔ̂tə̂ Ndjapä sə ngbatshe kwatə̂ye ə rô pâ nə. 21 Rəkɔ, äwä bale ə̂në nyaka wûtu də awlra kuzu gâ ye kɔ, äwä bale ndje, ə̂rɔ̂tə̂ Ndjapä sə də awlra ndə kə pa ə mbrə azü tə aə̂rɔ̂ azü ə za sorô nə̂ alɔnɔ̂ tə̂ äwä Jezu Kristə, Âgbɔ̂ Əyïngerə nə̂ əzə̂ nə.